ەلوردادا ءار ءتۇرلى جاستاعى شاحماتشىلار حالىقارالىق جارىستا شەبەرلىك بايقاسۋدا. «ح. س. وماروۆ مەموريالى – 2016» جارىسى 19 شىلدەگە دەيىن جالعاسادى.
جالپى, قاتىسۋشىلار سانى – 200 ادام, سونىڭ ىشىندە 70-ءسى – ەرەسەك. اشىق تۋرنيرگە ءتۇرلى مەملەكەتتەردەن كەلگەن گروسسمەيستەرلەر دە قاتىسۋدا. بالالار ەكى سانات بويىنشا سايىسقا تۇسەدى – 6-دان 10 جاسقا دەيىن جانە 10-نان 14 جاسقا دەيىن. جارىستا 100 جۋىق سپورتشى استانانىڭ نامىسىن قورعايدى.
– بۇگىنگى جارىس – 19-شى «حاكىم وماروۆ اتىنداعى مەموريال», ول ءتىرى كەزىندە شاحماتتى ناسيحاتتاۋعا جانە ونىڭ دامۋىنا زور ۇلەس قوسقان. تۋرنيرگە قاتىسۋعا بالالاردىڭ كوپ كەلگەنىن بايقادىم. ولار ءۇشىن ەڭ باستىسى, گروسسمەيستەرلەردىڭ نەمەسە شەبەرلەردىڭ ويىنىن كورۋ, بۇل – بولاشاقتا كەم دەگەندە سونداي جەتىستىككە قول جەتكىزۋگە ىنتالاندىرۋ بولادى, بالكىم ولاردىڭ ءبىرى الەم چەمپيونى اتاناتىن شىعار, – دەيدى قازاقستاننىڭ شاحمات فەدەراتسياسىنىڭ ءبىرىنشى ۆيتسە-پرەزيدەنتى ەركىن يسرايىلوۆ.
جارىس باستالعاننان كەيىن ۇل-قىزدار زەيىنىن ويىنعا شوعىرلادى. قارسىلاستار ءبىر-بىرىنە لايىق ەكەندىگى بايقالادى.
– شاحماتتى ۇناتامىن, ەكى جىل ويناپ, ەكىنشى رازرياد الدىم. ەندىگى ماقساتىم ءبىرىنشى رازرياد, ودان ءارى جەڭىسكە جەتۋ. شىدامدىلىق كەرەك, ءتۇرلى تاكتيكالاردى, جاتتىقتىرۋشىنىڭ ۇيرەتكەنىنىڭ ءبارىن ءبىلۋ كەرەك, پارتيالاردى ەستە ساقتاساڭ بولدى, – دەيدى جاس شاحماتشى ءاسانالى ءاشىموۆ.
قاتىسۋشىلاردى قولداۋ ءۇشىن حالىقارالىق گروسسمەيستەر دينارا سادۋاقاسوۆا دا كەلدى, ول دا وسى ح. وماروۆ اتىنداعى كلۋبتان باستاعان بولاتىن. بۇگىندە ول – كاسىپقوي شاحماتشى.
– ءوزىم دە بۇعان دەيىن «ح. وماروۆ اتىنداعى مەموريالعا» تالاي رەت قاتىسقانمىن, جارىسقا قاتىساتىن بالالاردىڭ جىل سايىن ارتىپ جاتقانى قۋانتارلىق جايت. قازاقستاندا شاحمات دامىپ كەلەدى, بۇعان ءوزىم دە ۇلەس قوسقانىما قۋانىشتىمىن, – دەدى ول.
