ناۋرىز – مەيىرىم مەن بەرەكەنىڭ مەيرامى. بۇل كۇنى – «سامارقاننىڭ كوك تاسى ءجىبىپ», ادامدار ەرەكشە كوڭىل كۇيگە ەنەدى. اسىرەسە, كوكتەمدى بەت قارىر سارشۇناق ايازى مەن اق تۇتەك بورانى تۇتقيىلدان سوعىپ, «كارى قۇداڭ» قىس ۇزاقتاۋ قىتىمىرلىق تانىتاتىن ارقا توسىندە جاستار ايرىقشا كۇتەتىن سياقتى.
استانا – جاستار قالاسى. مۇندا ءبىلىم قۋىپ كەلگەندەرىنەن بولەك, «ەكى قولعا ءبىر كۇرەك» جۇمىس ىزدەپ, ناپاقا تابۋدى كوزدەگەن جىگىتتەر مەن قىزداردىڭ دا قاراسى از ەمەس. جاس بۋىن وكىلدەرىن قازىر مەملەكەت باسشىسىنىڭ ءوزى قولداپ, قامقورلىق تانىتىپ وتىر. اسىرەسە, كەيىنگى كەزدە جۇمىسشى ماماندىعىن مەڭگەرگەن جاستارعا دەگەن كوزقاراس ايقىندالىپ, ولاردىڭ ەڭبەكتەرىنە قۇرمەتپەن قاراۋ كەرەكتىگى باسا ايتىلۋدا.
ءبىز بۇگىن ۇلىستىڭ ۇلى كۇنى قارساڭىندا ءبىر ءوزى بىرنەشە ماماندىقتى يگەرگەن, قانداي جۇمىستىڭ دا ىڭعايىن تانىپ, ءجونىن كەلتىرە الاتىن بەساسپاپ مامان جىگىت جونىندە اڭگىمە وربىتپەكپىز.
ءبىز تۇراتىن «ەۋرازيا» تۇرعىن ءۇي كەشەنىنە ون جەتى جىل بولعان. وتكەن جىلى كىرەبەرىسكە كۇردەلى جوندەۋ جۇمىستارىن جۇرگىزۋدى ۇيعاردىق. تۇرعىندار كەلىسىپ, اقشا جيناپ, ءبىر ادامعا سەنىپ تاپسىرعانبىز. سويتسەك, سەنگەن ادامىمىز الاياق بولىپ شىقتى. جۇمىستىڭ ەڭ قيىن جەرى ەدەنگە كافەل توسەۋگە كەلگەندە زىم-زيا جوعالدى. «وسى ۇيدەن پاتەر ساتىپ العانمىن, وسى ءۇيدىڭ تۇرعىنىمىن» دەپ ءبارىمىزدى الداپتى.
ەندى قايتتىك؟ بىرەۋدىڭ بىتىرمەي ورتا جولدان تاستاپ كەتكەن جۇمىسىن ءبىتىرىپ بەرۋدى ەشبىر بريگادا مىندەتتەرىنە المايدى ەكەن. ەڭسەمىز ءتۇسىپ, داعدارا باستاعاندا وسى تۇرعىن ءۇي كەشەنىندە ەلەكترمەن دانەكەرلەۋشى بولىپ جۇمىس ىستەيتىن اسان دەگەن جىگىتتىڭ كەزدەسە كەتپەسى بار ما؟ ءمان-جايدى تۇسىنگەننەن كەيىن «اعالار, قام جەمەڭدەر, كافەل توسەۋ مەنىڭ قولىمنان كەلەدى. بۇرىن تالاي مۇنداي شارۋامەن اينالىسقانمىن» دەپ بولار بولماس تيىن-تەبەنگە تاپ-تۇيناقتاي ەتىپ, بۇكىل №4 كىرەبەرىستىڭ جوندەۋ جۇمىستارىن ءبىتىرىپ بەردى.
قولى شەبەر, ىسكەر جىگىتتىڭ نىسپىسى اسان كوشكىنوۆ ەكەن. ونىڭ سول العىرلىعى مەن ىجداھاتتىلىعىنا كوپشىلىك ءسۇيسىنىپ, «وركەنىڭ ءوسسىن, جۇمىسىڭنىڭ جەمىسىن كور» دەپ باتاسىن بەرىپ جاتتى.
