اسەت يسەكەشەۆ, استانا قالاسىنىڭ اكىمى: مەملەكەت باسشىسى العا قويعان مىندەت مەرزىمىندە ورىندالۋى ءتيىس
استانا قالاسىنىڭ اكىمى قىزمەتىنە كىرىسكەن كۇننەن باستاپ اسەت يسەكەشەۆ قالانى ارالاپ, كوشپەلى وتىرىستار وتكىزۋدە.
اكىم استانانىڭ بارلىق اۋداندارىندا بولىپ, تىرشىلىكتى قامتاماسىز ەتۋدىڭ ماڭىزدى نىساندارىمەن تانىسىپ, كوشەلەردى تەكسەردى. ەلوردا ومىرىنە قاتىستى كەز كەلگەن ماسەلە قالا اكىمدىگىنىڭ وتىرىستارىندا ەگجەي-تەگجەيلى زەرتتەلىپ, قارالاتىن بولادى.
قالا باسشىسى الدىمەن تالدىكولگە ات باسىن تىرەدى. استانا اكىمى كولدى تازارتۋ بويىنشا اتقارىلعان جۇمىستارمەن, سونىڭ ىشىندە سۋ تازارتۋ بويىنشا قوسىمشا قۇرىلىستاردى سالۋ جانە قالپىنا كەلتىرۋ جۇمىستارىمەن تانىستى. ايتا كەتەيىك, بىلتىر تالدىكولگە شىعارىندىلار جىبەرۋ توقتاتىلعان. جىل سوڭىنا دەيىن سۋ ءتۇبى تولىقتاي تازارتىلماق.
«بۇل ماسەلە ۇنەمى باقىلاۋدا بولۋى شارت. مەملەكەت باسشىسى العا قويعان مىندەت مەرزىمىندە ورىندالۋى ءتيىس» دەدى ءا. يسەكەشەۆ.
سونىمەن قاتار, اكىم قالا ءتىرشىلىگىن قامتاماسىز ەتۋدىڭ باستى نىساندارىنىڭ ءبىرى – جەو-2 جانە جەو-3-تە بولىپ, ەلوردانىڭ الداعى جىلىتۋ ماۋسىمىنا دايىندىعىن تەكسەردى.
2016-2017 ج.ج. جىلىتۋ ماۋسىمى باستالعانشا جەو-2-دە قۋاتتىلىعى 220 گكال قۇرايتىن №5, 6 جانە قۋاتتىلىعى 180 گكال بولاتىن №7 قازاندىق اگرەگاتتارىن ىسكە قوسۋ كوزدەلگەن, بۇل وسى جىلى جالپى جىلۋ قۋاتتىلىعىن 400 گكال-عا دەيىن ارتىرۋدى قامتاماسىز ەتەدى. جەو-3-ءتىڭ ءبىرىنشى كەزەگىنىڭ قۇرىلىس جۇمىستارى جالعاسۋدا. استانا قالاسىنىڭ ەنەرگەتيكا باسقارماسىنىڭ باسشىسى باقتىبەك جاپاەۆتىڭ ايتۋىنشا, كاسىپورىننىڭ تابىسى تۇتاستاي ينۆەستيتسيالىق باعدارلامالارعا باعىتتالعان. ءىس جۇزىندە اتالعان نىساندار ءوزىن-ءوزى قامتاماسىز ەتىپ, بيۋدجەت قارجىسىن شىعىندامايدى. بۇعان قوسا, جەو-3-ءتىڭ ەكىنشى كەزەڭى ءمجا شەڭبەرىندە جۇزەگە اسىرىلاتىن بولادى.
ءا.يسەكەشەۆ ەنەرگيا كوزدەرىن قالپىنا كەلتىرۋ مەن سالۋ كەز كەلگەن قالا, اسىرەسە, استانا ءۇشىن ماڭىزدى ستراتەگيالىق مىندەت بولىپ تابىلاتىنىن اتاپ ءوتتى. قازىرگى كەزدە جەو-2 جانە جەو-3-تە جۇرگىزىلىپ جاتقان جۇمىستار جىلۋ شىعارۋ تاپشىلىعىن وتەپ, استانانىڭ بارلىق اۋداندارىن ۇزدىكسىز جانە سەنىمدى جىلۋمەن جانە ەلەكتر ەنەرگياسىمەن قامتاماسىز ەتۋگە مۇمكىندىك بەرەدى. «ال ءبىزدىڭ باستى مىندەتىمىز وسى» دەدى قالا اكىمى.