استانا قالاسى تىلدەردى دامىتۋ جانە ارحيۆ ءىسى باسقارماسىنىڭ ۇيىمداستىرۋىمەن ەلوردادا «استانا ناۋرىزى» اتتى مەرەكەلىك كەش ءوتتى. كەش بارىسىندا ناۋرىز مەيرامى كەزىندە باس قالادا اتقارىلعان جۇمىستار مەن ونىڭ قورىتىندىسى كوپشىلىك نازارىنا ۇسىنىلدى, دەپ حابارلايدى astana-akshamy.kz.
بيىل مەملەكەت باسشىسىنىڭ باستاماسىمەن ەلىمىزدە ناۋرىزناما تۇجىرىمداماسى بەكىتىلدى. وعان سايكەس 14-23 ناۋرىز ارالىعىندا حالىقتىق مەرەكەنى تويلاۋعا ارنالعان ناۋرىزناما ونكۇندىگى جاريالاندى. بۇل ونكۇندىك اياسىندا ءتول مەرەكەمىزدى تويلاۋدىڭ جاڭا داستۇرلەرىن قالىپتاستىرىپ, ۇلتتىق قۇندىلىقتاردى كەڭىنەن ناسيحاتتاپ, مەملەكەتتىك ءتىلدىڭ قولدانىلۋ اياسىن كەڭەيتۋدە قالالىق تىلدەردى دامىتۋ جانە ارحيۆ ءىسى باسقارماسى بىرقاتار ءىس-شارالار كەشەنىن وتكىزدى. ءار كۇننىڭ مازمۇنى مەن تاقىرىبىنا ساي ەلوردادا ءتۇرلى اكتسيالار مەن ءىس-شارالار ۇيىمداستىرىلىپ, تەرەڭ ءمان-مازمۇنعا يە بولدى.
«ناۋرىزناما ونكۇندىگى بارىسىندا ەلوردادا بىرقاتار جوبالار وتكىزىلدى. اتاپ ايتار بولساق, «قازاقشا Quiz» ينتەللەكتۋالدى سايىسى, «ءتىل جاناشىرى» اكتسياسى, قالانىڭ ورتالىق الاڭدارىندا سالت-ءداستۇردى ناسيحاتتاۋعا بايلانىستى ەلوردالىقتار اۋقىمدى ءىس-شارالاردىڭ كۋاسى بولىپ, مەرەكەلىك كوڭىل-كۇيدى تولىق سەزىنە الدى دەسەك بولادى. ەلوردا اكىمدىگىنىڭ قولداۋىمەن وتكەن ءىس-شارالاردىڭ بىرىندە 100 مىڭنان استام ادام باس قوستى. بۇل كورسەتكىش – كوپشىلىكتىڭ ۇلتتىق قۇندىلىقتاردى ۇلىقتاپ, باعالاۋىنىڭ كورىنىسى», – دەدى ءوز سوزىندە قالالىق تىلدەردى دامىتۋ جانە ارحيۆ ءىسى باسقارماسى «رۋحانيات» كوممۋنالدىق مەملەكەتتىك مەكەمەسىنىڭ باسشىسى ءادىل ورىنباسارۇلى.
زيالى قاۋىم وكىلدەرى, اقىن-جازۋشىلاردىڭ قتىسۋىمەن وتكەن كەشتە سونداي-اق رۋحاني قۇندىلىقتارىمىزدى ۇلىقتاپ, قازاق ءتىلىنىڭ مارتەبەسىن كوتەرۋدە ەلەۋلى ەڭبەك ەتىپ جۇرگەن ءبىر توپ ءتىل جاناشىرى ماراپاتتالدى. سولاردىڭ ءبىرى – ەلوردالىق باپكەر, حالىقارالىق دارەجەدەگى سپورت شەبەرى مۇحيت امانتاەۆ.
«ناۋرىزناما ونكۇندىگى داستۇرگە بەرىك بولىپ, قازاقى قالپىمىزدى ساقتاپ قالۋدىڭ ماڭىزىن دالەلدەپ بەردى. اسىرەسە, ءوز تىلىمىزدە سويلەپ, ۇلتتىق قۇندىلىقتاردان اجىراپ قالماۋدىڭ ءمانى وراسان. سەبەبى كەز كەلگەن ەلدىڭ جويىلۋى بىرىنشىدەن, ءتول قۇندىلىقتاردىڭ جويىلۋىمەن بايلانىستى. اتا-بابا اماناتى وسكەلەڭ ۇرپاقتىڭ ۇلتجاندى بولۋىمەن ساقتالادى» دەدى سپورت جاتتىقتىرۋشىسى.
مەرەكەلىك كەش بارىسىندا كوپشىلىك ءۇشىن تەاترلاندىرىلعان قويىلىم كورسەتىلىپ, «شالقىما» بي ءانسامبلى وزونەرىن پاش ەتسە, اقىن مەيىربەك سۇلتانحان ناۋرىز تۋرالى ارناۋىن تارتۋ ەتتى. كەش سوڭى كونتسەرتتىك باعدارلامامەن اياقتالدى.
