ەلىمىزدە ەلدىڭ مارتەبەسىن كوتەرەتىن, ادال قىزمەت ەتىپ, كەلەشەك ۇرپاقتىڭ قامىن ويلايتىن جاستاردى جۇمىسقا تۇرعىزۋ ءۇشىن جاسالىپ جاتقان مۇمكىندىكتەر قاتارى از ەمەس.
اتاپ ايتقاندا, جۋىردا پرەزيدەنتتىك كادرلىق رەزەرۆىنە كەزەكتى ىرىكتەۋ وتكىزىلىپ, 50 ادام رەزەرۆكە الىندى.
سونداي-اق جوعارى نەمەسە جوعارى وقۋ ورنىنان كەيىنگى ءبىلىم بەرۋ باعدارلامالارى بويىنشا مەملەكەتتىك تاپسىرىس شەڭبەرىندە ءبىلىم بەرۋ ۇيىمدارىن (GPA 3.33-تەن جوعارى) اياقتاعان تۇلەككە 1 جىل ىشىندە وبلىستارداعى اۋدان, اۋىل دەڭگەيىندەگى تومەنگى مەملەكەتتىك لاۋازىمدارعا كونكۋرسسىز ورنالاسۋ مۇمكىندىگى, «E-Qyzmet» جۇيەسى ارقىلى مەملەكەتتىك قىزمەتكە ىرىكتەۋدىڭ قاناتقاقتى جوباسى جانە وبلىستىڭ, رەسپۋبليكالىق ماڭىزى بار قالانىڭ, استانانىڭ وڭىرلىك كادر رەزەرۆى جۇزەگە اسىپ جاتىر.
سونىڭ ءبىرى, وڭىرلىك كادر رەزەرۆىنە ىرىكتەۋ العاش رەت وتكىزىلۋدە جانە ونى ەلىمىزدىڭ ءار وڭىرىندەگى كادر كوميسسياسى جۇزەگە اسىرادى. ىرىكتەۋگە 35 جاستان اسپاعان, جوعارى ءبىلىمى جəنە 3 جىلدان كەم ەمەس ەڭبەك ءوتىلى بار قازاقستان رەسپۋبليكاسىنىڭ ازاماتتارى قاتىسا الادى.
استانا قالاسىنىڭ وڭىرلىك كادر رەزەرۆى الەۋمەتتىك سالا, تۇرعىن ءۇي-كوممۋنالدىق شارۋاشىلىق جانە ينفراقۇرىلىم, ەكولوگيا, تسيفرلاندىرۋ باعىتتارى بويىنشا جۇزەگە اساتىن بولادى.
بۇل جوباعا قۇجات قابىلداۋ اعىمداعى جىلدىڭ 1 ناۋرىزدا باستالىپ, 31 ناۋرىزعا دەيىن جالعاساتىن بولادى. وڭىرلىك رەزەرۆكە قاتىسۋ ءۇشىن ۇمىتكەرلەر ءتيىستى قۇجاتتارىن تاپسىرىپ بولعاننان كەيىن, زاڭنامانى ءبىلۋ بويىنشا تەستىلەۋ, جەكە قاسيەتتەرىن جانە اسسەسسمەنت-ورتالىق جۇرگىزەتىن قۇزىرەتتەردى باعالاۋ, كوميسسياداعى قۇرىلىمدىق سۇحبات كەزەڭدەرىنەن ءوتۋى ءتيىس. وسى كەزەڭدەردەن سۇرىنبەي ءساتتى وتكەن ۇمىتكەرلەر وڭىرلىك رەزەرۆكە ەكى جىل مەرزىمگە الىنىپ, ولار تۋرالى اقپارات اگەنتتىكتىڭ ينتەرنەت-رەسۋرستارىندا, سونداي-اق onir.pkrezerv.kz ونلاين-پلاتفورماسىندا جاريالانادى.
وسى سەكىلدى ەلىمىزدە مەملەكەتتىك قىزمەتكە ىرىكتەۋدى جەڭىلدەتىپ, ءوز تيىمدىلىگىن كورسەتەتىن جوبالار مەملەكەتتىك اپپاراتتا بىلىكتى جاس مامانداردىڭ جۇمىس ىستەۋ كورسەتكىشىن ارتتىراتىنى انىق.
