ەلوردادا 32 كاسىپتىك ورتا ءبىلىم بەرۋ ۇيىمى بار. سونىڭ ىشىندە نارىققا ساي ماماندار ازىرلەپ, الەۋمەتتىڭ سۇرانىسىنا جاۋاپ بەرىپ وتىرعان ءبىلىم ورداسىنىڭ ءبىرى – قازتۇتىنۋوداعى جوعارى كوللەدجى. جاڭا زامان تالاپتارىنا جاۋاپ بەرەتىن, قۇرىلعانىنا 68 جىل بولعان وقۋ ورنى – زور مۇمكىندىكتەر الاڭى. بۇگىن ءبىز ەلورداداعى قازتۇتىنۋوداعى جوعارى كوللەدجىنىڭ ديرەكتورى مىرزابەك كۇجىموۆپەن سۇحباتتاستىق.
– مىرزابەك تورەبەكۇلى, قولجەتىمدى جانە ساپالى تەحنيكالىق جانە كاسىپتىك بىلىممەن قامتاماسىز ەتۋ – «ءبىلىمدى ۇلت» ساپالى ءبىلىم بەرۋ» ۇلتتىق جوباسىنىڭ نەگىزگى مىندەتىنىڭ ءبىرى. كوللەدجدە بالالاردىڭ تەگىن ءبىلىم الىپ, بىلىكتى مامان بولىپ قالىپتاسۋى – مەملەكەتتىڭ ايرىقشا باقىلاۋىندا. كوللەدج وسى تالاپتار ۇدەسىنەن شىعىپ وتىر ما؟
– ۇكىمەت كادر دايارلاۋ, اسىرەسە جۇمىسشى ماماندىقتاردى ازىرلەۋ ماسەلەسىنە قاتتى كوڭىل بولەدى. قازاقستان ەكونوميكاسى قۋاتتى بولۋ ءۇشىن ونىڭ كادرلارى بىلىكتى بولۋى كەرەك. سوندىقتان دا جاس مامان كادرلارعا كاسىپتىك ءبىلىم سالاسىندا مەملەكەت كوپ جاعداي جاساپ وتىر. مەملەكەت تاراپىنان نەگىزگى شەشىلگەن ماسەلە – تەگىن وقۋ. قازىرگى 9-سىنىپتى بىتىرگەن وقۋشىلار ەكونوميكاعا كەرەك ماماندىق بويىنشا تەگىن وقي الادى. بۇل – وتە تاماشا قادام. مەملەكەتتىك تاپسىرىس قازىر جەتكىلىكتى تۇردە بەرىلىپ وتىر, جىل سايىن سانى كوبەيۋدە. ساپاسى تۋرالى ايتاتىن بولساق, نارىققا بايلانىستى قازىر كوللەدجدەرگە اكادەميالىق دەربەستىك بەرىلدى. وندا كوللەدج وقۋ باعدارلامالارىن جۇمىس بەرۋشىلەرمەن بىرگە دايىندايدى. مۇنى وتە دۇرىس قادام دەپ ايتۋعا ابدەن بولادى. بىرىنشىدەن, ساپالى, بىلىكتى مامان دايارلاۋعا تىكەلەي وزدەرى قاتىسقاندىقتان, جۇمىس بەرۋشىلەردىڭ كادرعا قاتىستى سىن ايتۋى ازايدى, وسى پروتسەستى بارىنشا جەتىلدىرۋگە تىرىسادى. ەكىنشىدەن, بيىل, مىنە, ءۇشىنشى جىلعا كەتتى, جۇمىس بەرۋشىلەردىڭ تاپسىرىسى بويىنشا ماقساتتى تۇردە دايىنداۋ (تسەلەۆوي گوسزاكاز) جۇزەگە اسىپ وتىر. بۇل دا جاستارىمىز ءۇشىن تاماشا مۇمكىندىك دەۋگە بولادى. تالاپكەر ەمتيحانسىز, كونكۋرسسىز, تەگىن, شاكىرتاقى الىپ, ءوزى تاڭداعان ماماندىق بويىنشا وقۋعا تۇسە الادى. تەك ءبىر تالابى بار – جۇمىس بەرۋشى تالاپكەردى اڭگىمەلەسۋ ارقىلى قابىلدايدى. ءبىزدىڭ كوللەدج دە, باسقا كوللەدجدەر دە ساپالى كادرلاردى دايارلاۋ ءۇشىن وسىنداي ماقساتتى جۇمىس ىستەپ وتىر دەۋگە بولادى.
