كەشە استانا قالاسى ءماسليحاتىنىڭ زاڭدىلىق, قۇقىق ءتارتىبى جانە كوپشىلىكپەن جۇمىس جاساۋ جونىندەگى تۇراقتى كوميسسياسىنىڭ كەزەكتى وتىرىسىندا توتەنشە جاعدايلار جونىندەگى قىزمەت جايى پىسىقتالدى.
الدىمەن توتەنشە جاعدايلار دەپارتامەنتىنىڭ باستىعى مەيرام يسكاكوۆ پەن جۇمىلدىرۋ دايىندىعى, ازاماتتىق قورعانىس, اپاتتاردىڭ جانە دۇلەي اپاتتاردىڭ الدىن الۋىن جانە جويۋىن ۇيىمداستىرۋ جونىندەگى باسقارما باستىعى تيمۋر ءابىجانوۆ بايانداما جاساپ, قۇتقارۋ قىزمەتتەرىنىڭ تابيعي جانە تەحنيكالىق اپاتتارعا قارسى 2012-2013 جىلدار ارالىعىندا اتقارعان جۇمىستارى ناتيجەسىن ءمالىم ەتتى. كوميسسيا مۇشەلەرىنىڭ نازارىنا كوگىلدىر ەكراننان ۇنەمى وتكىزىلىپ تۇراتىن وقۋ-جاتتىعۋ ساباقتارى بارىسىن ۇسىندى.
بايانداما وقىلىپ بولعاننان كەيىن, 2010 جىلدىڭ 17 اقپانىندا ى.دۇكەنۇلى كوشەسىندە ورنالاسقان «استانا قالاسىنىڭ كوممۋنالدىق مەنشىك قورى» مكك-ءنىڭ قورعانىس قۇرىلىسىنداعى ءورت تۋرالى بەينەبايان كورسەتىلدى. بومباپانا ىشىندە بولعان اسا كۇردەلى ساناتتاعى «ءتىلسىز جاۋدى» اۋىزدىقتاۋعا قالالىق ءورت ءسوندىرۋ بولىمدەرىنىڭ 35 قىزمەتكەرى قاتىسقان. سول كەزدە تجد باستىعىنىڭ ورىنباسارى ۆالەري زايتسەۆ, №6 ءورت ءسوندىرۋ قىزمەتىنىڭ ءبولىم باستىعى رۋسلان كاكىشەۆ جانە ءوسب-3 باستىعىنىڭ ورىنباسارى سايات ابەەۆ قازا تاپقان ەدى… ەكران ارقىلى وتكەن شاقتى ەسكە تۇسىرگەن تجد قىزمەتكەرلەرى تەرەڭ ءبىر كۇرسىنىپ الدى. ءماسليحات حاتشىسى سانسىزباي ەسىلوۆ ولارعا ءوز جۇمىسىنا تياناقتى بولىپ, قوعامدىق ورىندارعا مۇقيات جاۋاپكەرشىلىكپەن قاراۋ كەرەكتىگىن ەسكەرتتى. ونىڭ ايتۋىنشا, ەلوردامىزداعى ەكى قاباتتى ەسكى باسپانالار مەن جەر ۇيلەردە پەش جانە كوگىلدىر وتىندى تۇتىنۋ بارىسىندا ورىن الاتىن اپاتتاردىڭ الدىن الۋ شارت. ول ءۇشىن ارنايى ماماندار بارلىعىن ءجىتى قاداعالاپ, ءجيى تەكسەرىپ تۇرماسا بولمايدى. ءتىپتى, كەيبىر كوپقاباتتى ۇيلەردىڭ دە جەدەلساتىلارى مەن كىرەبەرىستەگى ەسىك ماگنيتتەرى ىستەمەي قالىپ جاتادى. سايىپ كەلگەندە, بۇنىڭ بارلىعى قالا تۇرعىندارىنىڭ قاۋىپسىزدىگىن قامتاماسىز ەتۋدەگى ءىستىڭ باياۋلىعىن ايعاقتايدى. سونداي-اق, حالىقارالىق «EXPO-2017» كورمەسىنە وراي بوي كوتەرەتىن جاڭا شاعىناۋداننىڭ قاۋىپسىزدىگىنە دە باسا ءمان بەرۋ كەرەكتىگى ايتىلدى. كەزدەسۋ سوڭىندا توتەنشە جاعدايلاردىڭ الدىن الۋ جانە ازاماتتاردى قاۋىپتەن قۇتقارۋ قىزمەتىنە جاۋاپتى وكىلدەر ورىندى ەسكەرتۋدەن وڭ قورىتىندى شىعارۋعا ۋادە بەرىپ تارقاستى.
ە.بەيسەنوۆ
