كەشە «استانا وپەرا» تەاترىندا ۇلى جەڭىستىڭ 70 جىلدىق تورقالى تويى مەن داڭقتى كومپوزيتور پەتر چايكوۆسكيدىڭ تۋعانىنا 175 جىل تولۋىنا وراي ادەيىلەپ رەسەيدەن ات ارىتىپ كەلگەن, ونەرىن الەم جۇرتى مويىنداعان كورنەكتى ديريجەر ۆالەري گەرگيەۆ, پيانيست دەنيس ماتسۋەۆ جانە ماريا تەاترىنىڭ سيمفونيالىق وركەسترى مۇشەلەرىنىڭ قاتىسۋىمەن جىلى شۋاققا تولى گالا-كونتسەرت ءوتتى.
ارقاعا كەش كەلەتىن كوركەم كوكتەمنىڭ ادام جان دۇنيەسىن جەلپىپ وتەتىن «التىنكۇرەك» سامالىنداي لەبى بار اسەرگە تولى كەشتە وسىمەن ءۇشىنشى مارتە ءوتىپ وتىرعان جاس پيانينوشىلاردىڭ III «Astana Piano Passion» حالىقارالىق فەستيۆالى دە سالتاناتتى تۇردە اشىلدى. جالپى, تەاتر ساحناسىندا ەكى دارىندى ونەرپاز بەن حالىقارالىق بايقاۋدىڭ ءبىر ارنادا توعىسىپ وتكەنى, بىلايشا ايتقاندا, الدىن الا ەش جوبالانباعان, ءبىر كۇنگە بارلىعى توقايلاسقان ءساتتى شارا بولدى. رەسەيدىڭ حالىق ءارتىسى دەنيس ماتسۋەۆتىڭ ءوزى چايكوۆسكيدىڭ وركەسترمەن فورتەپيانوعا ارنالعان جۇرەكتىڭ نازىك قىلىن شەرتەتىن كلاسسيكالىق شىعارمالارىن جوعارعى دارەجەدە ورىندادى. ال ماريا تەاترىنىڭ سيمفونيالىق وركەسترىنىڭ مۋزىكانتتارى مەن ماەسترو ۆالەري گەرگيەۆتىڭ شەبەرلىگى مەن تالانتىنا ءتانتى بولماعان جان كەمدە-كەم شىعار.
جالپى, مادەني شارا باستالماس بۇرىن جۋرناليستەر قاۋىمىمەن تىلدەسكەن ءباسپاسوز ءماسليحاتىندا الىستان كەلگەن قوناقتاردىڭ ءبىزدىڭ ەلىمىز تۋرالى, ونىڭ ونەرى جايىندا ايتقان اڭگىمەلەرى دە اسەرلى. ماسەلەن, ۆالەري گەرگيەۆتىڭ ايتقان سوزدەرى تاعىلىمدى ويعا تولى بولدى.
– مەن قازاق ەلىنە وسىمەن التىنشى رەت كەلىپ تۇرمىن. قازاق جۇرتى – قوناقجاي, دارحان,
دارىندى تۇلعالارعا باي حالىق. مەن وسى ەلگە كەلگەندە ءوز ۇيىمدە جۇرگەندەي سەزىنەم. قازاقستانعا العاش وسىدان وتىز جىل بۇرىن كەلگەن ەدىم. ول كەزدە جاس ديريجەرمىن. ءتىپتى, سول كەزدە دىنمۇحامەد قوناەۆتىڭ ءوزى جىلىشىراي بىلدىرگەن. سونداي-اق, ەلباسى نۇرسۇلتان نازارباەۆ تا مەنى جاقسى تانيدى. وسى ءبىر-ەكى كۇننەن كەيىن ەلدەرىڭىزدە تاريحي ۋاقيعا وتپەك. بارلىق حالىق وسى ءساتتى اسىعا كۇتىپ وتىرعانىن تۇسىنەمىن. قازاق ەلىمەن ءبىزدىڭ ونەردەگى بايلانىسىمىز ەشقاشان ۇزىلمەيدى, قايتا ۇدەي بەرەدى, – دەدى كورنەكتى ديريجەر.
ودان كەيىن ءسوز العان جوعارىدا ايتىپ وتكەن حالىقارالىق فەستيۆالدىڭ جوبا جەتەكشىسى د. ماتسۋەۆ بايقاۋ تۋرالى قىسقاشا ايتىپ ءوتتى.
– وسىمەن ءۇشىنشى رەت وتكەلى وتىرعان بايقاۋعا الەمنىڭ 45 ەلىنەن 400-گە جۋىق ءوتىنىش ءتۇستى. جىل سايىن قاتىسۋعا ۇمىتكەرلەر سانى كوبەيىپ كەلەدى. بۇل فەستيۆالدىڭ حالىقارالىق برەندكە اينالىپ كەلە جاتقاندىعىن كورسەتەدى. اتالعان جوبا اۋەلدەن-اق ەرەكشەلىگىمەن الەمدىك وندىققا ەش كەدەرگىسىز ەنىپ كەتەدى. سوندىقتان, بايقاۋدىڭ جۇلدەلىك قورى, وتكىزۋ ەرەجەلەرىنىڭ ءوزى باسقا ونەر سايىستارىنان جوعارى, – دەدى جوبا جەتەكشىسى. ءباسپاسوز جيىنىن جۇرگىزگەن «استانا وپەرا» تەاترىنىڭ ديرەكتورى تولەۋبەك الپيەۆتىڭ ءوزى وسىنداي بارلىق ەلگە تانىلعان ايتۋلى تۇلعالاردىڭ كەلىپ, ونەر كورسەتۋى تەاتر ءۇشىن عانا ەمەس, ەلوردا تۇرعىندارى ءۇشىن ۇلكەن مەرەكە ەكەنىن جەتكىزدى. سونىمەن, شىمىلدىعى تۇرىلگەن III «Astana Piano Passion» حالىقارالىق فەستيۆالى 30 ساۋىرگە دەيىن سوزىلماق.
ازامات ەسەنجول