– ەكونوميكا, سەرۆيس جانە اقپاراتتىق تەحنولوگيا سالالارى بويىنشا ەڭبەك نارىعىندا باسەكەگە قابىلەتتى, قۇزىرەتتى ماماندار دايارلاۋعا باعىتتالعان ءبىلىم بەرۋ قىزمەتىن ىسكە اسىرۋ – كوللەدجدىڭ ميسسياسى. قاجەتتى ماتەريالدىق-تەحنيكالىق بازاسى قالاي, پەداگوگتار تاپشىلىعى بار ما؟
– ماتەريالدىق-تەحنيكالىق بازا وقۋ پروتسەسىندە ۇلكەن ءرول اتقارادى. كوللەدج قاراۋىنداعى وقۋ عيماراتىندا 138 ورىندىق 6 كومپيۋتەر سىنىبى جانە 22 اۋديتوريا, ونىڭ ىشىندە ينتەراكتيۆتى جابدىقتارمەن جاساقتالعان 15 كابينەت بار. 21668 كىتاپتى قۇرايتىن كىتاپحانامىز, 5 قاباتتى جاتاقحانامىز بار, وقيمىن دەگەن بالاعا بارلىق جاعداي جاسالعان. وسىدان بىرنەشە جىل بۇرىن «ەسەپتەۋ تەحنيكاسى جانە باعدارلامالىق قامتاماسىز ەتۋ» ماماندىعى بويىنشا حالىقارالىق قايتا قۇرۋ جانە دامۋ بانكىنىڭ (دۇنيەجۇزىلىك بانك) 380000 اقش دوللارى كولەمىندەگى گرانتىن جەڭىپ الدىق. وسى قارجىعا كوللەدجدىڭ ماتەريالدىق جانە تەحنيكالىق بازاسى جەتىلدىرىلدى, وسى ماماندىق بويىنشا كاسىبي مودۋلدار ازىرلەندى, وقىتۋشىلار ەلىمىزدە جانە شەتەلدە كاسىبي بىلىكتىلىگىن ارتتىرۋ كۋرسىنان ءوتىپ, تاجىريبەسىن شىڭدادى. مىسالى, «ەسەپ جانە اۋديت» ماماندىعى بويىنشا قازاقستان-گەرمانيا جوباسىنىڭ سەرىكتەسى بولدى, 2015 جىلدان بەرى British CounciI جوبالارىنىڭ قاتىسۋشىسى جانە جەڭىمپازى, ۇلىبريتانيادا مۇعالىمدەرىمىز بىلىكتىلىگىن ارتتىرۋ كۋرسىنان ءوتىپ, جەڭىمپاز ستۋدەنتتەر وسى ەلگە, لوندونعا بارىپ كەلدى. 2021 جىلى Creative Spark جوباسىنا قاتىسىپ, قاتىسۋشىلار جوبانى دامىتۋعا قاراجات الدى. 2022 جىلدان باستاپ «اتامەكەن» ۇلتتىق كاسىپكەرلەر پالاتاسىمەن بىرلەسىپ ۇلىبريتانيانىڭ Capital City College Group كومپانياسىمەن حالىقارالىق جوبانىڭ قاتىسۋشىسى بولدى. جىل سايىن كوللەدجگە لەكتسيا وقىپ, ترەنينگ, كوۋچ, شەبەرلىك سىنىپتارىن وتكىزۋ ءۇشىن «اتامەكەن» ۇكپ جەتەكشى بيزنەس-ترەنەرلەرى, قىزمەت كورسەتۋ جانە ەكونوميكا سالاسىنداعى پراكتيكالىق قىزمەتكەرلەر كەلىپ ءدارىس بەرەدى.
