قوزى مەن بايانداي, جىبەك پەن تولەگەندەي, ەڭلىك پەن كەبەكتەي قوسىلماي, ارماندا كەتكەن عاشىقتار قانشاما… ارعىسىن ايتپاعاندا, جاڭا عاسىر باسىندا شەتەلدە «بولاشاق» باعدارلاماسىمەن ءبىلىم الىپ جۇرگەن اقتوبەلىك اينۇر اتتى قىز بەن جامبىلدىق بولات ەسىمدى ەكى جاس ۇيلەنبەككە ۋادەلەسىپ, «باكۋ-اقتاۋ» رەيسىمەن ەلگە قايتىپ كەلە جاتقاندا ۇشاق اپاتىنا ءتۇسىپ, قايعىلى قازاعا ۇشىرادى. اپاتتان كەيىن ءمايىت ىزدەگەن سۇڭگۋىرلەر كاسپي تەڭىزىنەن بولات پەن اينۇردىڭ دەنەلەرىن قۇشاقتارى اجىراماعان كۇيلەرىندە تاۋىپ العان دەگەن اقپارات تارادى. ءبىر جىلدان كەيىن ءمۇسىنشى قادىرحان كاكىموۆ قوس عاشىقتىڭ قۇرمەتىنە ەسكەرتكىش قۇيىپ, تارازدىڭ ماحاببات اللەياسىنا ورناتتى.
استانا قالاسى اكىمدىگىنىڭ «جاستار» تەاترى پرەمەراسىن ۇسىنعان اقليما ءيسمايلدىڭ «سۇيىكتى ەتشى, سۇيىكتىم!» ليريكالىق دراماسى ماحاببات قادىرىن بىلۋگە, وتباسى قۇندىلىقتارىن قاستەرلەۋگە ۇندەيدى. تەاتر رەجيسسەرى نۇرفات ۆاحيتوۆ ساحنالاعان اتالمىش تۋىندى پاراللەليزمگە نەگىزدەلگەن. بولات پەن اينۇردى بەكەردەن بەكەر ەسكە المادىق. قويىلىمعا ارماندا كەتكەن قوس عاشىق بەينەلەرى كىرىكتىرىلگەن. اسپانداعى عاشىقتار بولات (اكتەر نۇربەك ادىلبەك) پەن اينۇر (پەريزات جاردەموۆا) جەردەگى ەرلى-زايىپتىلاردى ءبىر-ءبىرىن قادىرلەۋگە, وتباسىندا بىرلىك-بەرەكەنى ساقتاۋعا شاقىرادى.
قويىلىمدا كوپ كەيىپكەر جوق. ەرلى-زايىپتى جومارت (ەلدوس شايكەنوۆ) پەن جامالدىڭ (شەحنازا قىزىحانوۆا) وتباسىندا ەرىنىڭ ايەلىنىڭ كوزىنە ءشوپ سالۋدىڭ سالدارىنان ءبىر كۇندە داۋىل تۇرادى. وعان سەبەپ, الينا (ايگەرىم تۇسىپبەكوۆا) ەسىمدى تۇرمىسىن تۇزەيمىن دەپ ۋاقىتىن وتكىزىپ العان قىز. ءيا, بۇل كۇنى الينانىڭ باسىندا كەڭ باسپانا, كولىك, ادەمى جيھازدار, ءبارى بار. تەك ماحاببات جوق. سونىڭ ورنىن ول جومارتتىڭ باسىن اينالدىرىپ, تولتىرعىسى كەلدى. بىراق بىرەۋدىڭ وتباسىن ويرانداپ, باقىتتى بولمايسىڭ. قويىلىمنىڭ ءبىر يدەياسى سوندا جاتىر. اليناعا جۇبايىمەن اجىراسقان اسحات ء(ابۋتالىپ امىرە) عاشىق بولادى. اقىرى ەكەۋى ءتىل تابىسادى دا. ال جومارت اداسقانىن ءتۇسىنىپ, ءوز وتباسىنا قايتىپ كەلەدى.
