استاناداعى وقۋشىلار سارايىندا كورنەكتى جازۋشى, دراماتۋرگ دۋلات يسابەكوۆتىڭ «التىن تورداعى توتى» پەساسىنىڭ جەلىسىمەن «اكتريسا» دراماسىنىڭ پرەمەراسى جاڭاشا سيپاتتا ءوتتى. شىعارمانى «ا.ي.» مۋزىكالىق تەاترىنىڭ كوركەمدىك جەتەكشىسى, رەجيسسەر قۋاندىق قاسىموۆ ساحنالادى. ينستسەنيروۆكاسىن اتالمىش تەاتردىڭ ادەبيەت ءبولىمىنىڭ مەڭگەرۋشىسى نازگۇل سارىباەۆا جاسادى. ال, باستى ءرولدى ايگۇل يمانباەۆانىڭ ءوزى سومدادى.
استانالىقتار تالاي تەاترلاردا ساحنالانعان اتالمىش درامانى العاش رەت تاماشالاماعانىن ايتا كەتەيىك. وسىدان بىرنەشە جىل بۇرىن «اكتريسانى» ق. قۋانىشباەۆ اتىنداعى مەملەكەتتىك اكادەميالىق قازاق مۋزىكالىق دراما تەاترىنىڭ رەجيسسەرى نۇرلان جۇمانيازوۆ قويعان بولاتىن. ال, بۇل جولى قويىلىمنىڭ ىقشامدالعان نۇسقاسى كورەرمەنگە ۇسىنىلدى.
مۇندا باستى ءرولدى سومدايتىن كەيىپكەر ومىردەگى ءوزىن-ءوزى وينايدى دەپ ايتۋعا بولادى. ياعني, ساحناداعى ءومىرى, ونىڭ سىرتىنداعى تىرشىلىگى بارشا ءسۇيىنىشى, كۇيىنىشىمەن بىرگە كورىنىس تابادى. باسقاشا ايتساق, اكتريسا بەينەسى ارتىستىك جولدى تاڭداعان ايەل ادامداردىڭ جيىنتىق وبرازى ىسپەتتەس. ماسەلەن, قويىلىمدا شىرقالاتىن «گاككۋ» انىنەن كوز الدىمىزعا كۇلاش بايسەيىتوۆا ەلەستەيدى. الايدا, ايگۇل يمانباەۆا باس كەيىپكەردىڭ بەينەسىن ءوز ومىرىنە مەيلىنشە جاقىنداتقان. درامادا شىرقالاتىن اندەر دە كوبىنەسى ونىڭ ءوزىنىڭ رەپەرتۋارىنان الىندى.
قويىلىمدى تاماشالاعان دۋلات يسابەكوۆتىڭ ءوزى دە بۇعان نازاردى جەتىلدىرەتىن تۇستارىن دا اتاپ كورسەتتى. «دراماتۋرگيا رەتىندە, درامالىق سپەكتاكل رەتىندە بايتەن وماروۆ قويعان «اكتريسادان» ارتىعى جوق. بۇگىنگى قويىلىمدى ايگۇل يمانباەۆانىڭ بەنەفيسى دەپ قاراۋ كەرەك. الايدا, كوپتەگەن كورەرمەندى جىلاتاتىن ستسەنالار بۇگىن كورىنبەي قالعانى وكىندىرەدى. بۇل سپەكتاكل ءوزىنىڭ بيىمەن قۇندى. بىراق, ايگۇل سىلبىر قيمىلدايدى, قيمىلداردى ءسال تەزدەتۋ كەرەك. قويىلىمدا بيزنەسمەننىڭ قايدان شىعا كەلگەنى دە تۇسىنىكسىز. ءاربىر رولدە بيوگرافيا بولۋى كەرەك. ول دەگەنىمىز – كەيىپكەر قايدان پايدا بولدى, وعان نە كەرەك كورەرمەنگە ايقىن بولۋى ءتيىس. ال مۇندا ديداكتيكاعا ۇرىنعانسىزدار. دەسەك تە, ءبىر اكتريسانىڭ تەاترىن كوردىك. ايگۇل يمانباەۆا باستى ءرولدى سومداماسا, ونى قويۋعا رۇقسات بەرمەس ەدىم. ونىڭ تەاترىنىڭ دا بولاشاعى زور, باسقا تەاترلارعا ۇقسامايتىنىنا بۇگىن كوزىم جەتتى» دەپ تۇيىندەدى ءسوزىن د. يسابەكوۆ.
امانعالي قالجانوۆ