– كوللەدجدەردە جان باسىنا شاققانداعى نورماتيۆتىك قارجىلاندىرۋ جەتكىلىكتى مە؟ مەكتەپ, جوعارى وقۋ ورىندارىمەن سالىستىرعاندا قانداي؟
– وسى ماسەلەنى بۇگىندە وزەكتى دەۋگە بولادى. مۇنى ۇكىمەت تە بىلەدى, وقۋ-اعارتۋ مينيسترلىگى قولعا الىپ, نورماتيۆتىك قۇقىقتىق جاعىنان ازىرلەۋ ۇستىندە, الداعى ۋاقىتتا جەكەمەنشىك كوللەدجدەرگە قارجىلاندىرۋ ماسەلەسى شەشىمىن تابادى دەگەن ۇمىتتەمىز.
ويتكەنى كادر تاپشىلىعىنىڭ وسى قارجىلاندىرۋعا تىكەلەي قاتىسى بار. وقىتۋشىلاردىڭ مەملەكەتتىك كوللەدجدەگى ارىپتەستەرىنەن جالاقىسى تومەن, سوندىقتان ولاردى ۇستاپ تۇرۋ قيىن. مىسالى, جان باسىنا شاققانداعى نورماتيۆتىك قارجىلاندىرۋ مەكتەپتەگى ءاربىر بالاعا 620 مىڭ تەڭگە كولەمىندە بولسا, جەكەمەنشىك كوللەدجدەگى قارجىلاندىرۋ 450 مىڭ تەڭگەنى قۇرايدى. بۇل – وتە تومەن قارجىلاندىرۋ. نەگىزى, كوللەدجدەردى قارجىلاندىرۋ سوماسى 700-800 مىڭ تەڭگە بولۋ كەرەك دەگەن ەسەپ-قيساپ بار. ۇكىمەت قاجەتتى زاڭنامالارعا وزگەرىستەر ەنگىزىپ, بۇل ماسەلەنى شەشۋدى قاراستىرىپ وتىر.
– سەنىمدى الەۋمەتتىك سەرىكتەستەر, جۇمىس بەرۋشىلەر, تاجىريبەلىك وقىتۋ بازاسى تۋرالى ايتا كەتسەڭىز. كوللەدج-ستۋدەنت-جۇمىس بەرۋشى: كەلىسىم قالاي؟
– بۇگىنگى تاڭدا بىلىكتى كادرلار دايارلاۋ تەك ءبىلىم بەرۋ مەكەمەسىنىڭ مىندەتى ەمەس. كوللەدجدەرگە اكادەميالىق دەربەستىك بەرۋگە بايلانىستى ول تالاپتار وزگەردى. قازىر ءبىلىم ورداسى-جۇمىس بەرۋشى-ستۋدەنتپەن بىرلىكتە اتقارىلار ۇلكەن جۇمىس دەۋگە بولادى. ەڭبەك نارىعىنا كادرلاردى جۇمىس بەرۋشىسىز شىعارۋ مۇمكىن ەمەس. سوندىقتان سوڭعى 5-6 جىلدا ءدۋالدى وقىتۋدى قولعا الدىق. تەوريالىق ءبىلىمدى كوللەدج قابىرعاسىندا السا, پراكتيكالىق ءبىلىمدى جۇمىس بەرۋشىلەردەن الا الادى. ياعني جۇمىس بەرۋشى وزىنە لايىقتى, قاجەتتى ماماندى دايارلاپ شىعادى. بۇرىن وقۋ 60%, تاجىريبە 40% بولسا, قازىر كەرىسىنشە, وقۋ 40%, تاجىريبە 60%-دى قۇرايدى. جۇمىس بەرۋشى وزىنە كەرەكتى ماماندى كوللەدجدە وسىلايشا دايارلاپ شىعا الادى. الەۋمەتتىك سەرىكتەستەردىڭ كەلىسىمىمەن ءبىلىم بەرۋ باعدارلامالارى كەلىسىلەدى. كوللەدج-جۇمىس بەرۋشى-«اتامەكەن» پالاتاسى – ءبارى بىرلىكتە جۇمىس ىستەيدى. بۇل رەتتە تازالىققا, شىنايىلىققا, ارىپتەستىك قارىم-قاتىناسقا ءمان بەرىلەدى. كوللەدجدەگى ماماندىقتار بويىنشا قالاداعى ءىرى كاسىپورىندار قاتارىنا الەۋمەتتىك سەرىكتەستەر تارتىلعان.
