ەلىمىزدە عىلىمي اۋدارما ينستيتۋتىن قۇرۋ قاجەت.
اۋدارما ءىسى قاي زاماندا بولماسىن حالىقتىڭ رۋحاني ءومىرى مەن عىلىمى ءۇشىن وتە ماڭىزدى سانالعان.
كەڭەستىك زاماندا قازاقتىڭ عىلىمي اۋدارماسى ءبىرشاما وڭ جولعا قويىلعان بولاتىن. عالىم-اۋدارماشى ماماندار كوممۋنيستىك يدەولوگيا نەگىزىن قۇراعان ماركس, ەنگەلس, لەنين شىعارمالارىن قازاق تىلىندە سويلەتتى. اۋدارمانىڭ ساپاسى وتە جوعارى بولدى.
2003 جىلى ەلباسى ن.نازارباەۆتىڭ باستاماسىمەن «مادەني مۇرا» باعدارلاماسى قولعا الىنىپ, كوپ جۇمىس اتقارىلدى. باعدارلاما شەڭبەرىندە شەتەل تىلدەرىنەن ءبىراز ەڭبەكتەر اۋدارىلدى. الايدا اۋدارما جەكە مەكتەپ بولىپ قالىپتاسپادى جانە اۋدارىلعان شىعارمالار ساپاسى دا كوڭىلدەگىدەي بولماي شىقتى.
قازىر الەمدىك دەڭگەيدە جازىلعان شىعارمالارمەن تەك ورىس تىلىندە تانىسا الامىز. اعىلشىن, فرانتسۋز, نەمىس عالىمدارى مەن ساياساتكەرلەرىنىڭ جازعان ەڭبەكتەرى ورىس تىلىنە شاپشاڭ اۋدارىلىپ, جۇرتشىلىققا تەز ارادا ۇسىنىلادى. قازاق تىلىندەگى اقپارات كوزدەرى دە وسىنداي دەڭگەيدە بولسا ەكەن.
عاريفوللا ەسىم,
سەناتور
