ەل نامىسىن قورعايتىن ساڭلاقتار قاتارىنداعى ەلوردالىق سپورتشىلارعا دا ارتىپ وتىرعان ءۇمىتىمىز زور. سولاردىڭ ءبىرى – ايەلدەر كۇرەسىنەن سىنعا تۇسەتىن جۇلدىز ەشيموۆا.
بۇگىنگى تاڭدا قازاقستاننىڭ ەڭبەك سىڭىرگەن سپورت شەبەرى اتانىپ جۇرگەن جۇلدىز ەشيموۆا بوز كىلەمگە جەتى جاسىندا كەلگەن. تابيعاتىنان ەلگەزەك بولىپ تۋعان قارشاداي قىز كۇرەس مەكتەبىن قىرعىز ەلىنىڭ تالاس ەلدىمەكەنىندە باستاعان. بىراق وندا بالالار جارىستارىندا عانا كوزگە ءتۇسىپ ۇلگەردى.
جۇلدىزدىڭ باعىن اشقان ليتۆادا وتكەن جاسوسپىرىمدەر اراسىنداعى حالىقارالىق تۋرنير بولدى. وسى جارىسقا قازاقستان كومانداسىن اپارعان تاجىريبەلى باپكەر سارجان جاقسىبەكوۆ بوز كىلەمدە بۇلقىنعان جۇلدىزعا ەرەكشە نازار اۋدارادى.اڭگىمەگە تارتادى. اكەسى قازاق, اناسى قىرعىز دارىندى قىز ءبىزدىڭ باپكەردىڭ اعالىق ۇسىنىس-تىلەگىن قۋانا-قۋانا قابىلدايدى. سودان بەرى قازاقستان تۋى استىندا كۇرەسە باستايدى. بىلىكتى باپكەر جاپ-جاس قىزدىڭ بويىنداعى تالانتتى تانىعانى سونداي, تۋعان قارىنداسىنداي قامقورلىعىنا الىپ, ماقساتتى جاتتىعۋلارعا كىرىسەدى.
ءۇمىت پەن سەنىم كوپ كۇتتىرگەن جوق. جۇلدىز ەشيموۆا جاستار اراسىندا قازاقستاننىڭ چەمپيونى اتاعىن جەڭىپ الدى. ازيا بىرىنشىلىگىندە دە جۇلدەگەرلەر قاتارىنان كورىندى. اراعا جىل سالىپ ەرەسەكتەر جارىسىنا دا كىرىسىپ كەتتى. 2010 جىلى جۇلدىز كىشى الەم چەمپيوناتىنا بالاناتىن يۆان يارىگين اتىنداعى گران-پري تۋرنيرىنە قاتىسىپ, ەكىنشى ورىنعا يە بولدى. ازيا بىرىنشىلىگىندە دە وسىنداي جەتىستىككە جەتتى.48 كەلى سالماقتا تاعى دا الدىنا جان سالمادى. قۇرلىق چەمپيوناتىندا كۇمىس مەدال الدى.
2004 جىلعى افينى وليمپياداسىنان باستاپ ايەلدەر كۇرەسىنەن سايىستار وتكىزىلە باستادى. سودان بەرى جۇلدىز بەن ونىڭ باپكەرى سارجان جاقسىبەكوۆ وليمپيادا ويىندارىنا قاتىسۋ ماقساتىندا تەر توكتى. ول ءۇشىن الدىمەن 2011 جىلى تۇركيادا وتەتىن الەم چەمپيوناتىندا ءساتتى ونەر كورسەتۋ كەرەك بولاتىن. باپكەر مەن شاكىرتتىڭ ماقساتتى دايىندىعى ەش كەتپەدى. ءۇمىت اقتالدى. جۇلدىز ەشيموۆا الەم چەمپيوناتىنىڭ قولا جۇلدەسىنە قول جەتكىزدى. بۇل استانالىق بالۋان قىزدىڭ لوندون ويىندارىنا ليتسەنزيا ۇتىپ العان باقىتتى جارىسى بولدى.
– مەن ومىرىمدەگى ەڭ ۇلكەن ماقساتىما جەتتىم. وليمپيادا ويىندارىنا قاتىساتىن بولدىم. ال ەندى وسى جارىستا قازاقستاننىڭ تۋىن بيىكتەن جەلبىرەتسەم, ياعني جۇلدەگەر اتانىپ كەلسەم, بۇل مەنىڭ ومىرىمدەگى ەڭ باقىتتى ءسات بولار ەدى. مەن سول ءۇشىن بار كۇشىمدى جۇمسايتىن بولامىن, – دەيدى بوز كىلەمنەن باقىتىن ىزدەگەن جۇلدىز قارىنداس.
عالىم قوجابەكوۆ