حالىقارالىق ىنتىماقتاستىق اياسىندا ەكاتەرينبۋرگ ساۋدا-ەكونوميكالىق تەحنيكۋمى, نوۆوسىبىر كووپەراتيۆ تەحنيكۋمى, سامارقاندتاعى تۋريزم جانە مادەني مۇرا تەحنيكۋمىمەن ىنتىماقتاستىق تۋرالى مەموراندۋمدار جاسالدى. WorIdSkiIIs Astana-2023 بايقاۋىندا كوللەدج 13 قۇزىرەت بويىنشا دايىندالىپ, ونىڭ 11 قۇزىرەتى بويىنشا ۇزدىك ورىندارعا يە بولدى, ونىڭ 6-اۋى – «التىن مەدال» يەگەرى. WorIdSkiIIs حالىقارالىق بايقاۋى – داعدى مەن شەبەرلىك سىنالاتىن, شىڭدالاتىن ەرەكشە جوبا.
– كوللەدجدەگى ماماندىقتاردىڭ قايسىسىنا سۇرانىس كوپ؟ كوللەدج تۇلەكتەرىنىڭ جۇمىسقا ورنالاسۋ ديناميكاسى قانداي؟
– كوللەدج تۇلەكتەرىنىڭ جۇمىسقا ورنالاسۋ ديناميكاسى 84 پايىزدى قۇرايدى. نەگىزىنەن, ءبىز 5 ماماندىق بويىنشا ماماندار دايارلايمىز, ولار – «ماركەتينگ», «ەسەپ جانە اۋديت», 2 ءتۇرلى Iت ماماندىعى, «تاماقتانۋدى ۇيىمداستىرۋ», «باعدارلامالىق قامتاماسىز ەتۋ» ماماندىقتارى. بۇل ماماندارعا سۇرانىس بار. جاستار وسىعان قىزىعىپ كەلەدى.
ءبىز, نەگىزىنەن, بالاعا تالاپتى دۇرىس قويا ءبىلۋىمىز كەرەك. جاقسى وقۋ, ارينە, كەرەك شىعار. ءبىلىم كەرەك, بىراق ەڭ كەرەگى بىلىكتى بولۋ, ومىرىنە قاجەتتى نانىن تابا الۋى دەر ەدىم. كاسىپتىك ءبىلىم بەرۋدىڭ ەڭ قاجەتتىلىگى وسىندايدا تۋىندايدى, جاستاي ءبىلىم مەن ەڭبەكتى قاتار ۇشتاستىرعان ستۋدەنت ومىرىنە قاجەتتى داعدىنى يگەرىپ, نارىق اعىمىنا ىلەسىپ كەتە الادى, ءتىپتى كاسىپ اشىپ, كاسىپكەر بولۋىنا تولىق مۇمكىندىك بار. كوللەدجدە وقىعان بالالار نارىققا بەيىم, زامان وزگەرىستەرىن تەز قابىلدايتىن جاستار دەپ ايتار ەدىم. IT ماماندىعىن بىتىرگەن تۇلەگىمىز جاقىندا كەلىپ كەتتى, بىرەر جىلدىڭ ىشىندە باسپانا العان, كولىك العان, جاقسى جالاقىمەن وتباسىن, تۋىستارىن اسىراپ وتىر. قازىر جۇمىس بەرۋشىلەر جاستاردان ديپلوم ەمەس, بىلىك تالاپ ەتەدى.
