نۇر-سۇلتان قالاسىندا كوپبالالى انالارعا, قازاقتىڭ ىسمەر قىزدارىنا ارنالعان «اسىل انا» تاقىرىبىندا شەبەرلىك ساباعى اشىلدى.
ۇلتتىق برەندتى دامىتۋ, كوپبالالى انالاردى كاسىپكە باۋلۋ ءارى ولاردى شاعىن بيزنەسكە تارتۋ ماقساتىندا وتكىزىلگەن بۇل يگىلىكتى شارا قالا اكىمدىگىنىڭ قولداۋىمەن ءوتتى. شارا اياسىندا «التىن ساپا» پرەزيدەنتتىك سىيلىعىنىڭ, «قۇرمەت» وردەنىنىڭ يەگەرى, بەلگىلى ەتنو-ديزاينەر, «التىن وردا» اۆتورلىق ديزاين ءۇيىنىڭ جەتەكشىسى ىرزا تۇرسىنزادا كوپبالالى انالارعا, تۇرمىس دەڭگەيى تومەن, جۇمىسسىز ايەلدەرگە ءداستۇرلى قولونەر بۇيىمدارىن تىگۋ جونىندە تەگىن شەبەرلىك ساباعىن وتكىزەدى.
ساباققا 200-دەن اسا قىز-كەلىنشەك قاتىستى. ولار 2-3 كۇن بويى ماتانى ءپىشۋ, جورمەۋ سياقتى ءىس تىگۋدىڭ ءادىستەرىن ۇيرەنەدى. شارانىڭ 4-كۇنى كورمە وتكىزىلىپ, شەبەرلەردىڭ قولىنان شىققان ونىمدەر باعالانادى. جاقسى ۇيرەنگەندەرگە سەرتيفيكاتتار بەرىلەدى. سونىمەن قاتار كوپبالالى انالارعا 50 تىگىن ماشيناسى تەگىن بەرىلەدى.
– بۇل ونەردى جاقسى ۇيرەنسە, ۇيدە وتىرىپ-اق تابىس تابۋعا بولادى. شاكىرتتەرىمنىڭ اراسىندا ۇيىندە وتىن جاعىپ, بالاسىن باعىپ وتىرىپ, ءبىر جاعىنان وسى ونەرمەن اينالىسىپ, جاقسى تابىس تاباتىندارى بار, – دەپ ءبىر تىنىپ العان ىرزا اپاي شارانى قولداعان قالا اكىمىنە ايىرىقشا العىسىن ءبىلدىردى. «كوپتىڭ قامىن ويلاعان جايساڭ جاندار «تاي سۇراساڭ, ات بەرەدى» دەگەندەي, باس قالامىزدىڭ اكىمىنەن 50 تىگىن ماشيناسىن سۇراسام, 100 تىگىن ماشيناسىن بەردى. مۇنىڭ 50-ءىن وسى جولى, قالعانىن كەيىن قالا كۇنىندە كوپبالالى انالارعا بەرەمىز» دەدى ول.
ايتا كەتەيىك, ايەلدەردىڭ ۇيدە وتىرىپ تا, ونەر ۇيرەنۋىنە مۇمكىندىك جاساۋ ءۇشىن ىرزا اپاي الەۋمەتتىك جەلىدە دە تەگىن ساباق وقىتادى. بۇعان قاتىسۋ ءۇشىن ەتنو-ديزاينەردىڭ Instagram, Facebook پاراقشالارىنا جانە Youtube كانالىنا جازىلۋ كەرەك.
