قر ۇلتتىق اكادەميالىق كىتاپحانادا قازاقستان جازۋشىلار وداعى مەن «BELES» قۇرىلىس كومپانياسى ۇيىمداستىرعان «جاس قالام – جاڭا رومان» جوباسىنىڭ گرانت يەگەرى, جاس قالامگەر قانات ابىلقايىردىڭ «اعىراپتاعى اتى جوق ادام» اتتى كىتابىنىڭ تانىستىرىلىمى ءوتتى.
ءىس-شاراعا پارلامەنت سەناتىنىڭ دەپۋتاتى, جۋرناليست نۇرتورە ءجۇسىپ, ءماجىلىس دەپۋتاتى, اقىن قازىبەك يسا, ءماجىلىس دەپۋتاتى, جۋرناليست جاناربەك ءاشىمجان, جازۋشى, قر مەملەكەتتىك سىيلىقتىڭ لاۋرەاتى الىبەك اسقار, سىنشى امانگەلدى كەڭشىلىكۇلى, حالىقارالىق «الاش» ادەبي سىيلىعىنىڭ يەگەرى باقىت بەدەلحان, جازۋشىلار وداعىنىڭ استانا قالالىق فيليالىنىڭ ديرەكتورى داۋلەتكەرەي كاپۇلى جانە ەلوردالىق زيالى قاۋىم وكىلدەرى قاتىستى.
«ەلىمىزدە قازاق ادەبيەتىنە, ۇلت ادەبيەتىنە جانى اشيتىن كاسىپكەر ازاماتتار بار. سولار ءۇش رومانعا قارجى ءبولىپ, تالانتتى جازۋشىلارعا جاعداي جاسادى. سونىڭ ءبىرى – جازۋشى قانات ابىلقايىر. ول تاريحي تاقىرىپتاردى جازدى.
«اعىراپتاعى اتى جوق ادام» رومانىندا ادامنىڭ سەزىمىن قوزعالىسقا كەلتىرەتىن ەلەمەنتتەر بار. جازۋشىنىڭ اڭگىمەشىل شەبەرلىگىنە ريزا بولدىم» دەيدى سىنشى امانگەلدى كەڭشىلىكۇلى.
ال كىتاپ اۆتورى اعىراپ سوزىنە توقتالىپ ءوتتى.
«كوپ ادام «اعىراپ دەگەن نە؟» دەپ سۇراپ جاتىر. دىندە جۇماق پەن توزاق دەگەن ۇعىم بار. يسلام دىنىندە جۇماق پەن توزاقتىڭ ورتاسىندا ءبىر مەكەن بولادى. ول جەردە جاقسىلىعى مەن جاماندىعى تەڭ تۇسكەن, ياعني جۇماققا دا, توزاققا دا جىبەرۋگە كەلمەيتىن ادامدار قالادى دەگەن تۇسىنىك بار. وسىعان قاتىستى اعىراپ دەگەن سۇرە دە بار. شىعارماداعى وقيعا اعىراپ دەگەن قالادا وتەدى» دەيدى جازۋشى قانات ابىلقايىر.