– ماماننىڭ ومىردەگى ءوز ورنىن تاۋىپ, ءوزىن-ءوزى قامتاماسىز ەتۋى ءۇشىن مىندەتتى تۇردە جوو ءبىتىرىپ, 2-3 ديپلوم الۋى قاجەت پە؟ ءبىلىم نە ءۇشىن كەرەك, ماڭىزدى بولىپ كورىنۋگە مە, ءوزىن-ءوزى قامتاماسىز ەتۋگە مە؟
– بولاشاقتا قولىندا جوعارى وقۋ ورنىن بىتىرگەن ديپلومى بار دەگەننەن گورى قولىنان نە كەلەدى دەگەن تالاپقا ءمان بەرىلەدى. كوللەدجدەرگە اكادەميالىق دەربەستىك بەرىلۋىنىڭ ارقاسىندا ءبىز قازىرگى نارىققا قاجەت مامانداردى دايارلاۋدى باستاپ كەتتىك. مىسالى, اسپاز-كونديتەر ماماندىعى بويىنشا كوللەدجدى بىتىرگەن مامان ءبىر كومپانياعا, يا مەيرامحاناعا جۇمىسقا كىردى دەلىك, ەندى وسى جاس مامان ءارى قاراي ءوز كاسىبىن اشىپ, اياققا تۇرۋى ءۇشىن نە ىستەۋىمىز كەرەك, تاعى قانداي داعدى ۇيرەتۋىمىز كەرەك – وسىعان وراي, ياعني ول كاسىپكەرلىكتى باستاۋى ءۇشىن بۋحگالتەرلىك ەسەپ-قيساپتى, سالىقتى قالاي تولەۋ كەرەكتىگىن ۇيرەتىپ جاتىرمىز. ناقتى مىسالمەن ۇيرەتەمىز, وقىتۋشىنىڭ ءوزى بيزنەس باستاپ, كاسىپكەر بولۋ ءۇشىن قانداي قۇجاتتارمەن, ەسەپ-قيساپپەن جۇمىس ىستەۋ كەرەكتىگىن ءوز تاجىريبەسىمەن ۇيرەتەدى. وسىنى مەڭگەرگەن تۇلەكتەرىمىز قازىر ەلوردانىڭ ەڭ مىقتى كومپانيالارىندا ابىرويلى جۇمىس ىستەپ, اقشا تاۋىپ ءجۇر. ەلىمىزدە كوپ كاسىپكەر سالىقتى دەر كەزىندە تولەمەي نەمەسە زاڭدى بۇزىپ, سالعىرتتىعىنان بيزنەستىڭ دامۋىنا كەدەرگى كەلۋدە, ونى كۇندە كورىپ ءجۇرسىز. زاڭناما جاعىنان ساۋاتتى, ءوز ءىسىن ءسۇيەتىن, بىلىكتى كادر بولسا, ونىڭ ەل ەكونوميكاسىنا تيگىزەر پايداسى ۇشان-تەڭىز بولار ەدى دەپ ويلايمىن. مەن وسى كوللەدجگە بيزنەس سالاسىنان كەلدىم. باسىندا وقۋ ورداسىنداعى ءبىلىم بەرۋ باعدارلاماسىنىڭ وزەكتىلىگى مەنى قاتتى ويلاندىراتىن. سوسىن ۇجىمعا ايتتىم «نەگە ءبىز ولارعا دا, ەلگە دە كەرەكتى داعدىلاردى ۇيرەتپەيمىز؟!» دەپ وسى بۋحگالتەرلىك ەسەپتەۋدى, كاسىپ اشۋ ىسىنە باعىت-باعدار بەرۋ ماسەلەسىن قولعا المايمىز دەگەن ويىمدى ايتتىم, باسىندا بۇعان تاڭدانىپ قارادى, 8 جىل بۇرىن وسى ماقساتتى جۇزەگە اسىرا باستادىق. سوندىقتان ءبىز نارىققا كەرەك مامانداردى ازىرلەي باستادىق. قازىر كوللەدجدە 750 ستۋدەنت بار, ونىڭ 200-ءى بيىل ديپلومىن الادى دەپ وتىرمىز.
– ءسىز وڭتۇستىك وڭىردە تۋىپ ءوسىپ, ارقادا ءبىلىم الىپ, وسىندا ەڭبەك جولىن باستادىڭىز. 30-40 جىل ىشىندە تسەلينوگراد-اقمولا-استانا قالاي وزگەردى؟
– ءوزىم وڭتۇستىكتە تۋىپ ءوسكەنىممەن, قاراعاندى كووپەراتيۆ ينستيتۋتىندا ءبىلىم الدىم, سوسىن وسى تسەلينوگراد قالاسىنا كوشىپ كەلدىم. مەنى ارقانىڭ جىگىتتەرى جىلى قاباعىمەن, كەڭ قۇشاعىمەن قارسى الدى. اقمولالىقتاردى جەرى قانداي قۇنارلى بولسا, ازاماتتارى دا سونداي مىقتى ادامدار دەپ ايتار ەدىم. ءبىز كەلگەندە تسەلينوگراد قالاسىندا قازاقتار 17 پايىز عانا بولدى. وسىندا كەلگەندە وبلىستىق تۇتىنۋشىلار وداعى مەكەمەسىندە رەۆيزور رەتىندە جۇمىسىمدى باستادىم. جۇمىس بارىسىندا اقمولا وبلىسىنىڭ بارلىق اۋدانىن ارالاپ شىقتىم, كەيىن تسەلينوگراد اۋداندىق ساۋدا ءىسىن باسقاردىم. 2002 جىلى وسى كوللەدجگە باسشىلىق قىزمەتكە كەلدىم.
