ەلوردادا كوكجوتەل, قىزىلشا, ا گەپاتيتى بويىنشا ەپيداحۋال تۋرالى بريفينگ ءوتتى
استانا قالاسىنىڭ كوممۋنيكاتسيالار قىزمەتىندە ەلورداداعى كوكجوتەل, قىزىلشا جانە ا گەپاتيتى بويىنشا ەپيدەميولوگيالىق جاعداي تۋرالى استانا قالاسىنىڭ باس مەملەكەتتىك سانيتاريالىق دارىگەرى سارحات بەيسەنوۆا, استانا قالاسى قوعامدىق دەنساۋلىق ساقتاۋ باسقارماسى باسشىسىنىڭ ورىنباسارى گۇلناز دوسمىرزاەۆا مەن «استانا مەديتسينا ۋنيۆەرسيتەتى» كەاق بالالار جۇقپالى اۋرۋلارى كافەدراسىنىڭ مەڭگەرۋشىسى ديناگۇل باەشەۆانىڭ قاتىسۋىمەن بريفينگ ءوتتى, دەپ حابارلايدى astana-akshamy.kz
2023 جىلدىڭ قاراشا ايىنان باستاپ ەلوردادا قوسىمشا جاپپاي يممۋنداۋ شەڭبەرىندە جانە قۋىپ جەتىپ يممۋنداۋ (پو ناۆەرستىۆايۋششەي يممۋنيزاتسي) بويىنشا 98 772 ادام ەكپە العان, بۇل ونىڭ 81,6% قۇرايدى. ەپيدەميولوگيالىق كورسەتكىشتەر بويىنشا ينفەكتسيا وشاقتارىندا 2 248 ادام ەكپە العان.
ەپيدەمياعا قارسى ءىس-شارالار اقپان ايىندا قىزىلشا اۋرۋىنىڭ قاڭتار ايىمەن سالىستىرعاندا 1,3 ەسە, ال 1-4 جاستاعى بالالار اراسىندا 1,7 ەسە تومەندەۋىنە اسەر ەتتى. ا ۆيرۋستىق گەپاتيتىنىڭ تىركەلگەن 63 جاعدايىنىڭ ىشىندە 14 جاسقا دەيىنگى 9 بالا اۋرۋ جۇقتىرعان. ولاردىڭ بارلىعى ۆاكتسينا الماعانى انىقتالدى. ەلوردادا 2 جاستاعى بالالارعا ا ۆيرۋستىق گەپاتيتىنە قارسى يممۋنداۋ 2006 جىلدان باستاپ جەرگىلىكتى بيۋدجەت قاراجاتىنان جۇرگىزىلەدى. وسى كەزەڭنەن باستاپ ا ۆيرۋستىق گەپاتيتىنىڭ جيىلىگى 22,2 ەسە تومەندەدى. ينفەكتسيا وشاقتارىندا ۆاكتسيناتسيالاۋعا جاتاتىن 81 ناۋقاسپەن بايلانىس ورناتقانداردىڭ 73%-ى ەكپە العان, 4 448 بالا قۋىپ جەتىپ يممۋنداۋمەن قامتىلدى.
ەپيدەميولوگيالىق قولايسىزدىق كوكجوتەلمەن سىرقاتتانۋشىلىق بويىنشا بايقالادى. وسىنداي 80 جاعداي تىركەگەن. بارلىعى 14 جاسقا دەيىنگى بالالار, ونىڭ 86,2%-ى 0 جاستان 4 جاسقا دەيىنگى بالالار. ال 50%-ى 1 جاسقا دەيىنگى بالالارعا تيەسىلى. ناۋقاستاردىڭ 92%-ى ۆاكتسيناتسيالانباعان جانە بالالاردىڭ 8% – ۆاكتسيناتسيانىڭ تولىق كۋرسىنان وتپەگەن. بۇگىنگى تاڭدا بالالار جۇقپالى اۋرۋلار اۋرۋحاناسىندا بارلىعى 380 بالا: 56 بالا قىزىلشادان, 4 بالا كوكجوتەلدەن جانە 4 بالا ا ۆيرۋستىق گەپاتيتى بويىنشا ەم قابىلداۋدا.
بالالار اراسىندا قىزىلشامەن سىرقاتتانۋشىلىق تومەندەۋدە. ماسەلەن, قىزىلشانىڭ ورشەيتىن ۋاقىتى كۇزگى جانە قىسقى كەزەڭدە 200-گە جۋىق بالا اۋرۋحاناعا تۇسسە, بۇگىنگى كۇنى بۇل كورسەتكىش 4 ەسە تومەندەدى.
ەستەرىڭىزگە سالا كەتەيىك, ءجىتى رەسپيراتورلىق ۆيرۋستىق ينفەكتسيا (جرۆي) جانە قىزىلشا اۋرۋلارىنا مەديتسينالىق كومەك كورسەتۋ ءۇشىن ەمحانالاردا ساعات 08.00-دەن 20.00-گە دەيىن جۇمىس كۇندەرى جانە دەمالىس كۇندەرى سۇزگى كابينەتتەرى جۇمىس جاسايدى. سونداي-اق, ۇلتتىق كۇنتىزبە بويىنشا ۆاكتسينامەن باسقارىلاتىن ينفەكتسيالارعا قارسى جوسپارلى ۆاكتسيناتسيا جۇرگىزىلەدى. ەكپە كابينەتتەرى جۇمىس كۇندەرى ساعات 08.00-دەن 18.00-گە دەيىن جازىلۋسىز جۇمىس ىستەيدى.
