استانادا بوكستان افينا وليمپياداسىنىڭ چەمپيونى باقتيار ارتاەۆتىڭ العاشقى حالىقارالىق اشىق ءتۋرنيرى ءوتتى, دەپ حابارلايدى astana-akshamy.kz.
«Beeline Arena» سپورت كەشەنىندە 2008-2009 جىلدارى تۋعان جاسوسپىرىمدەر اراسىندا 14 سالماق بويىنشا جەڭىمپازدار انىقتالدى.
«بىرنەشە دۇركىن وليمپيادا چەمپيونىن شىعارۋ ءۇشىن 15-16 جاستاعى جاسوسپىرىمدەرگە قازىردەن كوڭىل ءبولۋ كەرەك. وسى ماقسات مەنىڭ ءبىراز ۋاقىتتان ويىمدا ءجۇر ەدى. مىنە, ەندى يدەيامنىڭ العاشقى قادامى جاسالدى. ءبىرىنشى رەت وتكىزىلگەن سوڭ, ءبىرشاما كەمشىلىكتەر بولدى. تۋرنيرگە تەك ورتالىق ازيا ەلدەرىنەن عانا قاتىستى. الداعى ۋاقىتتا مەملەكەتتەردىڭ سانىن تاعى دا ارتتىرۋدى كوزدەيمىن. سونداي-اق, جۇلدە قورىن دا مولايتۋدى قالايمىن. جاسوسپىرىمدەر بوكسى بولعانىمەن, قاتىسۋشىلاردىڭ جەڭىسكە دەگەن جىگەرى, تەحنيكاسى ەرەسەكتەردەن كەم تۇسپەيدى. اسىرەسە, جەڭىل سالماقتاعى بوكسشىلارعا قاتتى ريزا بولدىم», – دەدى باقتيار ارتاەۆ.
5 كۇندىك جارىس بويىنشا استانا قالاسى 1 التىن, 1 كۇمىس, 3 قولا يەمدەنىپ, جالپى ەسەپتە 5-ورىنعا تۇراقتادى.
باسەكەنى باستان-اياق قازاقستاننىڭ جاسوسپىرىمدەر ۇلتتىق قۇراماسىنىڭ تىزىگىنىن ۇستايتىن ماقسات وسپانوۆ تا باقىلادى:
«جاسوسپىرىمدەرگە تاعى دا ءبىر ءتۋرنيردىڭ قوسىلعانى قۋانتادى. سەبەبى, ولار ءۇشىن تاجىريبە الماسۋعا ۇلكەن مۇمكىندىك. حالىقارالىق دودالاردا ءتۇرلى سپورتشىلاردىڭ باعى جانۋى مۇمكىن. ءتىپتى قازاقستان چەمپيونى اتانعان بوكسشىلاردىڭ 60-70%-ى وسى باسەكەدە 1-ورىن الا المادى. بۇل دا وزگە جاسوسپىرىمدەرىمىزدىڭ بيىكتەن كورۋىنە اسەر ەتەدى. الداعى ۋاقىتتا بوكسشىلارىمىز ازيا چەمپيوناتىنا دايىندىقتارىن جالعاستىرادى», — دەدى ول.
تۋرنير قورىتىندىسىندا تەك جۇلدەگەرلەر عانا ەمەس, ۇزدىك بوكس ۇلگىسىن كورسەتكەن جانە كورەرمەن كوزايىمى نوميناتسياسى بويىنشا دا سپورتشىلار ماراپاتتالدى.
جۇلدەگەرلەرگە اقشالاي سىيلىقتار مەن مەدال بەرىلدى.