نەگىزى, مەن ەڭبەك, ءومىر جولىمدا جاقسى ادامدارمەن ارالاستىم, سىيلاستىم, قىزمەتتەس بولدىم. بارلىعىنىڭ اتىن ايتۋ مۇمكىن ەمەس. سوندا دا ومىرىمە ۇلكەن اسەر ەتكەن, قامقور بولعان اعالارىمدى اتاپ وتكىم كەلەدى. ولار: حازبولات اشلياەۆ, ەرقارا ايماعامبەتوۆ, سايات قامزەباەۆ, راشيد اكىموۆ.
استانا باسىندا بىرنەشە ۇلكەن كوشەدەن تۇراتىن شاعىن قالا ەدى, بۇرىنعى «زارەچنىي» كەڭشارىندا كارتوپ ەگىلەتىن, اينالاسى كول, سۋ, اعاش – جاپ-جاسىل بەلدەۋ بولاتىن. قازىر زامانعا ساي كەرەمەت عيماراتتار سالىندى, تاماشا قالا ساۋلەتى كىم-كىمدى دە قىزىقتىرادى. الماتىدان اقمولاعا استانانى كوشىرۋدىڭ ءوزى وتە دۇرىس شەشىم بولعانىن سەزىنىپ وتىرمىز. ەندى تەك سول تسەلينوگراد كەزىندە, ودان بۇرىنعى تاريحتى شىنايى ايتىپ بەرەتىن, ەكسپوناتتارى قويىلعان جاقسى مۋزەي كەلۋشىلەرگە, تۋريستەرگە قىزمەت ەتۋى كەرەك دەپ ويلايمىن. سوسىن جاڭاعى شۇرايلى جەرلەردى, ايدىندى كولدەردى, جاسىل جەلەكتەردى ىسىرىپ, بيىك عيماراتتاردى سالا بەرمەي, ادامدار تىنىعاتىن, دەمالاتىن وازيس بولۋى كەرەك دەپ ەسەپتەيمىن. العاش كەلگەندە قانداي تاماشا تابيعات, نەتكەن كورىنىس, نەگە وتانداستارىمىز كوپتەپ كەلمەيدى ەكەن دەيتىنمىن, ول ارمانىم جۇزەگە استى, ارينە, قالا ەل استاناسىنا اينالدى. تەك ەكولوگيالىق تالاپتاردى دا ەسكەرسەك دەيمىن.
– ءسىزدى قاجىمۇقان اۋىلىندا پالۋان ەسكەرتكىشىن كورىكتەندىرۋگە ۇلەس قوستى دەپ ەستىدىم. ەلوردادا داڭقتى تۇلعا ەسكەرتكىشى نەگە جوق, ەسكى ستاديون ىسىرىلسا, اتى الىنىپ قالماي ما؟
– قارجىلى ازاماتتار قاجىمۇقان اتامىزدىڭ ءمۇسىنىن جاساتىپ, وبلىس اكىمىنە ايتىپ, ول سالتاناتتى تۇردە اشىلعانى بەلگىلى. ونىڭ جان-جاعىن اباتتاندىرۋعا مەن ءبىراز اتسالىستىم. قازىر ەسكەرتكىش اكىمدىك بالانسىندا تۇر. قالانىڭ ەسكى بولىگىندە تۇرعان قاجىمۇقان اتىنداعى ستاديون ىسىرىلسا دا, قايتادان ونىڭ اتى بەرىلەدى دەگەن سەنىمدەمىن. ويتكەنى ول – داڭقتى پالۋان عانا ەمەس, الاشوردا ازاماتتارىنىڭ قاسىندا جۇرگەن ۇلكەن پاراسات يەسى, تاريحي تۇلعا. اكىمدىك حالىق ۇنىنە قۇلاق اسادى دەگەن ويدامىن.