بۇگىندە اسان – 373 پاتەرلى «ەۋرازيا» تۇرعىن ءۇي كەشەنىندەگى ەڭ ابىرويلى دا بەدەلدى جۇمىسشى. ويتكەنى ونىڭ قولىنان قوعامداعى ەڭ كوپ سۇرانىسقا يە ماماندىق ەلەكترمەن ءپىسىرۋ مەن قاتار سلەسار-سانتەحنيك, كافەلشى, تاس قالاۋشى, سىلاقشى-ارلەۋشى جۇمىستارىنىڭ بارلىعى كەلەدى ەكەن. ءارى ول تاۋلىكتىڭ قاي ۋاقىتىندا دا ىسكە قاجەت بولسا, ءتۇن ۇيقىسىن ءتورت ءبولىپ, جارىلعان, اپات شىققان جەرگە بىردەن اتتانىپ, جۇمىستى تىندىرعانشا ءبىر دامىل كورمەيدى.
بۇل تۋرالى وسى تۇرعىن ءۇي كەشەنى مۇلىك مەنشىك يەلەرى بىرلەستىگىنىڭ توراعاسى شالقار جەتپىسباەۆ: «اساننىڭ بىزگە كەلىپ جۇمىس ىستەي باستاعانىنا ەكى جىلدان استى. وسى ۋاقىت ىشىندە ول ءوزىن جان-جاقتى كورسەتتى. بىزگە مۇنداي قاي ءىستىڭ دە تەتىگىن بەس ساۋساعىنداي بىلەتىن العىر جىگىتتەر اۋاداي قاجەت-اق. سوندىقتان كوپ شارۋادا وعان سەنىم ارتىپ, ارقا سۇيەيمىز. ءوزى ءبىر مىنەزى جايلى التىن جىگىت. اراق ىشپەيدى, تەمەكى تارتپايدى. ارتىق-اۋىس ءسوزى جوق. ىسىنە تىندىرىمدى» دەدى.
اسان 1997 جىلى وزبەكستان رەسپۋبليكاسى تاشكەنت وبلىسى بوستاندىق اۋدانىندا دۇنيەگە كەلىپتى. اۋىلدان ورتا مەكتەپتى ويداعىداي بىتىرگەننەن كەيىن اكە جولىن قۋىپ, ەلەكترمەن ءپىسىرۋشى ماماندىعىن الىپتى. ويتكەنى ول قارشادايىنان اكەسى امانتايدىڭ قاسىندا ءجۇرىپ, شارۋاشىلىقتىڭ ناۋقاندىق جۇمىستارىندا تەحنيكالاردى جوندەۋدە نەبىر كۇردەلى ەلەكترمەن, گازبەن ءپىسىرۋ, دانەكەرلەۋ جۇمىستارىن كوزىمەن كورىپ ءوستى. سودان تاجىريبە جينادى. ال سانتەحنيكا مەن سلەسارلىقتى اعاسىنان ۇيرەنىپتى.
– ءبىز وتباسىندا ءتورت اعايىندىمىز. ءبىر اعام, ءبىر ءىنىم, قارىنداسىم بار. ولار قازىر سول وزبەكستاندا تۇرادى. ءوزىم قازاقستاننىڭ ازاماتىمىن. الداعى ۋاقىتتا وسى ماماندىقتارىمدى تەرەڭدەتە مەڭگەرىپ, ءوز الدىنا بولەك ءبىر قىزمەت كورسەتۋشى كومپانيا قۇرسام با دەگەن ماقساتىم بار. قازاق «باس ەكەۋ بولماي, مال ەكەۋ بولمايدى» دەگەن. بيىل ۇيلەنگىم كەلەدى. سوسىن وسى ءوزىم قالاعان, وزىمە ۇنايتىن جۇمىسىمدى بارىنشا جان-جاقتى دامىتسام با دەيمىن, – دەيدى ول بولاشاق جوسپارلارى جونىندە اڭگىمەلەپ.
وسى كەزدە ونىڭ تەلەفونى شىر ەتە ءتۇستى. كوپقاباتتى ءۇيدىڭ جەرتولەسىندەگى سۋ قۇبىرلارىنىڭ ءبىرى جارىلىپ, تۇرعىندار دابىل قاعىپ جاتىر ەكەن. اسان قولىنا كىلت-قۇرالى مەن دانەكەرلەۋ اپپاراتىن الا سالىپ اتالعان ءۇيدىڭ جەرتولەسىنە قاراي جۇگىرە جونەلدى. بۇل – ونىڭ كۇندەلىكتى جۇمىسى. ول ءوز جۇمىسىن ۇناتادى. سودان بولسا كەرەك, جۇرتشىلىقتان ۇنەمى العىس الىپ جۇرەدى.
ەلورداداعى وسىنداي كوپقاباتتى ۇيلەردە جاس تا ىسكەر جۇمىسشى اسان كوشكىنوۆتىڭ قولتاڭباسى قالاتىنىنا ءبىز دە سەنىمدىمىز.
