قازاقستاننىڭ يندونەزياداعى ەلشىسى سەرجان ابدىكارىموۆ يندونەزيانىڭ ءبىلىم جانە مادەنيەت ءمينيسترىنىڭ ورىنباسارى حيلمار فاريدپەن كەزدەسىپ, مادەني-گۋمانيتارلىق جانە ءبىلىم بەرۋ سالالارىنداعى ەكىجاقتى قاتىناستاردى كەڭەيتۋ ماسەلەلەرىن جان-جاقتى تالقىلادى, دەپ حابارلايدى astana-akshamy.kz.
ديپلومات استانا مەن دجاكارتا اراسىنداعى ءوسىپ كەلە جاتقان ىنتىماقتاستىقتىڭ اعىمداعى جاعدايى مەن كەلەشەگى, جەتەكشى ۋنيۆەرسيتەتتەر اراسىنداعى كەلىسىمدەردىڭ ىسكە اسىرىلۋى جانە ستۋدەنتتەرمەن الماسۋ, ەكى ەلدىڭ ۇلتتىق كىتاپحانالارى, يندونەزيانىڭ ءبىلىم بەرۋ مەكەمەلەرىندەگى قازاق تاريحى مەن مادەنيەتى ورتالىقتارىنىڭ قىزمەتى تۋرالى ايتىپ بەردى.
يندونەزيادا مۋزىكالىق توپتار مەن وركەسترلەردىڭ كونتسەرتتەرىن, قازاق ءسانى مەن كينوسىنىڭ كورسەتىلىمدەرىن وتكىزۋدىڭ ۇيىمداستىرۋشىلىق ماسەلەلەرىن تالقىلاۋعا ەرەكشە نازار اۋدارىلدى.
ءمينيستردىڭ ورىنباسارى ەلدەگى جىل سايىنعى حالىقارالىق جانە ۇلتتىق شىعارماشىلىق فەستيۆالدار تۋرالى ايتىپ, قازاق سەرىكتەستەرىن ولارعا قاتىسۋعا شاقىردى, سونداي-اق قازاقستاننىڭ مادەني-گۋمانيتارلىق ءىس-شارالارىن وتكىزۋ بويىنشا قولداۋ كورسەتۋگە دايىن ەكەنىن راستادى.
سۇحباتتاسۋشىلار اتالعان جوسپارلاردى جۇزەگە اسىرۋ بويىنشا تىعىز جۇمىستى جالعاستىرۋعا كەلىستى.
