استانا ونەرسۇيەرلەرىنىڭ ۇلكەن دوسى دەنيس ماتسۋەۆتىڭ ارنايى شاقىرۋىمەن كەلگەن ايگىلى «ۆەنا-بەرلين» كامەرالىق وركەسترى ەلوردامىزدا ونەر كورسەتتى.
ورەلى ونەر ولكەسىندە ۇزەڭگى قاعىسىپ قاتار كەلە جاتقان ۆەنا فيلارمونياسىنىڭ وركەسترى مەن گەرمانيانىڭ ەڭ ءىرى سيمفونيالىق وركەسترىنىڭ سان جىلدىق ءداستۇرىن ساقتاپ, ەكى ونەر مەكتەبىنىڭ حاس شەبەرلەرىنەن قۇرالعان «ۆەنا-بەرلين» كامەرالىق وركەسترى اكادەميالىق مۋزىكا اسپانىنىڭ جارىق جۇلدىزى ىسپەتتى. 2005 جىلى اتاقتى ديريجەر سايمون رەتتلدىڭ باستاماسىمەن قۇرىلعان, شەكتى اسپاپتان تۇراتىن اتالمىش ۇجىمنىڭ كاسىبي شەبەرلىگىن دۇنيە ءجۇزى الدەقاشان مويىنداعان. سايدىڭ تاسىنداي ىرىكتەلىپ الىنعان مۋزىكانتتاردىڭ ءبىر ەرەكشەلىگى, ديريجەر باسقارۋىنسىز ونەر كورسەتەدى. ونىڭ دا كەرەمەتى بار. ءبىر قولدىڭ سالاسىنداي وركەستر قۇرامىنداعى جيىرما مۋزىكانتتىڭ اۋەدە قالىقتاعان اۋەندى قالت جىبەرمەي, ءبىر-ءبىرىنىڭ قاباعىنان دا, قولىنىڭ قيمىلىنان تانىپ ۇندەسە ءبىلۋى تىڭداۋشىسىن ارباعانداي اسەر ەتەدى. ال «ۆەنا-بەرلين» كامەرالىق وركەسترىنىڭ پريماريۋسى, ۆەنا مەملەكەتتىك وپەراسى مەن ۆەنا فيلارمونياسى وركەسترىنىڭ كونتسەرتمەيستەرى راينەر حونەك 1709 جىلى ءستراديۆاريدىڭ ءوزى جاساعان سكريپكامەن ويناۋ مارتەبەسىنە يە بولعان ونەر شەبەرى.
وركەستردىڭ تاعى ءبىر ەرەكشەلىگى – سوليست-رەزيدەنتپەن بىرگە ونەر كورسەتەدى. دەنيس ماتسۋەۆ «ۆەنا-بەرليننىڭ» بيىلعى تۋرنەگە ورىنداۋشى رەتىندە شاقىرىلۋىن وزىنە بيىك مارتەبە سانايتىنىن ايتتى. پيانيست-ۆيرتۋوز استانا ساحناسىنا شىققان سايىن ۇشقان ۇياسىنا ورالعانداي اسەر الاتىنىن ءبىلدىردى. ول «استانا ۇلكەن مادەني ورتالىققا اينالىپ كەلەدى, سونىڭ ءبىر دالەلى وسى وركەستردىڭ قازاق ساحناسىندا ونەر كورسەتۋى» دەدى كەشكە جينالعان قاۋىمعا. ونەر ۇجىمى وسى قۇرامىمەن رەسەيدىڭ ءىرى قالالارىندا گاسترولدىك ساپاردا بولىپتى, الداعى ۋاقىتتا امستەردام, لوندون, بەرلين, پاريج, پراگا جانە ريم قالالارىندا ونەر كورسەتپەك كورىنەدى.
«ۆەنا-بەرليننىڭ» استاناداعى مۋزىكا كەشى موتسارتتىڭ «تۇنگى سەرەناداسىمەن» باستالدى. «قازاقستان» ورتالىق كونتسەرت زالىن تولتىرعان جۇرت سىلتىدەي تىنىپ, وشپەس تۋىندىنىڭ قۇدىرەتىنە ەلتىدى. ودان كەيىن دميتري شوستاكوۆيچتىڭ فورتەپيانو, ترۋبا جانە شەكتى اسپاپتار وركەسترىنە ارنالعان كونتسەرتىن ورىندادى. عاجاپ وركەستر ءۇنى دەنيس ماتسۋەۆتىڭ شەبەرلىگىمەن ۇشتالىپ, ارنايى شاقىرىلعان ۆەنگر گابور تاركوۆي تۋىندىنىڭ رۋحىن ترۋبا ۇنىمەن ايشىقتادى. كونتسەرتتىڭ ەكىنشى بولىمىندە ورىندالعان پەتر چايكوۆسكيدىڭ شەكتى اسپاپتارعا ارنالعان سەرەناداسى اتاقتى وركەستردىڭ استانالىق باعدارلاماسىن اياقتاعان ەدى. اتتاي قالاپ كەلتىرە المايتىن مارتەبەلى مەيماندارعا حالىق قۇرمەتپەن قول سوعىپ, قوشتاسۋعا قيمادى. كوپتىڭ كوڭىلىن ۇققان ەۋروپالىق ونەرپازدار دا باعدارلامادان تىس شتراۋستىڭ شىعارماسىن ورىنداپ, ىقىلاستارىن ءبىلدىردى.
ونەردە شەكارا جوق. ءبىر كەشتە مۋزىكا الەمىنىڭ ءۇش قۇدىرەتىنىڭ تۋىندىسىنا جان ءبىتىرىپ, سىرلى اۋەنى جۇرەكتى باۋراپ, كوڭىلىمىز ءبىر تازارعانداي كۇي كەشتىك. ونەر قۇدىرەتى دە وسى بولسا كەرەك.
ايگۇل ۋايسوۆا
