دۇنيەدەن جۇرتىنا قالتقىسىز قىزمەت ەتكەن كورنەكتى قالامگەر, ارداقتى ازامات, حالىقارالىق «الاش» ادەبي سىيلىعىنىڭ لاۋرەاتى ديداحمەت ءاشىمحانۇلى وزدى.
ءاپ دەگەننەن ادەبيەتكە وزىنە ءتان سوقپاعىمەن كەلىپ, قازاق رۋحانياتىنىڭ كوسەگەسىن كوگەرتىپ, ءورىسىن كەڭەيتىپ, ءورنەكتى قالامىنان تۋعان كوركەم شىعارمالارى ارقىلى قالىڭ وقىرماننىڭ ىقىلاسىنا بولەنگەن اياۋلى ازاماتتىڭ بولمىسى دا بەكزاتتىق پەن تەكتىلىكتىڭ ەرەن ۇلگىسىندەي ەدى. اياۋلى اعانىڭ, ءبىزدىڭ «استانا اقشامى» گازەتىندە دە ايشىقتى قولتاڭباسى قالدى. ەكى عاسىر توعىسار شاقتا ەلورداعا كەلىپ, باس رەداكتوردىڭ ءبىرىنشى ورىنباسارى بولىپ, قىزمەت ەتكەن ءۇش ايدا باسىلىمنىڭ وتكىرلىگى الماستىڭ جۇزىندەي جارقىراپ, ويلى وقىرمان نازارىن اۋداردى. سول كەزدە «باعان باسىندا جانعان جىگىت», «گۇلجانعا سەنسەك, تۇران بيدەن تۇڭىلەسىز», «وتىز ءۇيدىڭ ويبايى…» دەگەن سياقتى جالپاق جۇرتتى ەلەڭ ەتكىزگەن وتتى دۇنيەلەر جارىق كوردى. مۇنىڭ بارلىعى اقجۇرەك تۇلعانىڭ باتىلدىعى مەن شىندىقتى ءپىر تۇتاتىن ازاماتتىق بيىك بولمىسىن كورسەتتى. قاشان دا قانجارداي قايراۋلى قالامىمەن گازەتكە ارالاسىپ, «ءوز ءسوزىم وزىمدىكى», «تازشا بالانىڭ تاماشاسى» دەگەن ايداردى ەنگىزىپ, قالا ومىرىنەن قالتارىستا قالعان جايتتەردى تۇيرەدى. «سارى ساماۋىر» سىندى تاماشا اڭگىمەسىمەن ادەبيەتكە نىق ەنگەن ارداقتى تۇلعا ومىردەن وتكەنشە قازاق دەگەن ۇلتتىڭ ۇلىلىعى مەن قۇندىلىعىن جازۋدان ءبىر ساتتە اينىعان جوق. ۇلكەنگە دە, كىشىگە دە بايىپتى مىنەزىمەن, پاراساتتى بولمىسىمەن جانى جاقىن تامىرلاس, ەلدەس بولا ءبىلدى.
حالىقتىڭ قالتايى دۇنيەدەن وزعاندا: «جاقسى اعانىڭ الدىن كوردىك. جازمىشتان بىزگە بۇيىرعان نەسىبە دە وسى بولار» دەپ جازعان ەكەن دارىندى جازۋشى. وسى ءسوزدى ەندى اسىل اعانىڭ وزىنە دە ارناۋعا بولادى. باقۇل بولىڭىز, ارداقتى ديداش اعا!
«استانا اقشامى» گازەتىنىڭ ۇجىمى
