ەل تىنىسى
بيىل ەلدە 16 ەسىرتكى زەرتحاناسى جويىلدى
جىل باسىنان بەرى ءىىم 16 ەسىرتكى زەرتحاناسىن جويدى, دەپ حابارلايدى astana-akshamy.kz.
ءىىم بريفينگىندە ۆەدومستۆونىڭ رەسمي وكىلى شىڭعىس الەكەشەۆ ەلدەگى ەسىرتكى احۋالى جانە ەسىرتكى قىلمىسىنا قارسى ءىس-قيمىل تۋرالى ايتتى.
– بيىل 2063 قىلمىستىق ەسىرتكى قۇقىق بۇزۋشىلىعى انىقتالدى. ەسىرتكى وتكىزۋدىڭ 517 فاكتىسى توقتاتىلدى. ءاربىر ءۇشىنشى فاكت ينتەرنەت ارقىلى جاسالادى. سونداي-اق ەسىرتكىنى اسا ءىرى مولشەردە ساقتاۋدىڭ 149 فاكتىسى انىقتالدى, – دەدى سپيكەر.
جىل باسىنان بەرى ءتورت ۇيىمداسقان قىلمىستىق توپ جويىلدى. ونىڭ ىشىندە ءبىر ترانسۇلتتىق قىلمىستىق توپ بار. ۇيىمداسقان قىلمىستىق توپتى ۇيىمداستىرعانى جانە وعان قاتىسقانى ءۇشىن سەگىز قىلمىستىق ءىس قوزعالدى.