نۇرسۇلتان نازارباەۆ: استانا ناعىز جاسىل قالاعا اينالىپ كەلەدى
كەشە مەملەكەت باسشىسى نۇرسۇلتان نازارباەۆ ەلورداداعى بىرقاتار نىسانداردى ارالادى. استانا قالاسىنىڭ اكىمى يمانعالي تاسماعامبەتوۆ ەلباسىمەن بىرگە بولىپ, الداعى اتقارىلاتىن ىستەردىڭ بارىسىمەن تانىستىردى.
تالعامى بيىك تەاتر
استانانىڭ اسەم كەيپىن ايشىقتاندىرا تۇسەتىن كلاسسيكالىق وپەرا جانە بالەت تەاترىنىڭ ىرگەتاسى 2010 جىلدىڭ ناۋرىز ايىندا قالانعان بولاتىن. جالپى جوبا اۆتورلارى بۇل عيماراتتى قازاقتىڭ ۇلتتىق-ساۋلەت ونەرىنە ساي ەتىپ سالۋدى كوزدەگەن. 1250 ورىندىق تەاتردا تاعا پىشىندى كورەرمەن زالى بار. الەمدىك دەڭگەيدەگى مەرەكەلىك شارالاردى وتكىزۋگە تولىقتاي جاۋاپ بەرەتىن تەاتردىڭ تالعامى بيىك, مارتەبەسى وتە جوعارى بولماق. اتالمىش نىساندى مەردىگەر كومپانيالار جىل سوڭىندا پايدالانۋعا بەرۋدى مەجەلەپ وتىر.
Eurocopter – ەرەكشە زاۋىت
ەلباسى نازار اۋدارعان كەلەسى نىسان – Eurocopter تىكۇشاق قۇراستىرۋ زاۋىتى بولدى. مەملەكەت باسشىسى وسى زاۋىتتىڭ ماڭىزى جايىندا اڭگىمەلەدى.
«بۇل – تىكۇشاقتار قۇراستىرۋعا ارنالعان ءبىزدىڭ ەلىمىزدەگى العاشقى نىسان. قازىرگى كەزدە ءبىز جىلىنا 8-10 تىكۇشاق قۇراستىراتىن بولامىز. الداعى ۋاقىتتا وسى كاسىپورىننىڭ بازاسىندا ۇشاقتار قۇراستىرۋ جوسپارلانۋدا.
ءبىز وزىمىزدە بار تەحنيكانى باتىستىڭ وندىرىسىندەگى ۇشاقتارعا اۋىستىرۋعا ءتيىسپىز. قازاقستان ءوز تاريحىندا العاش رەت تىقۇشاقتار مەن ۇشاقتار قۇراستىراتىن مەملەكەتكە اينالىپ وتىر» دەپ اتاپ ءوتتى پرەزيدەنت.
دەمەك, ەندىگى جەردە وزىمىزدەن ەرەكشە تەحنيكا دايىنداپ شىعارۋدىڭ ساتى كەلىپ تۇر. اۋماعى 20 گەكتارلىق زاۋىت استانا قالاسىنىڭ اۋەجاي ماڭىندا ورنالاسقان. ۇشقىشتار مەن تەحنيكالىق قىزمەتكەرلەردى دايارلاپ شىعاراتىن اكادەميا بولاشاقتا وسى اۋماقتان ورىن تەبەدى.
كوپ سالالى «قوبىز سارايى»
ۇلتتىڭ مەرەيىن وسىرەتىن «قوبىز سارايى» كوپسالالى كونتسەرت زالى كەرەي مەن جانىبەك حاندار كوشەسى بويىندا تۇر. ەلباسى وسى عيماراتتى ارالاۋ بارىسىندا ۇلتتىق نىشان مەن قۇرىلىس ساپاسىنا ءمان بەردى. مۇنداعى 340 ورىنعا ەسەپتەلگەن كورەرمەن زالى قازاقتىڭ كيەلى شاڭىراعىن كوز الدىڭىزعا اكەلەدى. كونتسەرت زالىنان بولەك 170 ورىنعا ارنالعان مەيرامحانا, 80 ورىندىق ءدامحانا, فيتنەس ورتالىعى, جالپى اۋدانى 3000 شارشى مەتر بولاتىن كەڭسە-ساۋدا ورىندارى مەن تۋريزم, بيزنەس ورتالىقتارى كوپشىلىككە قىزمەت جاسايدى.
اۋقىمدى اۋرۋحانا
ەلباسىنىڭ تاعى ءبىر ارالاپ كورگەن نىسانى – الداعى قازان ايىندا ىسكە قوسىلاتىن قالالىق كوپ بەيىندى بالالار اۋرۋحاناسى. بۇل ءبىر اۋىسىمدا 250 كەلۋشىنى قابىلداي الاتىن كونسۋلتاتيۆتىك-دياگنوستيكالىق ەمحاناسى بار كوپسالالى بالالار اۋرۋحاناسى 56 مىڭ شارشى مەتر الاڭعا ورنالاسقان. 350 ەمدەۋ ورىنعا ارنالعان. وسى اۋرۋحانادا وڭتۇستىك كورەيا, يزرايل, اۆستريا, ليتۆا, بەلارۋس جانە رەسەي ەلدەرىندە وقىپ كەلگەن ماماندار جۇمىس ىستەيتىن بولادى. «مەملەكەت مەديتسينالىق سالانى دامىتۋعا كوپ كوڭىل ءبولىپ كەلەدى.