– بالالارىڭىز شەتەلدە ءبىلىم الىپتى. وتباسىڭىزدا قازاقى تاربيە ورنىققان با؟
– جارىم گۇلنار ەكەۋمىز قاراعاندىداعى كووپەراتيۆ ينستيتۋتىندا بىرگە وقىدىق, ءبىر جاتاقحانادا تۇردىق. 2-كۋرستا ءدام-تۇزىمىز جاراسىپ, وتباسىن قۇردىق. اللا بەرگەن ءبىر قىزىم, ەكى ۇلىم بار. بالالارىمنىڭ بارلىعى قازاق مەكتەبىندە وقىعان, جوعارى ءبىلىمدى كيمەپ-تەن الدى, سودان سوڭ ماگيستراتۋراسىن «بولاشاق» حالىقارالىق باعدارلاماسىمەن شەتەلدەن وقىپ كەلدى. قازىر ءبارى دە حالىقارالىق كومپانيالاردا بەدەلدى جۇمىس ىستەپ ءجۇر. كەلىندەرىم دە جاقسى, جوعارى ءبىلىم العان, تاماشا, يناباتتى جاندار. ادەمى, سۇيكىمدى, اقىلدى نەمەرەلەرىم بارىنا شۇكىر ەتەمىن. ءبىز ۇيدە تەك قازاق تىلىندە سويلەيمىز, كەلىندەر ورامالىن تاعىپ, ۇلكەندەرگە ءيىلىپ سالەم سالادى. ۇلتتىق قۇندىلىقتى ناسيحاتتاۋ, انا ءتىلىمىزدى قۇرمەتتەۋ – ءبىزدىڭ شاڭىراعىمىزدىڭ قاسيەتى. سوسىن بالالارىمىزعا شىنشىل بولۋدى جاستايىنان ۇيرەتتىك, ولار ەلدەگى جەمقورلىق دەگەنگە جانى قاس. وسىعان قۋانامىن.
– پەداگوگيكا سالاسىندا قىزمەت ىستەگەنىڭىزگە كوپ جىل ءوتتى. ءسىزدى قوعامدا, ءبىلىم سالاسىندا قانداي ماسەلەلەر تولعاندىرادى؟
– بىلىمدە قارجىلاندىرۋ ماسەلەسىن شەشەر بولسا, كوپ بىلىكتى ادام وسى سالاعا قازىر دە كەلەر ەدى. مەكتەپكە كەتەدى كوبى. مۇنى ءبارى بىلەدى. وسى ماسەلە وڭ شەشىمىن تاپسا, كاسىپتىك ءبىلىم بەرۋ سالاسىنا نەبىر مىقتى ماماندار ويلانباستان كەلەتىن ەدى. مەنى تولعاندىراتىن نارسە – مەملەكەت باسشىسى ايتقان ەلىمىزدە ادىلەتتى قازاقستان قۇرۋ ماسەلەسى. ءاربىر ادام, ءاربىر مينيسترلىكتىڭ كادرى وسى ادىلدىككە ۇمتىلۋى كەرەك, وسىنى قالايدا ورناتۋىمىز كەرەك. زاڭدى ۇستانساق, زاڭ بويىنشا جۇرسەك, جەمقورلىق اتاۋلىنىڭ كوزىن قۇرتساق, كەرەمەت مەملەكەت بولىپ قالىپتاسار ەدىك. ەل بايلىعىن ۇقىپتى پايدالانىپ, ونى ەل يگىلىگىنە جۇمساعان دۇرىس دەپ ايتار ەدىم. جەمقورلىققا جانىم قاس, سەبەبى مەنى تازا ادامدار تاربيەلەدى, مەن دە بارىنشا جەمقورلىققا قانى قاس, ادال پەرزەنت, شاكىرت تاربيەلەپ كەلەمىز دەگەن ۇستانىمدامىن. سوندىقتان ەل پرەزيدەنتىنىڭ باستاماسىن قولداپ, وسىعان ۇمتىلۋىمىز كەرەك. بوس ماقتاندى قويىپ, ەلدىككە, بىرلىككە, ادىلدىككە جەتسەك, ۇرپاعىمىز الدىندا ءجۇزىمىز جارقىن بولار ەدى دەپ ويلايمىن. ابىروي بارىنەن قىمبات!