ال مەملەكەتتىك قىزمەتكە ىرىكتەۋ بويىنشا شەتەلدەردە دە وسىعان ۇقساس جوبالار بار. اتاپ ايتاتىن بولساق, مەملەكەتتىك باسقارۋ جانە ونەركاسىپتىك مەنەدجمەنت مەكتەبىنىڭ قىزمەتىنە ەرەكشە نازار اۋدارىلاتىن جاپونيادا كادرلىق رەزەرۆتەردى دايىنداۋدىڭ قىزىقتى تاجىريبەسى جيناقتالعان. بۇل مەكتەپتىڭ تۇلەكتەرى, تاجىريبە كورسەتكەندەي, جاپونيانىڭ ساياسي جانە ەكونوميكالىق كوشباسشىلارىنا اينالادى, ياعني كادرلىق رەزەرۆتە ۇزاق مەرزىمدى پەرسپەكتيۆادا مەملەكەتتە جوعارى لاۋازىمداردى اتقارۋعا ءتيىستى ادامداردى دايىنداۋ باسىمدىققا يە. ەرەكشىلىگى – ءبىلىمى جانە كاسىبي تاجىريبەسى بار, جاسى 25-تەن اسپاعان, دەنى ساۋ ەر ادامدار عانا وقيدى.
ۇلىبريتانيادا مەملەكەتتىك قىزمەتتەگى كادرلىق رەزەرۆپەن جۇمىس «جىلدام اعىن» باعدارلاماسى بويىنشا جۇزەگە اسىرىلادى. بۇل رەزەرۆتەن بوس لاۋازىمعا جانە كەرىسىنشە كادرلاردىڭ جىلدام روتاتسياسىن جەڭىلدەتەدى. باعدارلامانىڭ قاعيداسى: ۇمىتكەرلەر تاجىريبە جيناقتاۋ ءۇشىن قىزمەتكە كىرگەننەن كەيىن بىرنەشە جىل بويى بولىمنەن بولىمگە بەلسەندى تۇردە اۋىستىرىلادى. بەس جىلدان كەيىن ۇمىتكەرلەر باعدارلامادان كەتەدى, ال ولاردىڭ مانسابى كەيىننەن مەملەكەتتىك ورگاندارداعى پەرسونالدى باسقارۋدىڭ جالپى پرينتسيپتەرىنە سايكەس قۇرىلادى.
اقش-تا مەملەكەتتىك قىزمەتشىلەردىڭ كادرلىق رەزەرۆىن ىرىكتەۋ جانە ونىمەن جۇمىس ىستەۋ جۇيەسى, نەگىزىنەن, امەريكالىق كوممەرتسيالىق فيرمالاردىڭ كادرلىق ساياساتىنىڭ تاجىريبەسىنە نەگىزدەلگەن. بۇل جەردە ەڭ الدىمەن, General Motors, General Electric, Microsoft سياقتى ءىرى كورپوراتسيالار تۋرالى بولىپ جاتىر. بۇل كوممەرتسيالىق كومپانيالاردا كادرلىق رەزەرۆ تەحنولوگياسىنىڭ ءمانى قاراپايىم: كومپانيا قىزمەتكەرلەرىنىڭ اراسىنان كەلەشەگى زور قىزمەتكەرلەر ىرىكتەلىپ الىنادى, ولار كەيىننەن باسشىلىق قىزمەتتەردى اتقارا الادى.
حالىقارالىق تاجىريبەگە قاراي وتىرىپ, ارقايسىمىز جاڭا قازاقستاننىڭ قۇرىلۋىنا ۇلەس قوسىپ, جاڭا رۋحاني وركەنيەتىمىزدىڭ نەگىزىن قالاۋعا, قولداۋعا, قورعاۋعا اتسالىسايىق! قازاقستاننىڭ جاڭارعان كەلبەتىن قالىپتاستىرۋ جاستاردىڭ مىندەتىنە اينالسىن!
مەملەكەتتىك قىزمەت ىستەرى
اگەنتتىگىنىڭ استانا قالاسى
بويىنشا دەپارتامەنتى
