استانا باسشىلىعىنىڭ ەلوردا كۇنى قارساڭىندا مەكەمەلەردىڭ جۇمىسىنا باعا بەرىپ, ۇزدىگىن انىقتايتىنى بار. داستۇردەن جاڭىلماي بيىل دا جالعاسىن تاپتى بۇل ءۇردىس. ەلوردا اكىمى يمانعالي تاسماعامبەتوۆ قالا اكتيۆىنىڭ الدىندا مەرەكەدەن مەرەكەگە دەيىن بەرەكەلى جۇمىس ىستەگەن مەكەمەلەردىڭ ىشىنەن ەڭ ۇزدىگىن انىقتاپ, سالتاناتتى جاعدايدا قۇتتىقتادى.
– استانا كۇنى – بار قازاقتىڭ ورتاق مەرەكەسى. دەسەك تە, قالانىڭ سۋىعىنا توڭىپ, ىستىعىنا كۇيىپ, كۇندەلىكتى كۇيبەڭ تىرشىلىگىنە ارالاسىپ جۇرگەن سىزدەر ءۇشىن بۇل مەيرامنىڭ ورنى دا, ورايى دا بولەك. سەبەبى, سىزدەر ەسەلى ەلوردانىڭ ەڭسەسىنىڭ كوتەرىلۋىنە, ءححى عاسىردىڭ شاھارىنا اينالۋىنا ماڭداي تەرىن توگىپ جۇرگەن ازاماتتاردىڭ بىرىسىزدەر, – دەدى استانا اكىمى يمانعالي تاسماعامبەتوۆ قالا اكتيۆىن قۇتتىقتاۋ كەزىندە.
قالالىق مەكەمەلەر مەن كاسىپورىنداردىڭ جىل ون ەكى اي ىستەگەن جۇمىسىنا باعا بەرىپ, كوپ ىشىنەن ءبىرلى-ەكىسىن عانا «ۇزدىك» دەپ تانۋ وڭاي شارۋا ەمەس. سەبەبى, ەلوردانىڭ قاي مەكەمەسىن الساق تا جۇيەلى جۇمىس ىستەپ جاتىر. «يلەگەندەرى – ءبىر تەرىنىڭ پۇشپاعى». ەلباسى مەن ەلدىڭ ەلوردانى دامىتۋ ماقساتىندا العا قويىپ وتىرعان مىندەتتەرى مەن تاپسىرمالارىن مۇلتىكسىز ورىنداۋ.
جالپى, ۇزدىك مەملەكەتتىك مەكەمە مەن كاسىپورىننىڭ جۇمىسى 10 نەگىزگى ولشەم بويىنشا باعالاندى. ول دامۋ جوسپارىنان باستالىپ, بيۋدجەتتىك قاراجاتتىڭ يگەرىلۋىمەن اياقتالادى. ەڭ باستىسى, جۇمىستىڭ ساپالى ناتيجەسىنە باسا ءمان بەرىلدى. بۇعان قوسا, قالا باسشىلىعى مىقتىلاردى انىقتاۋدا تۇرعىندار پىكىرىنە دە قۇلاق استى. استانا قالاسىنىڭ رەسمي سايتىنا كىرىپ, قالالىقتار قالاعان مەكەمەگە ءوز داۋىسىن بەردى. وعان قوسا, اكىمدىك سايتىنا ەلوردالىقتاردان كەلىپ تۇسەتىن ءوتىنىش حاتتار دا نازارعا الىندى. سونىمەن, ۇزدىكتەرگە كەلسەك, كاسىپورىنداردىڭ ىشىنەن «استانا-تازالىق» جشس مەن «استانا-كوگالداندىرۋقۇرىلىسى» اق ۇجىمى ۇزدىك اتاندى. كۇندىز-ءتۇنى ءبىر تىنباي, شاھار تازالىعى ءۇشىن ەڭبەك ەتىپ جۇرگەن مەكەمەلەر بۇل ماراپات-ماداققا لايىق. باس قالانىڭ كوشەلەرىن ساپ تۇزەگەن ساربازداياعاشتارى مەن ۇزاتىلاتىن قىزدىڭ جاساۋىنداي قىزىلدى-جاسىلدى گۇلدەرىن كۇتىپ-باپتاۋمەن اينالىساتىن باعبانداردىڭ بۇل جەڭىسى – ەڭبەگىنىڭ جەمىسى. تەك بيىلدىڭ وزىندە «استانا-كوگالداندىرۋقۇرىلىسى» اق قالا اۋماعىندا 40 مىڭ اعاش وتىرعىزۋدى دىتتەپ وتىر. بۇعان قوسا, 8 ميلليون تۇپتەن استام گۇل ەگىلدى.
