مەرەكە كۇندەرى استانا قالاسى اكىمىنىڭ كۋبوگى ساراپقا سالىنعان «ءبارى دە ءان شىرقايدى» اتتى كاراوكە چەمپيوناتىنىڭ اقتىق سىنى ءوتتى.
«ءبارى دە ءان شىرقايدى» كونكۋرسى ەلوردا كۇنىنە وراي وسىمەن ەكىنشى رەت ۇيىمداستىرىلدى. جوبانىڭ يدەياسى دا كەزدەيسوق تۋعان كورىنەدى. بايقاۋدىڭ قويۋشى رەجيسسەرى باقىتجان تاجينوۆ: «شىعارماشىلىق ورتا بولعان سوڭ, دوستارمەن كاراوكەگە ءجيى بارامىز. نەشە ءتۇرلى داۋىستاردى ەستيمىز. جاندى داۋىستا ءاندى شىن جۇرەگىمەن ادەمى جەتكىزە بىلەتىندەر كوپ كەزدەسەدى. وسى دارىنداردىڭ باسىن بىرىكتىرىپ, ۇلكەن ساحناعا شىعارساق دەپ ويلادىم» دەيدى. مۇنداي ۇسىنىستى قالا اكىمدىگى ءبىراۋىزدان قولداعان. بىلتىر چەمپيونات ونەرسۇيەر قاۋىم اراسىندا جىلى قابىلدانىپ, وسى جىلى قاتىسۋعا نيەت بىلدىرۋشىلەر قاتارى ەداۋىر كوبەيىپتى.
بايقاۋ شارتى بويىنشا چەمپيوناتقا 16-75 جاس ارالىعىنداعى ونەرپازدار قاتىسا الادى. باسقا بايقاۋلاردان ەرەكشەلىگى, بۇل جەردە كاسىبي, اۋەسقوي ءانشىلەردى بولەك باعالايدى. «الاۋ», «سازدى جۇرەك» جانە «جاسStar» توبى قۇرىلعان. سوڭعىسى مۋزىكالىق ءبىلىمى بار 30-عا دەيىنگى انشىلەردى قامتيدى. ءبىر قىزىعى, جۇلدەدەن ۇمىتتىلەردىڭ ەڭ ۇلكەنى – 65 جاستاعى اجە بولىپ شىقتى.
15 مامىردا وتكەن كاستينگكە 250-گە جۋىق ۇمىتكەر قاتىسىپ, 60 ادام ىرىكتەلگەن بولاتىن. ەكىنشى كەزەڭدە 15 ءانشى بايقاۋمەن قوش ايتىستى. قالعانى بىرنەشە اپتا ۇستازداردان ۆوكال بويىنشا ساباق الىپ, ساحنا شەبەرلىگىن ۇيرەندى.
شيرەك فينالدا ونەرپازدار دۋەت قۇرىپ, بالالارعا ارنالعان اندەردى شىرقادى. ال, اقتىق سىندا جەكە داۋىستا ونەرلەرىن كورسەتتى. ولاردىڭ قابىلەتىن بىلىكتى مامانداردان قۇرالعان قازىلار القاسى باعالادى. ءناتيجەسىندە باس جۇلدە 17 جاستاعى استانالىق بويجەتكەن انەل سمايىلوۆاعا بۇيىردى.
ءمادينا جاقىپ