وسىنىڭ ارقاسىندا قازاقستاندىقتاردىڭ ورتاشا جاسى بەس جىلعا ارتتى. بۇرىندارى ەلىمىز حالقىنىڭ اراسىندا جۇرەك-تامىرلارى جۇيەسىنىڭ اۋرۋى ءبىرىنشى تۇراتىن. قازىر ءبىز قازاقستان كولەمىندە بارلىق تۇرلەرى بويىنشا جۇرەككە 10 مىڭ وپەراتسيا جاسايمىز. سونىمەن قاتار, مەن مىقتى ونكولوگيالىق ورتالىق قۇرۋ مىندەتىن قويدىم. ول ونكولوگيالىق اۋرۋدىڭ سانىن ازايتۋعا مۇمكىندىك بەرەتىن بولادى»,– دەدى نۇرسۇلتان ءابىشۇلى كوپسالالى بالالار اۋرۋحاناسىن ارالاۋ كەزىندە.
جاسىل قالاعا اينالامىز
استانانىڭ ماڭايىن ورماندى القاپقا اينالدىرۋ ماسەلەسىن وسىدان ون ءتورت جىل بۇرىن ەلباسىنىڭ كوتەرگەنى بەلگىلى. سودان بەرگى ۋاقىتتا ەلوردا اۋماعىنداعى ورماندى القاپ 60 مىڭ گەكتارعا ۇلعايعان. بۇل ءىس «جاسىل بەلدەۋ» باعدارلاماسى اياسىندا جۇزەگە اسىرىلىپ جاتىر. اتقارىلاتىن جۇمىستىڭ باسىم بولىگى «استانا ورمانى» جشس-ىنە جۇكتەلگەن.
كەشە مەملەكەت باسشىسى ەلوردانىڭ ورماندى القابىن دا ارالاپ, جۇزەگە اسىرىلىپ جاتقانجۇمىستارعا باعا بەردى.
«جاسىل القاپقا اينالدىرۋ ءىسى استانانى اۋىستىرعاننان كەيىنگى العاشقى جىلدا قولعا الىندى. ەلوردا مارتەبەسىن العانعا دەيىن تسەلينوگرادتىڭ اينالاسى اشىق بولعانى وزدەرىڭىزگە بەلگىلى. قاتتى جەل تۇرعان كەزدە قالانى شاڭ-توزاڭ باسىپ قالاتىن. ەكولوگيانى جاقسارتۋ جەل مەن بوراندى توقتاتۋ, سونداي-اق, قولايلى جاعدايدى قالىپتاستىرۋ ماقساتىندا مەن قالانى جاسىل القاپقا اينالدىرۋ تۋرالى مىندەت قويدىم. سونىڭ ناتيجەسىندە, 14 جىل ىشىندە استانانىڭ اينالاسىندا مىڭداعان گەكتارعا اعاش وتىرعىزىلدى. جاسىل بەلدەۋدى كەڭ اۋقىمدا جۇرگىزۋ ءۇشىن بۇل اۋماق ەلدەگى ءتورت ءىرى اۋىلعا تەڭ بولعانىن ايتقىم كەلەدى. وسى ورايدا ورمان ايماعىن بيولوگيالىق ار تۇرلەندىرۋدى ۇلعايتۋ – وندا قۇستار مەن جانۋارلار تۇرلەرىن وسىرۋ جونىندەگى جۇمىستار قاتار جۇرگىزىلدى. كەلەسى كەزەڭدە قالا تۇرعىندارىن تابيعاتتا مادەنيەتتى دەمالۋعا, ەلوردا ماڭىنان ساڭىراۋقۇلاق پەن جيدەك جيناۋعا تارتۋ ىسى قولعا الىنادى. سونىمەن قاتار, بۇگىندە قالا تۇرعىندارىنىڭ دەمالۋلارى ۇشىن قالانىڭ ىشىندە جاسىل القاپ وتىرعىزۋ جۇمىستارى جۇزەگە اسىرىلۋدا. قازىرگى كەزدە 16 مىڭ گەكتارعا جاسىل جەلەك وتىرعىزىلدى. بۇگىندە استانا ناعىز جاسىل قالاعا اينالىپ كەلەدى», – دەدى مەملەكەت باسشىسى.
جالپى بۇگىندە كۇنى ەلوردا ماڭايىنا 9,6 ميلليون اعاش وتىرعىزىلعان جانە 1,9 ميلليون كوشەتتەر بار. بىلتىر ورمانعا العاش رەت 300 قىرعاۋىل جىبەرىلدى. ولاردى وسىرىپ-باپتايتىن ورىندار دا تالاپقا ساي. وتكەن جىلى ەككەن شىرشالارىنىڭ بيىكتىگى- 10-15 سانتيمەترگە جەتىپتى.
وسىلايشا ەلباسى جاقىنداپ قالعان استانا كۇنى مەرەكەسى قارساڭىندا ەلوردامىزدىڭ الەۋمەتتىك-ەكونوميكالىق ماڭىزدى بىرنەشە نىساندارىن ارالاپ كوردى. اتقارىلعان جۇمىستاردى باعالادى. استانانىڭ وركەندەي بەرەتىنىنە سەنىم ءبىلدىردى.
ءامىرحان الماعانبەتوۆ