بيىلعى بايقاۋ بىرنەشە وزگەرىستەرگە تولى بولدى. ادەتتە, «ۇزدىك» اتاۋ تەك ءبىر عانا مەكەمەگە بەرىلەتىن. بيىل بىردەن ءۇش مەملەكەتتىك ورگان جەڭىمپاز اتاندى. ولار – تۋريزم, دەنە شىنىقتىرۋ جانە سپورت باسقارماسى, ەكونوميكا جانە بيۋدجەتتىك جوسپارلاۋ باسقارماسى مەن ىشكى ساياسات باسقارماسى.
– بيىلعى پرەزيدەنت اكىمشىلىگىنىڭ بەرگەن باعاسى بويىنشا استانا تۇڭعىش رەت ستراتەگيالىق جوسپارلاۋدان رەسپۋبليكادا ءبىرىنشى كورسەتكىشكە قول جەتكىزدى. بۇل – ەكونوميكا جانە بيۋدجەتتىك جوسپارلاۋ باسقارماسىنىڭ جەتىستىگى. دامۋ باعدارلاماسىنىڭ ناتيجەلى ورىندالۋى دۇرىس جوسپارلاۋعا بايلانىستى. بىزدىڭ بارلىق پراكتيكالىق جۇمىسىمىز وسى باسقارمادا باستالادى. سوندىقتان ءبىزدىڭ جۇمىستىڭ ناتيجەلىگى ولاردىڭ كاسىبي دەڭگەيىنە, ەكونوميكالىق پەرسپەكتيۆانى قانشالىقتى كورە الاتىندىعىنا تاۋەلدى, – دەدى اكىم.
تۋريزم, دەنە شىنىقتىرۋ جانە سپورت باسقارماسى ونلاين-داۋىس بەرۋ ناتيجەسىندە ەڭ كوپ داۋىس جيناعان. ءارى 2011 جىلعى بيۋدجەتتى 100 پايىزعا يگەرىپ, تابىستى ناتيجەگە قول جەتكىزدى. ايتقانداي-اق, بىزدەگى جاڭا سپورت نىساندارىنىڭ سانىندا شەك جوق. وتكەن جىلى باسقارما 43 حالىقارالىق ءىس-شارا وتكىزدى. بيىل لوندونداعى وليمپيادا ويىندارىندا ەل نامىسىن قورعايتىن جەرلەستەرىمىزدىڭ اراسىندا 15 سپورتشىدان قۇرالعان استانا كومانداسى بار. بۇل – رەسپۋبليكا بويىنشا ەكىنشى كورسەتكىش.
كەزەك ىشكى ساياسات باسقارماسىنا كەلگەندە اكىم: «قازىرگى تاڭدا اكىمدىكتەر كۇندەلىكتى شارۋاشىلىق قىزمەتتەرىنەن باسقا يدەولوگيالىق, تۇسىندىرۋشىلىك جانە اقپاراتتىق جۇمىستارعا كوپ كوڭىل بولەدى. جاستار ساياساتى دا – وتە وزەكتى تاقىرىپ. وتكەن جىلى باسقارما كوپتەگەن ماڭىزدى, ءىرى ءىس-شارالار وتكىزدى, مەكەمە ۇجىمى وعان ەلەۋلى ۇلەس قوستى. ىشكى ساياسات باسقارماسىنىڭ جۇمىسى – بولاشاققا ينۆەستيتسيا, ونىڭ ناتيجەلەرىن 10-15 جىلدان كەيىن كورۋگە بولادى. ءبىزدىڭ قوعامنىڭ, مەملەكەتتىڭ بولاشاعى ەلدىڭ ستراتەگيالىق دامۋ مىندەتتەرىنە سايكەس باسقارما قانشالىقتى ءوز جۇمىسىنا جاۋاپتى قارايتىنىنا بايلانىستى» دەدى.
بايقاۋدىڭ تاعى ءبىر جاڭالىعىنا كەلسەك, بيىل ≪ۇزدىك اۋدان≫ اتالىمى بولمادى. بۇل رەتتە اكىم اۋدان اكىمدىكتەرىنىڭ اتقارىپ جاتقان جۇمىستارى كوپ ەكەنىن, سول سياقتى ورىندالۋعا ءتيىستى شارۋانىڭ دا شاش-ەتەكتەن ەكەنىن ايتتى.
اينۇر شوشاەۆا
