ارمان ساپارىنا اتتاندى
كەشە ەلىمىز بويىنشا ۇلكەن ومىرگە اتتانعالى وتىرعان مەكتەپ تۇلەكتەرى ءۇشىن قوڭىراۋ ءۇنى سوڭعى رەت سوعىلدى. وسىنداي ىزگىلىككە تولى سالتاناتتى شارا استاناداعى №60 مەكتەپ-ليتسەيدە ءوتتى. وعان ەلوردا اكىمىنىڭ ورىنباسارى ەرمەك امانشاەۆ قاتىستى.
ون جىل بويى ءبىلىم نارىمەن سۋسىنداعان التىن ۇيا مەكتەبىمەن قوشتاسۋ كىم-كىمگە دە وڭاي ەمەس. ادەمى كيىنگەن بوزبالا مەن بويجەتكەندەردىڭ جۇزدەرىنەن ءبىر قيماستىق سەزىمدى بايقادىق.
ەلورداداعى №60 مەكتەپ-ليتسەي – وزىندىك تاجىريبەسى قالىپتاسقان بىرەگەي ۇجىم. ەۋروپا بيزنەس اسسامبلەياسى 2013 جىلى وسى مەكتەپكە «ەۋروپالىق ساپا» ناگراداسىن تاپسىرىپ, جەتەكشى وقۋ ورتالىقتارىنىڭ رەسمي حالىقارالىق تىزبەسىنە ەنگىزگەن. مىنە, وسىدان-اق وقۋ ورداسىنىڭ ابىرويى قانداي دەڭگەيدە ەكەنىن بىلۋگە بولادى.
ۇستازدار مەن وقۋشىلاردى سوڭعى قوڭىراۋ مەرەكەسىمەن قۇتتىقتاعان قالا اكىمىنىڭ ورىنباسارى ەرمەك امانشاەۆ:
– قۇرمەتتى تۇلەكتەر! سىزدەر ۇلكەن جولعا قادام باسقالى وتىرسىزدار. الدارىڭىزدا ءومىردىڭ داڭعىل جولى جاتىر. ەلباسىمىزدىڭ ءوزى جاستارعا ۇلكەن قامقورلىق كورسەتىپ كەلەدى. مىناداي ءزاۋلىم عيماراتتا ءبىلىم الدىڭىزدار. ۇلاعاتتى ۇستازداردان ءدارىس تىڭداپ, ارمان اسۋىنا دايىن بولىپ وتىرسىزدار. سوندىقتان الدارىڭىزعا قويعان ماقساتتارىڭىز, ارماندارىڭىز ورىندالسىن. ەلىمىزدىڭ دامۋىنا ەلەۋلى ۇلەس قوساتىن ازامات بولىڭىزدار. بارلىقتارىڭىزعا اق جول تىلەيمىن, – دەدى.
№60 مەكتەپ-ليتسەيدىڭ ديرەكتورى ايمان دۇيسەنوۆا دا ىزگى تىلەگىن جەتكىزدى.
– بۇگىن – ءبىز ءۇشىن ەرەكشە كۇن. تۇلەكتەرىمىزدى ارمان ساپارىنا شىعارىپ سالماقپىز. ارينە, قيمايمىز. بىراق, ءومىر زاڭى – سول. جالپى, ءبىزدىڭ مەكتەپتە 242 جەتكىنشەك ءبىلىم الادى. بيىل 160 تۇلەك مەكتەپ بىتىرەدى. ونىڭ ىشىندە 15 وقۋشى «التىن بەلگىگە» ۇمىتكەر, 10 تۇلەك ۇزدىك اتتەستاتتىڭ يەسى اتانباقشى. بيىلعى وقۋ جىلىن جوعارى دەڭگەيدە اياقتاپ وتىرمىز. اسىرەسە, ءبىزدىڭ بالالار ماتەماتيكا, بيولوگيا, حيميا پاندەرىن تەرەڭدەتىپ وقيدى. وقۋشىلارىمىز حالىقارالىق, رەسپۋبليكالىق وليمپيادالارعا قاتىسىپ, ۇزدىكتەر قاتارىنان كورىندى. قالالىق وليمپيادادان ءۇشىنشى ورىندى يەلەندىك. ال رەسپۋبليكا كولەمىندە حالىقارالىق جوبالار بويىنشا الدىڭعى ورىندا كەلەمىز. ەندى وقۋشىلارىمىز ۇلتتىق بىرىڭعاي تەستىلەۋدەن جوعارى بالل جيناپ, اتا-اناسى مەن مۇعالىمدەرىن قۋانتسا دەيمىز. تۇلەكتەرگە ساتتىلىك, باقىت تىلەيمىن, – دەدى ول.
سوڭعى قوڭىراۋ سالتاناتىنان كەيىن استانالىق تۇلەكتەر «بايتەرەك» مونۋمەنتى جانىندا ۇيىمداستىرىلعان «ءبىز – ەل بولاشاعىمىز» اتتى مەرەكەلىك شاراعا قاتىستى.
ازامات ەسەنجول