ەلوردادا حالىقارالىق ايەلدەر كۇنىنە ارنالعان «الەمنىڭ جارىعى» اتتى مەرەكەلىك كونتسەرتى ءوتتى. نۇر-سۇلتان قالاسى اكىمدىگىنىڭ قولداۋىمەن وتكەن مەرەكەلىك شاراعا اق حالاتتى ابزال جاندار, ۇستازدار, كوپبالالى انالار مەن ارداگەرلەر قاۋىمى شاقىرىلدى.
مەرەكەلىك شاراعا قالا اكىمى التاي كولگىنوۆ قاتىستى. كەلگەن قوناقتاردى قۇتتىقتاي وتىرىپ, ءوز تىلەگىن ايتتى.
– بۇل – وتباسىلىق مەرەكە. ارنايى سىزدەر ءۇشىن وسى شارانى ۇيىمداستىرىپ وتىرمىز. پرەزيدەنتىمىز قاسىم-جومارت كەمەلۇلى قازىرگى باعىتىمىزدى – «جاڭا قازاقستاندى» قۇرۋعا جۇمىستانۋدا. قازىر الەمدىك دارەجەدە ءتۇرلى سىناقتار بولىپ جاتىر. ءاربىر سىناقتان ءبىز بىرلىكپەن عانا وتە الامىز. ىنتىماق بار جەردە ىرىس بار. سوندىقتان ەلىمىزدە بىرلىك بولسا, تاۋەلسىز قازاقستان دامي بەرەرى ءسوزسىز.
نۇر-سۇلتان قالاسىنىڭ العاشقى جىلدارىندا 200 مىڭنان استام عانا حالىق قونىستانعان ەدى. قازىر 1 ملن 200 مىڭنان استام تۇرعىن بار. مۇنىڭ ءوزى – ءبىز ءۇشىن ۇلكەن جەتىستىك. ستاتيستيكانى قاراساق, قالامىزدا نازىك جاندىلاردىڭ تيگىزىپ جۇرگەن پايداسى ۇشان-تەڭىز. مىسالى, ەلوردادا 20 مىڭ دارىگەر, 16 مىڭ پەداگوگ, 100 مەكتەپ ديرەكتورى, 17 باس دارىگەر بولىپ ارۋلارىمىز قىزمەت ەتىپ وتىر. الەمدى سۇلۋلىق قۇتقارادى. سىزدەر ادەمىلىكتىڭ سيمۆولىسىزدار. ارقاشان وسىلاي قۇلپىرىپ, جايناي بەرىڭىزدەر!» دەپ قۇتتىقتادى قالا اكىمى.
كەشكە انشىلەر مەن تەاتر ارتىستەرى قاتىستى. اتاپ ايتقاندا, تامارا اسار, رۇستەم نۇرجىگىت, تۇرسىنبەك قاباتوۆ, رۋحيا بايدۇكەنوۆا, يگور بلاگودارنىي, البينا وگانەسيان ونەرلەرىن كورسەتتى. كونتسەرت شىمىلدىعىن ەسترادالىق-سيمفونيالىق وركەسترى ءشامشى قالداياقوۆتىڭ اندەرىنىڭ ۋۆەرتيۋراسىمەن اشتى. «جاستار» تەاترىنىڭ ونەرپازدارى «اناعا ارناۋ» ءپوپپۋريىن ورىندادى. تامارا اسار مەن قۇرماش ماحان حالىق ءانى «كوزىڭنىڭ ءمولدىرىن-اي» ءانىن اۋەلەتە شىرقادى. ازىلكەش تۇرسىنبەك قاباتوۆ ايەلدەردىڭ مەرەيىن اسقاقتاتىپ, ءازىلىن ايتسا, حالىق اسپاپتارىمەن «اققۋ» كۇيى ورىندالدى. ونەرپازدار نۇر-سۇلتان قالاسى اكىمدىگىنىڭ ەسترادالىق-سيمفونيالىق وركەسترىنىڭ سۇيەمەلدەۋىمەن تابيعي داۋىستا ءان سالدى.
كەشكە قۇرمەتتى قوناق رەتىندە قوعام قايراتكەرى ورازكۇل اسانعازى دا قاتىستى. ارۋلار مەن نازىك جاندىلارعا ارنايى قۇتتىقتاۋ تىلەگىن ءبىلدىردى.
– كوكتەمنىڭ العاشقى مەرەكەسىندە وسىنداي كەرەمەت كەشتىڭ كۋاسى بولىپ وتىرمىز. تابيعاتتىڭ ءوزى انانىڭ مەيىرىندەي ەرىپ, جايماشۋاق بولىپ جاتىر. بارلىق كەسەل-كەساپات وتكەن جىلمەن كەتىپ, جاڭا جىلىمىز انالارىمىز ءۇشىن تىنىشتىق جىلى بولسىن! انانىڭ كوڭىلى تىنىش بولسا, ەل ىشىندە جۇماق بولادى. ءاربىر قىز ءوزىنىڭ ءۇيىن جۇماققا اينالدىرسىن! – دەدى قوعام قايراتكەرى.
كوپبالالى انا جاننات كاچاگانوۆا دا مەرەكەلىك شارانىڭ قوناعى. شاراعا ەلورداداعى كوپبالالى انا رەتىندە شاقىرىلعان.
– بەس بالانىڭ اناسىمىن. وسى مەرەكەلىك شاراعا شاقىرىپ, ارنايى قۇرمەتتەپ شاقىرعانى ءۇشىن ريزامىن. قازىر نەمەرەلەرىمدى باعىپ وتىرعان اياۋلى اجەمىن. ەلىمىزدە بەيبىت زامان بولسىن! – دەپ تىلەگىن ءبىلدىردى.
شاراعا كەلگەن ءاربىر قىز-كەلىنشەككە گۇل شوقتارى بەرىلىپ, قۇتتىقتاۋ ايتىلدى. كونتسەرتتە اناعا ارنالعان اندەر شىرقالىپ, جىر وقىلدى.
ايزادا جايىققىزى
