استانا قالاسىنىڭ اكىمى ادىلبەك جاقسىبەكوۆ ليتۆا رەسپۋبليكاسىنىڭ پرەمەر-ءمينيسترى الگيرداس بۋتكياۆيچيۋسپەن كەزدەستى. ەكى جاق ساۋدا-ەكونوميكالىق, عىلىمي-تەحنيكالىق جانە مادەني بايلانىستار بويىنشا بىرقاتار ماسەلەلەردى تالقىلادى دەپ حابارلايدى قالا اكىمىنىڭ ءباسپاسوز قىزمەتى.
ەلوردا اكىمى ەكى ەلدى بايلانىستىراتىن ءارى قارقىندى دامىپ جاتقان سالالارداعى ءوزارا ىنتىماقتاستىققا توقتالىپ ءوتتى.
ستاتيستيكالىق مالىمەتتەرگە سايكەس, وتكەن جىلدىڭ قورىتىندىسى بويىنشا قازاقستان مەن ليتۆا اراسىنداعى تاۋار اينالىمى 37%-عا ارتىپ, 436,5 ميلليون اقش دوللارىنا جەتكەن.
– پوستكەڭەستىك كەڭىستىكتەگى قازىرگى ساياسي جاعدايعا بايلانىستى ءبىزدىڭ مەملەكەت ليتۆالىق ءونىمدى ەۋرازيالىق ەكونوميكالىق وداققا وتكىزۋدىڭ ماڭىزدى ارناسى بولا الار ەدى.
وسى تۇرعىدان العاندا, ءبىز ورتاق كاسىپورىندار اشۋعا مۇددەلىمىز, ول ءۇشىن «استانا – جاڭا قالا» ارنايى ەكونوميكالىق ايماق سەكىلدى ءتيىمدى اۋماق قۇرىلعان. وعان قاتىسۋشىلار ايتارلىقتاي كەدەندىك جانە سالىقتىق جەڭىلدىكتەرگە يە بولادى, – دەدى قالا باسشىسى.
اكىم, سونداي-اق, ليتۆالىق كاسىپكەرلەرمەن ىسكەرلىك بايلانىس ورناتۋدىڭ نەگىزى ەكى ەل استانالارى اراسىنداعى ساۋدا-ەكونوميكالىق, عىلىمي-تەحنيكالىق جانە مادەني ىنتىماقتاستىق تۋرالى كەلىسىم بولىپ تابىلاتىنىن اتاپ ءوتتى. ايتپاقشى, ءبىر اپتا بۇرىن مەملەكەتتەردىڭ كەلىسىمدىك قارىم-قاتىناسىنا 15 جىل تولدى.
ليتۆا ۇكىمەتىنىڭ باسشىسى استانا مەن ۆيلنيۋس اراسىنداعى قارىم-قاتىناستىڭ قارقىندى دامىپ كەلە جاتقانىن ايتا كەلىپ, ءوزارا ىنتىماقتاستىقتىڭ ودان ءارى داميتىنىنا سەنىم ارتتى.
ءا.جاقسىبەكوۆ ليتۆالىقتاردىڭ استانانىڭ دامۋىنا بەلسەندى اتسالىسىپ جاتقانىن, اسىرەسە, «استانا» باسكەتبول كلۋبىنىڭ باس باپكەرى رامۋناس بۋتاۋتاستى, ەلورداداعى جاڭا قازاق جانە ورىس دراما تەاترلارىنىڭ قۇرىلىسىنا ارنالعان ەكسيز-جوبالاردىڭ اۆتورلارىن – ليتۆالىق ساۋلەتشىلەردى مىسال رەتىندە اتاپ ءوتتى.
– ۆيلنيۋسپەن ىنتىماقتاستىق جانە جالپى ليتۆالىق كاسىپكەرلەرمەن بايلانىس ورناتۋ, اسىرەسە, قالا شارۋاشىلىعى, دەنساۋلىق ساقتاۋ, ءبىلىم بەرۋ سالالارىنداعى «اقىلدى» تەحنولوگيالار سىندى باعىتتار بويىنشا ۇلكەن قىزىعۋشىلىق تۋدىرۋدا. بۇل ساپارىڭىز قازاقستاندىق-ليتۆالىق قارىم-قاتىناسقا, سونىڭ ىشىندە وڭىرارالىق ىنتىماقتاستىق دەڭگەيىنە قوسىمشا سەرپىن بەرەتىنىنە سەنىمدىمىن, – دەپ قورىتىندىلادى ءسوزىن قالا باسشىسى.
