اسىرەسە, استانا قالاسىندا كۇن رايى كۇرت سۋىعالى تۇماۋ اۋرۋىنا شالدىققاندار قاتارى جيىلەدى. جۇقپالى سانالاتىن دەرتتىڭ الدىن الماسا, اسقىنعان ءتۇرىنىڭ داۋاسىن تابۋ قيىنعا سوعاتىنى بارىمىزگە ءمالىم. جاۋاپتى مەكەمەلەر بۇل باعىتتا قول قۋسىرىپ وتىرعان جوق, ناقتى شارالاردى قولعا الۋدا. بيىلعى ەپيدەميالىق ماۋسىم الدىندا بيۋدجەتتەن ناقتى قاراجات ءبولىنىپ, ماقساتتى يگەرىلۋ ۇستىندە. ۇلتتىق ەكونوميكا مينيسترلىگى تۇتىنۋشىلار قۇقىعىن قورعاۋ كوميتەتى توراعاسىنىڭ ورىنباسارى – ەلىمىزدىڭ باس سانيتارلىق دارىگەرى جانداربەك بەكشينمەن ارادا وربىگەن اڭگىمە بۇل ءسوزىمىزدى راستاي تۇسەدى.
– بيىلعى ەپيدەميالىق ماۋسىمدا قانداي ناقتى شارالاردى قولعا الدىڭىزدار؟
– اعىمداعى جىلدىڭ 1 قازانىنان باستاپ تۇرعىن حالىقتى تۇماۋعا قارسى يممۋنداۋ ناۋقانى باستالدى. تۇماۋدىڭ الدىن الۋ ءۇشىن ەڭ ءتيىمدى ءادىس – حالىقتى ۆاكتسينالاۋ بولىپ تابىلاتىنى راس. ايتا كەتۋ كەرەك, 2014-2015 جىلدىڭ ەپيدەميالىق ماۋسىمى الدىندا تۇماۋعا قارسى 1,2 ميلليوننان استام ۆاكتسينا دوزاسى 874 ميلليون تەڭگەگە ساتىپ الىندى. ال بىلتىر 549 ميلليون تەڭگەگە 798 مىڭ دوزا العان ەدىك.
– مەملەكەتتىك بيۋدجەت قاراجاتىنا الىنعان بۇل دارمەك ەڭ الدىمەن تۇرعىنداردىڭ قاي ساناتىنا ەگىلەدى؟
– جۇقپالى اۋرۋلارعا شالدىعۋ قاۋپى ەڭ جوعارى دەگەن الەۋمەتتىك توپتارعا ەگىلەدى. ماسەلەن, سوزىلمالى وكپە, جۇرەك-قان تامىرلارى اۋرۋلارىمەن اۋىراتىن, يممۋنيتەتى ناشار جانە ءجيى اۋىراتىن بالالار, مەديتسينا قىزمەتكەرلەرى مەن جۇكتى ايەلدەر…
– استانالىق تۇرعىندار اراسىندا ەكپەنى اقىلى تۇردە العىسى كەلەتىندەر دە بار. ولارعا قانداي مەكەمەلەر قىزمەت كورسەتە الادى؟
– تۇماۋعا قارسى اقىلى ۆاكتسيناتسيا جەكەمەنشىك مەديتسينالىق ورتالىقتاردا, ەمحانالاردىڭ ەكپە كابينەتتەرىندە جۇرگىزىلەدى. ونىڭ قۇنى ءار وڭىردە 2200 تەڭگەدەن 3000 تەڭگەگە دەيىن بولادى
– بىلە جۇرەيىك, ەلىمىزدە جىل سايىن نەشە ادام تۇماۋراتادى؟
– جىل سايىن قازاقستاندا تۇماۋ مەن جرۆي اۋرۋىن 600-دەن 1 ميلليون ادامعا دەيىن جۇقتىرادى. بۇل ەل حالقىنىڭ 3,5-نان 10 پايىزعا جۋىعى دەگەن ءسوز.
ەسكەرتە كەتەيىن, ۆاكتسينا ەگىلگەننەن كەيىن 14 كۇننەن سوڭ كۇشىنە ەنەدى, ونىڭ قورعانىش بەلسەندىلىگى 6-دان 12 ايعا دەيىن سوزىلادى.
اسحات رايقۇل
