وتكەن جۇما كۇنى ۇلتتىق مۋزەيدە حالىق اقىندارى, «پاراسات» وردەنىنىڭ يەگەرلەرى قونىسباي ءابىل, اسەلحان قالىبەكوۆا جانە «قۇرمەت» وردەنىنىڭ يەگەرى ءاسيا بەركەنوۆا ەلوردالىق وقىرماندارىمەن قاۋىشتى. وڭتۇستىك قازاقستان مەن قوستاناي وبلىستارىنىڭ استاناداعى كۇندەرىنىڭ اياسىندا ۇيىمداستىرىلعان باسقوسۋعا ايتىس پەن ولەڭ سۇيەر قاۋىم كوپ جينالدى.
جيىندى قوستاناي وبلىسىنىڭ اكىمى ارحيمەد مۇحامبەتوۆ اشىپ, كەش يەلەرىنە ىزگى تىلەگىن جەتكىزدى. «مەملەكەت باسشىسى نۇرسۇلتان نازارباەۆتىڭ سارابدال ساياساتى ەكونوميكامىزبەن قوسا, مادەنيەتىمىزدىڭ دە ورىستەي دامۋىنا ىقپال ەتىپ كەلەدى. بۇل جولدا قازىر تورىمىزدە وتىرعان حالىق اقىندارىنىڭ سىڭىرگەن ەڭبەكتەرى وراسان زور ەكەنىن ايتۋعا ءتيىسپىز. ولار, اسىرەسە, سەكسەنىنشى جىلدارى ايتىس ساحناسىنا جارق ەتىپ شىعىپ, كۇنى بۇگىنگە دەيىن ءۋالى, دۋالى سوزدەرىن ءتۇرلى مىنبەرلەردەن حالىققا جەتكىزۋدە. ولەڭمەن ورىلگەن شۋماقتارى قاي ۋاقىتتىڭ دا جادىنان وشپەك ەمەس» دەپ اعىنان جارىلعان ايماق باسشىسى قونىسباي ءابىل مەن ءاسيا بەركەنوۆانى «قوستاناي وبلىسىنا – 80 جىل» مەرەكەلىك مەدالىمەن ماراپاتتاپ, اسەلحان قالىبەكوۆاعا سىي-سياپات جاسادى.
باسقوسۋدا بەلگىلى ساتيريك كوپەن امىربەك ءسوز سويلەپ, ءۇش اقىننىڭ وتكەن ومىرىنەن تارتىمدى ەستەلىكتەر اڭگىمەلەدى. «قونىسباي, ءاسيا, اسەلحان – قازاق ءۇشىن وشاقتىڭ ءۇش تۇعىرى سەكىلدى. ايتىس ونەرىنىڭ ولكەسىنە بىرگە قادام باسىپ, بىرگە ارىنداعان بۇلاردىڭ قاي-قايسى دا ۇلت مۇددەسى ءۇشىن تەر توكتى, ءسوز سۋىردى, قالام ۇستادى دەسەك, البەتتە, قاتەلەسپەيمىز. ءاسيا مەن اسەلحان – ايتىستىڭ قوس قارلىعاشى, ەكەۋى ءبىر جىلى, ءبىر ايدا, ءبىر كۇندە تۋعان. ءتىپتى, «حالىق اقىنى» اتاعىن ءبىر كۇندە العانىن بىرەۋ بىلسە, بىرەۋ بىلمەس. ءاسيانىڭ سىرتى بەتپاق بولعانىمەن, ءىشى – اپپاق. «ءاي-ءاي» اقىن اتانعان قونىسبايدىڭ قولتاڭباسى وزىنشە بولەك. ۇشەۋى دە قازاق ونەرىنىڭ قازانىندا قايناپ, ايتىستى ىلگەرىلەتۋگە وراسان كۇش سالعان» دەدى ساتيريك.
شارا بارىسىندا جاس ايتىسكەرلەر مارعۇلان وسپان مەن داۋرەن ىسقاق كەزدەسۋ يەلەرىنە جىردان شاشۋ شاشىپ, كوپشىلىكتىڭ ىقىلاسىنا بولەندى. ال اقىندار دومبىرامەن قوسىلىپ, حالىقتى جىرمەن سۋسىنداتتى. سونىمەن قاتار, ايتىستىڭ داۋىرلەگەن شاقتارىنان ەستەلىكتەر ايتىپ, قىزىقتى اڭگىمەلەر ءوربىتتى. ۇلكەن ەكراننان كورسەتىلگەن دەرەكتى فيلم دە 1980-90 جىلدارداعى ايتىستان سىر تارقاتتى.
اسحات رايقۇل
