«استانا-اەك» كومپانياسى 1 ملرد 580 تەڭگە كولەمىندە ينۆەستيتسيالىق باعدارلامانى ىسكە اسىرعان
قر ۇلتتىق ەكونوميكا مينيسترلىگىنە قاراستى تابيعي مونوپوليالاردى رەتتەۋ جانە باسەكەلەستىكتى قورعاۋ كوميتەتىنىڭ استانا قالاسى بويىنشا دەپارتامەنتى 2015 جىلعى ينۆەستيتسيالىق باعدارلامانىڭ ورىندالۋ ايقىندىعى مەن اشىقتىعىن تەكسەرۋ ماقساتىندا «استانا-اەك» اق نىساندارىندا ءباسپاسوز تۋرىن ۇيىمداستىردى.
تابيعي مونوپوليا سۋبەكتىسى رەتىندە «استانا-اەك» كومپانياسى ەلوردا حالقىن ەلەكتر ەنەرگياسىمەن قامتاماسىز ەتۋدى ءوز مىندەتىنە العان. اتالمىش مەكەمەدەگى دامۋ قىزمەتى باسشىسىنىڭ ورىنباسارى مارعۇلان ءبالساريننىڭ ايتۋىنشا, بىلتىرعى 1 قاڭتار مەن 31 جەلتوقسان ارالىعىنداعى كەزەڭدە ۇيىم 1 ملرد 580 ملن تەڭگە كولەمىندەگى ينۆەستيتسيالىق باعدارلامانى ىسكە اسىرىپتى. بۇل كورسەتكىش 2015 جىلعا جوسپارلانعان ينۆەستيتسيا سوماسىنىڭ 104 پايىزىن قۇرايدى.
ونىڭ ىشىندە 43 ملن تەڭگەگە – ەلەكتر جەلىلەرىن قايتا قۇرۋ, 663 ملن تەڭگەگە – ەسكىرگەن قۇرال-جابدىقتاردى اۋىستىرۋ, 99 ملن تەڭگەگە – رەلەلىك قورعانىستى اۋىستىرۋ, 9 ملن تەڭگەگە – ءۇپ-10/0,4 تەلەمەحانيكاسىن ەندىرۋ, 8 ملن تەڭگەگە – سۋ قۇبىرى مەن كارىزدى جوبالاۋ جانە سالۋ, 75 ملن تەڭگەگە كۇردەلى جوندەۋ جۇمىستارى جۇرگىزىلىپ, 8 ملن تەڭگەگە ارنايى مامانداندىرىلعان تەحنيكالار ساتىپ الىنعان.
2015 جىلعى ينۆەستيتسيا سالىمىنىڭ ارقاسىندا كوپتەگەن وڭ وزگەرىستەردىڭ بولعانى بايقالادى. دالىرەك ايتساق, ەلەكتر تەحنيكالىق قۇرال-جابدىقتاردىڭ جانە ەلەكتر جەتكىزۋ جەلىسىنىڭ جۇمىس ساپاسى ارتقان, تۇتىنۋشىلاردىڭ قوسىمشا ەلەكتر قۋاتىنا سۇرانىستارى قاناعاتتاندىرىلعان. جالپى, ەكونوميكالىق ناتيجە قۇنى 112,8 ملن تەڭگەگە جەتكەن. ماسەلەن, 33565,7 مىڭ كۆت/ساع ەلەكتر ەنەرگياسىن پايدالى بوساتۋدى ارتتىرۋ ەسەبىنەن قىزمەتتى ىسكە اسىرۋ تابىسى 97,3 ملن تەڭگەگە كوبەيدى. مۇنىمەن قوسا, 253 مىڭ كۆت/ساع كولەمدەگى ەلەكتر ەنەرگياسىن ۇنەمدەۋ ارقىلى شارۋاشىلىق قاجەتتىلىكتەرگە ەلەكتر ەنەرگياسىن ساتىپ الۋ شىعىندارى 2,1 ملن تەڭگەگە قىسقاردى. سونداي-اق, ەكسپلۋاتاتسيالىق شىعىن 13,4 ملن تەڭگەگە ازايدى.
بۇگىندە ينۆەستيتسيالىق باعدارلامانى يگەرۋ الدىن-الا جوسپارلانعان كەستەگە سايكەس جۇرگىزىلۋدە. ول 2016 جىلى نورماتيۆتىك شىعىنداردى 12,4 پايىزدان 11,95 پايىزعا دەيىن ازايتۋعا, ەلەكتر ەنەرگياسىن پايدالى بوساتۋدى 6 پايىزعا دەيىن جوعارىلاتۋعا, اپات دەڭگەيىن 10 پايىزعا دەيىن ازايتۋعا مۇمكىندىك بەرەدى.
بوتاگوز ماراتقىزى
