استانادا قازاقستان رەسپۋبليكاسىنىڭ ىشكى ىستەر ءمينيسترى قالمۇxانبەت قاسىموۆ xالىققا ەسەپ بەردى.
مينيستر 5-6 ماۋسىم كۇندەرى اقتوبەدە بولعان تەررورلىق ارەكەتكە ەرەكشە توقتالدى. قاندى وقيعاعا باستاپقىدا 45 ادام دايىندالعان, بىراق كەيىن جارتىسىنا جۋىعى باس تارتقانىن ءمالىم ەتتى.
– لاڭكەستەردىڭ بارلىعى ءبىر پاتەرگە جينالعان. ەشقايسىسى بۇلىك بارىسىندا تۋىستارىنا حابارلاسا الماۋى ءۇشىن ادەيى ۇيالى تەلەفوندارىن سول ۇيدە قالدىرىپ كەتكەن. جيھاد جاريالاپ, سىرتقا شىققان 45 ادامنىڭ كوبىسى ويلارىنان اينىعان. ءبىز ولاردى انىقتاپ, تەرگەۋ جۇرگىزۋدەمىز. بەينەكامەرا ارقىلى دۇكەنگە 25 ادامنىڭ كىرگەنىن كوردىك. قارۋلى قاقتىعىس ۇيىمداستىرعانداردىڭ 7-ەۋى بۇرىن سوتتالعان, – دەدى قالمۇxانبەت قاسىموۆ.
وسى ورايدا مينيستر مەملەكەتتەگى بۇكىل عيمارات, دۇكەن, مەيرامحانا, جانارماي قۇيۋ بەكەتى يەلەرىنە بەينەكامەرالار ورناتۋدى مىندەتتەۋ كەرەكتىگىن ايتتى.
بۇگىندە اقتوبەدەگى جاعداي تۇراقتى. قالادا بەلگىلەنگەن تەررورلىق قاۋىپتىڭ قىزىل دەڭگەيى سارىعا اۋىستىرىلدى. بارلىق مەكەمەلەر بۇرىنعىشا قىزمەتىنە كىرىسكەن. ال قىلمىستىق ءىستى باس پروكۋراتۋرا مەن ۇلتتىق قاۋىپسىزدىك كەڭەسى بىرلەسىپ جۇرگىزۋدە.
ماس جۇرگىزۋشىلەر قامالدى
بۇدان سوڭ مينيستر قازاقستانداعى جول اپاتتارى جايلى باياندادى. رەسمي دەرەكتەر بويىنشا, جىل باسىنان بەرى كولىكتى ماس كۇيىندە جۇرگىزگەن 11700 جۇرگىزۋشى ۇستالعان.
– ءبىزدىڭ زاڭدا جول ەرەجەسىن بۇزۋ, اسىرەسە, جىلدامدىقتى اسىرۋ, باعدارشامنىڭ قىزىل تۇسىنە ءوتۋ, قارسى جولاققا شىعۋ فاكتىلەرى قاتاڭ جازالانادى. بۇعان قاراماستان, جول قوزعالىسىنىڭ قاتىسۋشىلارى اراسىندا كولىكتىك ءتارتىپ تومەن. بيىل كولىكتى ماس كۇيىندە ايداعان 11700 جۇرگىزۋشىنىڭ 1600-ءى قاماۋعا الىندى. ال 16 مىڭ ازامات جۇرگىزۋشى كۋالىگىنەن ايىرىلدى, – دەدى ول.
الايدا سوڭعى ۋاقىتتا جول قاۋىپسىزدىگى سالاسىنداعى سيتۋاتسيا الدەقايدا رەتتەلگەن. ماسەلەن, وتكەن جىلى جول اپاتتارىنىڭ سانى 7 پايىزعا, قازا تاپقاندار سانى 5 پايىزعا, جاراقاتتانعاندار سانى 7 پايىزعا كەمىگەن. ال وسى جىلى جول-كولىك ەرەجەسىن بۇزۋ كورسەتكىشى 3,3 پايىزعا, قازا تاپقاندار سانى 6,9 پايىزعا, جاراقاتتانعاندار سانى 3,5 پايىزعا تومەندەگەن, – دەگەن مينيستر استانا قالاسى اكىمدىگىنىڭ قولداۋىمەن ورناتىلىپ جاتقان فوتو جانە بەينەتىركەگىشتەردىڭ بۇل قۇبىلىسقا وڭ اسەرى بارىن جەتكىزدى.
ۇيالى تەلەفون ۇرلاۋ ءورشىپ تۇر
قازاقستاندا ءجيى جاسالاتىن قىلمىستىڭ ءبىر ءتۇرى – ۇيالى تەلەفوندار ۇرلىعى ەكەن. جيىن بارىسىندا ىشكى ىستەر ءمينيسترى وسى ماسەلەنىڭ ءالى كۇنگە دەيىن نەلىكتەن تىيىلماي تۇرعانىن ءتۇسىندىردى.
– ەلىمىزدە جاسالاتىن بارلىق قىلمىستىڭ 60-63 پايىزى – ۇرلىق. ۇرلىقتىڭ 25-27 پايىزى ۇيالى تەلەفوندارعا قاتىستى بولىپ وتىر. كوپتەگەن دامىعان مەملەكەتتەردە تەلەفون ۇرلاناتىن بولسا, بۇعاتتاپ تاستايدى. دەمەك, ونى ۇرلاۋدىڭ ءوزى قيسىنسىز. سوندىقتان ولاردا ۇيالى تەلەفون ۇرلىعى مۇلدەم جوق دەسە دە بولادى. نەگە ءبىز دە سولاي ىستەي المايمىز؟! ويتكەنى, ءبىزدىڭ ەلگە كونترافاكتىلىك تەلەفوندار وتە كوپ ەنىپ كەتتى. سول سەبەپتى ۇيالى تەلەفون ۇرلانعان كەزدە پوليتسەيلەر ونىڭ IMEI-كودى ارقىلى بۇعاتتاسا, كونترافاكتىلىك جولمەن كەلگەن 50-100 تەلەفون بۇعاتتالىپ قالادى, – دەپ اتاپ وتكەن قالمۇحانبەت قاسىموۆ پروبلەمانى شەشۋ ءۇشىن ۇيالى تەلەفوندار نارىعىن رەتكە كەلتىرۋ تيىستىگىن شەگەلەدى.
– ۇرلىقپەن ءتيىمدى كۇرەسۋ ءۇشىن ۇيالى تەلەفونداردىڭ ەلگە زاڭسىز كەلۋىن دوعارۋ قاجەت. ءموبيلدى وپەراتورلار ولارعا قىزمەت كورسەتۋدەن باس تارتسىن. اقش-تاعى سياقتى ۇيالى تەلەفونداردىڭ بارلىعى جەكە تۇلعاعا تىركەلۋى كەرەك. كونترافاكتىلىك تەلەفونداردى انىقتاۋ ماقساتىندا ءبىز ءار تەلەفونعا 4 تسيفردان تۇراتىن جسن بەرەمىز. ءبىزدىڭ ارنايى قىزمەت ۇيالى تەلەفونداردى جەكە تۇلعانىڭ اتىنا تىركەۋگە مۇمكىندىك بەرەدى, – دەدى ول.
بوتاگوز ماراتقىزى
