اباتتاندىرۋ ەرەجەلەرىن بۇزعان 12 ەلوردالىق بازارعا 805 980 تەڭگە كولەمىندە ايىپپۇل سالىندى
الاش تاسجولىنىڭ بويىنداعى بازارلاردىڭ اۋماعىن تەكسەرۋ بارىسىندا بىرقاتار ورەسكەل زاڭ بۇزۋشىلىقتار انىقتالدى. جالپى, ەلوردالىق بازارلار ماڭايىندا بەيساۋات شاشىلىپ جاتقان قوقىستى ءجيى كورەمىز.
ايتالىق, الاش تاسجولى 29/2 مەكەن جايىندا ورنالاسقان «اسەم» بازارىنىڭ جانىنان زاڭسىز قوقىس ورىندارى انىقتالعان. تاعام قالدىقتارىن زاڭمەن بەلگىلەنگەن تارتىپتە جابدىقتالعان پوليگونعا شىعارۋدىڭ ورنىنا كاسىپكەرلەر ونى بازار ماڭىنا توگىپ وتىرعان. قوقىس تاستاپ, ونى ورتەگەن كاسىپكەرگە, قر اقبك 505-بابىنىڭ 2-بولىمىنە سايكەس 84 840 تەڭگە مولشەرىندە ايىپپۇل سالىندى.
سونداي-اق, «الاش» بازارى مەن «جايلاۋ» جشس مال سويۋ پۋنكتىنىڭ اۋماعىنا قوقىس تاستاعان ك. دەگەن كاسىپكەر دە قر اقبك 505-بابىنىڭ 2-بولىمىنە سايكەس اكىمشىلىك جاۋاپكەرشىلىككە تارتىلدى. وعان 84 840 تەڭگە مولشەرىندە ايىپپۇل سالىندى.
بۇگىنگى تاڭدا تىركەلگەن زاڭ بۇزۋشىلىقتار مەن قوقىس ورىندارى جويىلدى.
ايتا كەتەيىك, جىل باسىنان بەرى استانا قالاسىنىڭ ءىىد جەرگىلىكتى پوليتسيا قىزمەتىمەن اباتتاندىرۋ ەرەجەلەرىن بۇزعانى ءۇشىن 12 بازارعا 805 980 تەڭگە مولشەرىندە ايىپپۇل سالىنعان.
