استانادا قازاقستاننىڭ ۇلتتىق پاۆيلونىنىڭ تۇجىرىمداماسى تانىستىرىلدى.

ەلوردادا 60-شى ۆەنەتسيا ونەر بيەننالەسىنە قاتىسۋ ءۇشىن قر ۇلتتىق پاۆيلونىنىڭ تۇجىرىمداماسى تانىستىرىلدى. مەرەيتويلىق بيەننالەدە قازاقستان مەملەكەتى «Jerūiyq» ميفتىك جەر تۋرالى ەجەلگى اڭىزدىڭ زاماناۋي ينتەرپرەتيتسياسىن ۇسىنادى. ۆەنەتسيا ونەر بيەننالەسىندە قازاقستاندىق جەتى سۋرەتشىنىڭ جۇمىسى ۇسىنىلادى, دەپ حابارلايدى astana-akshamy.kz  قر مادەنيەت جانە اقپارات مينيسترلىگىنە سىلتەمە جاساپ. 

حالىقارالىق كورمەگە قر مادەنيەت جانە اقپارات مينيسترلىگىنىڭ قولداۋىمەن قازاقستان رەسپۋبليكاسىنىڭ ۇلتتىق پاۆيلونى العاش رەت ۇسىنىلىپ وتىر. كورمە ۆەنەتسيانىڭ تاريحي عيماراتتارىنىڭ ءبىرى – يتاليانىڭ ۇلتتىق مۋزەيىندە وتەدى. پاۆيلوننىڭ كوميسسارى – قر مادەنيەت جانە اقپارات ءمينيسترى ايدا بالاەۆا.

«حالىقارالىق دەڭگەيدەگى ءىس-شارالارعا قاتىسۋ – الەمدىك ارەنادا زياتكەرلىك جانە شىعارماشىلىق الەۋەتى جوعارى ەل رەتىندە قازاقستاننىڭ ءيميدجىن قالىپتاستىرۋعا ىقپال ەتەدى. سونىمەن قاتار, بيەننالەگە قازاقستاننىڭ شىعارماشىلىق جوعارى وقۋ ورىندارىندا وقيتىن ون جاس سۋرەتشى قاتىسادى دەپ جوسپارلانۋدا. ولار الەمنىڭ ۇزدىك اۆتورلارىنىڭ شىعارماشىلىعىن كورىپ, بىلىمدەرىن تولىقتىرۋعا مۇمكىندىك  الادى. وسىلايشا, ءبىز الەمدى ۇلتتىق مادەنيەتىمىزبەن تانىستىرىپ قانا قويماي, جاس تالانتتارعا تاجىريبە الماسۋعا مۇمكىندىك بەرەمىز», – دەدى كۇمىس سەيىتوۆا.

كەلۋشىلەرگە قازاقستاندىق جەتى سۋرەتشى كاميل مۋللاشەۆ, ەربولات تولەپباي, ساكەن نارىنوۆ, سەرگەي ماسلوۆ, انۆار مۇسىرەپوۆ جانە «The2vvo» توبىنىڭ جۇمىستارى كورسەتىلەدى. ەكسپوزيتسيادا فۋتۋريستىك كوكجيەكتەر مەن قازىرگى پورتالداردان باسقا ولشەمدەرگە دەيىنگى قيال الەمى ۇسىنىلادى.

«كورمەنىڭ تاقىرىبىن بىرنەشە ۇرپاقتىڭ كوزقاراسىمەن كورسەتۋ ءۇشىن سۋرەتشىلەردىڭ تۋىندىلارىن مۇقيات تاڭدادىق. حح عاسىردىڭ 70-80-90 جىلدارى تاقىرىپ قالاي يگەرىلدى, قازىر زاماناۋي مەديامەن جۇمىس ىستەپ جاتقان سۋرەتشىلەر ونى قالاي سەزىنەدى, وسى جاعىنا كوڭىل بولدىك», – دەدى قازاقستان پاۆيلونىنىڭ كۋراتورى داناگۇل تولەپباي.

«شەتەلدىكتەر بارلىق جەردە» اتتى 60-شى ۆەنەتسيا ونەر بيەننالەسى 20 ساۋىردە اشىلادى جانە كەلۋشىلەر 2024 جىلدىڭ 24 قاراشاسىنا دەيىن جەتى اي بويى تاماشالاي الادى. وعان 90 ەلدىڭ سۋرەتشىسى قاتىسادى. كورمەنىڭ نەگىزگى تۇجىرىمداماسى كوشى-قون, مادەني پليۋراليزم ماسەلەلەرىن جانە جاھاندىق وڭتۇستىك ەلدەردەن كەلگەن مودەرنيستىك سۋرەتشىلەردىڭ ەسىمدەرىن قايتادان تانىستىرادى.

حالىقارالىق ونەر كورمەسى العاش رەت 1895 جىلى ۆەنەتسيادا ءوتتى جانە بىردەن ونەر الەمىندەگى باستى وقيعالاردىڭ بىرىنە اينالدى. ەكى جىلدا ءبىر رەت وتكىزىلەتىن بيەننالەگە جارتى ميلليونعا جۋىق ادام قاتىسادى.