«الەمنىڭ» تۇساۋى كەسىلدى
كەشە بەيبىتشىلىك جانە كەلىسىم سارايىندا «Astana Ballet» حورەوگرافيالىق ۇجىمىنىڭ رەپەرتۋارىنداعى تۇڭعىش قويىلىم – «الەم» اتتى ءبىر اكتىلى بىرەگەي بالەتتىڭ تۇساۋكەسەرى ءوتتى. استانا كۇنى قارساڭىندا ۇيىمداستىرىلعان ايتۋلى شاراعا مەملەكەت باسشىسى نۇرسۇلتان نازارباەۆ قاتىستى.
«Astana Ballet»– ەلباسىنىڭ ۇسىنىسى بويىنشا 2012 جىلى اشىلعان, حالىقتىق جانە زاماناۋي حورەوگرافيانىڭ كلاسسيكالىق ءداستۇرلەرى مەن ەڭ سوڭعى ۇردىستەرىن شەبەر ءبىرىكتىرە بىلگەن ونەر ورداسى.
– ءبىر اكتىلى بالەتتى ساحنالاۋعا ءبىر جىلداي دايىندالدىق. ءبىزدىڭ يدەيالارىمىزدى جۇزەگە اسىراتىن وزىندىك قولتاڭباسى بار حورەوگرافتى ىزدەۋ ۇزاققا سوزىلدى. كوركەمدىك باسشىلىقتىڭ تاڭداۋى قازىرگى زامانعى ەڭ تارتىمدى بالەتمەيستەرلەردىڭ ءبىرى, ماسكەۋلىك حورەوگراف نيكيتا دميتريەۆسكيگە ءتۇستى. بىزگە قازاق حالقىنىڭ وزىندىك ەرەكشەلىگىن ايقىندايتىن زاماناۋي بي تىلىمەن تىلدەسۋ ماڭىزدى. اتالمىش قويىلىمدا جاننىڭ پايدا بولۋى, ونىڭ اسپاننان جەر بەتىندەگى ومىرگە دەيىن قيلى جولى اسەرلى سۋرەتتەلەدى. ونەر تىلىمەن ايتقاندا, ءوزىن-ءوزى تانىتىپ ۇلگەرمەگەن بولمىس, سىرت كەلبەتىن قالىپتاستىرۋعا تىرمىساتىن قۋات كوزى. ونىڭ باستى ارمانى – ماحاببات وتىن تۇتاندىرۋ. ول– الەم! – دەيدى «Astana Ballet» ۇجىمىنىڭ اتقارۋشى ديرەكتورى ۆالەري كۇزەمباەۆ.
نيكيتا دميتريەۆسكيدىڭ بۇل حورەوگرافياسى وزەكتى الەمدىك ۇردىستەر جانە قازاق بي مادەنيەتىنىڭ ءداستۇرلى اۋەنىنىڭ سەزىمتال سينتەزىنە اينالدىرا ءبىلدى. مۋلتيمەديا سالاسىنداعى رەسەيدىڭ جەتەكشى ماماندارىنىڭ ءبىرى لەونيد باسين سپەكتاكلدىڭ بەينەلىك تۇجىرىمىن قازاقستاننىڭ باي ءمادەنيەتىنىڭ ەرەكشەلىكتەرىن قاپەرگە الا وتىرىپ جاساعان. اۋەنىن ەتنو-كومپوزيتور بولات عافاروۆ, ليبرەتتونى بەلگىلى اقىن باقىت قايىربەكوۆ جازعان.