بۇگىن بەيجىڭدە قىتايداعى قازاقستاندىق تۋريزم جىلىنىڭ اشىلۋى ءوتتى. 28-29 ناۋرىز كۇندەرى اشىلۋ سالتاناتى اياسىندا بەيجىڭدە قازاقستان مەن قىتاي وكىلدەرىنىڭ قاتىسۋىمەن بىرقاتار ءىس-شارالار جوسپارلانعان, دەپ حابارلايدى astana-akshamy.kz.
ءىس-شارانىڭ ءبىرىنشى كۇنى قازاقستان-قىتاي تۋريستىك جانە ينۆەستيتسيالىق فورۋمىنان باستالدى. قر تۋريزم جانە سپورت ءمينيسترى ەرمەك مارجىقپاەۆ قۇتتىقتاۋ ءسوز سويلەدى. «قىتاي حالىق رەسپۋبليكاسىنداعى قازاقستاننىڭ تۋريزم جىلى – ەكى ەل اراسىنداعى دوستىق قارىم-قاتىناستى نىعايتۋعا ىقپال ەتەتىن ەرەكشە ءىس-شارا. بۇگىنگى ءىس-شارامىز وسى ماقساتقا جەتۋ جولىنداعى ماڭىزدى قادام بولىپ وتىر. ءبىزدىڭ ديالوگىمىز جەمىستى جانە ۇزاق مەرزىمدى ىنتىماقتاستىقتىڭ نەگىزىن قۇراي وتىرىپ, تۋريزم سالاسىنداعى سەرىكتەستىكتىڭ جاڭا كوكجيەكتەرىن اشادى دەپ سەنەمىز», – دەدى مينيستر.
سونداي-اق ول قازاقستان – كەز كەلگەن ساياحاتشىنى ءوزىنىڭ كوشپەلى مادەنيەتىمەن, عاسىرلارعا جالعاسقان تاريحىمەن جانە بىرەگەي تابيعاتىمەن قىزىقتىراتىنىن اتاپ ءوتتى. «ەلىمىزدىڭ تۋريستىك الەۋەتى زور. ءبىزدىڭ ماقساتىمىز – سول بايلىقتى بارلىعىنا قولجەتىمدى ەتۋ», – دەپ تولىقتىردى ەرمەك مارجىقپاەۆ. فورۋمعا قىتاي حالىق رەسپۋبليكاسىنىڭ مادەنيەت جانە تۋريزم ءمينيسترى سۋن لي دە قاتىستى. قۇتتىقتاۋ سوزىمەن «Kazakh Tourism» ۇك» اق باسقارما توراعاسى قايرات سادۋاقاسوۆ تا ءسوز سويلەدى. ول جينالعان قاۋىمدى «Kazakh Tourism» ۇلتتىق كومپانياسىمەن تانىستىردى.
«قازاقستان – قىتايلىق تۋريستەر ءۇشىن ەڭ تارتىمدى باعىتتاردىڭ ءبىرى ەكەنىنە سەنىمدىمىز. ول ۆيزاسىز رەجيمدى قولدايتىن كورشىلەس ەل عانا ەمەس, سونىمەن قاتار «ءبىر بەلدەۋ, ءبىر جول» باستاماسىنىڭ ستراتەگيالىق سەرىكتەسى. ءبىز تۋريستەردىڭ نازارىنا ەكو-, ەتنوتۋريزم, ويىن-ساۋىق جانە رەسمي ءىس-شارالاردى قامتيتىن «ەco-Ethnic-Entertainment-Events» كونتسەپتسياسىن ۇسىنامىز», – دەدى قايرات سادۋاقاسوۆ. قازاقستانداعى ءار باعىتتىڭ الەۋەتى تۋرالى ايتا كەلە, ق.سادۋاقاسوۆ فورۋمعا قاتىسۋشىلاردى بيىل قىتايداعى قازاقستان ءتۋريزمى جىلى اياسىندا وتەتىن ءىس-شارالارعا قاتىسۋعا شاقىردى. 2024 جىلعا ولاردىڭ 35-تەن استامى جوسپارلانعان. تۋريزم جانە ينۆەستيتسيالىق فورۋم ەكى پانەلدىك سەسسيادان تۇردى: «قىتاي ساياحاتشىلارى ءۇشىن قازاقستانداعى ۇيىمداستىرىلعان تۋريزم مۇمكىندىكتەرى» «تۋريستىك بيزنەستەگى ارىپتەستىك: قازاقستان-قىتاي اراسىنداعى ينۆەستيتسيالىق مۇمكىندىكتەر».
فورۋمعا قر تۋريزم جانە سپورت ۆيتسە-ءمينيسترى ەرجان ەركىنباەۆ پەن «اتامەكەن» اق باسقارما توراعاسىنىڭ ورىنباسارى تيمۋر ناحيپبەكوۆ مودەراتورلىق ەتتى. كەزدەسۋدە قىتايلىق ساياحاتشىلار ءۇشىن ۇيىمداستىرىلعان تۋريزم مۇمكىندىكتەرى مەن قازاقستان-قىتايدىڭ ينۆەستيتسيالىق مۇمكىندىكتەرى تالقىلاندى. سونداي-اق فورۋمعا قاتىسۋشىلار ءۇشىن بىرەگەي كورمە ۇيىمداستىرىلدى, وندا قوناقتار قازاقستاننىڭ بارلىق 17 ايماعىنىڭ كورىكتى جەرلەرىمەن تانىسا الدى. فورۋم سوڭىندا قازاقستاندىق جانە قىتايلىق تاراپتار اراسىندا بىرقاتار مەموراندۋمدارعا قول قويىلدى. ەستەرىڭىزگە سالا كەتەيىك, ەرتەڭ, 29 ناۋرىزدا قوناقتاردى قىتايداعى قازاقستان ءتۋريزمى جىلىنىڭ رەسمي اشىلۋ سالتاناتى, مادەني باعدارلاماسى بار ەتنواۋىل, سونداي-اق كورنەكتى ارتىستەردىڭ قاتىسۋىمەن وتەتىن ۇلكەن گالا-كونتسەرت كۇتۋدە.
