استانالىق ونەرتاپقىش ەۆگەني ششەرباتوۆتىڭ «مانگۋست» ترەكەرىنە اقش-تان كولەمدى تاپسىرىس ءتۇستى
بىلتىر ەلوردالىق ونەرتاپقىش ەۆگەني ششەرباتوۆ «مانگۋست» اتتى ترەكەر ويلاپ تاپقان-دى. جاڭا قۇرىلعى بالالاردىڭ قاۋىپسىزدىگىن باقىلاۋعا ارنالعان. جاقىندا ينجەنەر ءوز ونەرتابىسىنا اقش-تان كولەمدى تاپسىرىس الدى. بۇل جاڭالىقتى تەحنولوگيالىق دامۋ جونىندەگى ۇلتتىق اگەنتتىك حابارلادى.
اتالمىش مەكەمەنىڭ دەرەكتەرىنە سۇيەنسەك, ەۆگەني ششەرباتوۆتىڭ «مانگۋست» ترەكەرى «Technation» بايقاۋىندا توپ جارعان سوڭ, تەك قازاقستاندىقتاردىڭ عانا ەمەس, شەتەلدىكتەردىڭ دە تاراپىنان ۇلكەن قىزىعۋشىلىققا يە بولا باستاعان.
«بۇگىندە سان-فرانتسيسكوداعى اۋتيست بالالار ۇيىمىنان كوپ تاپسىرىس الىندى. سونداي-اق, قازاقستاندا «قازپوشتا» اكتسيونەرلىك قوعامى سالەمدەمەلەردى قاداعالاۋ ءۇشىن وسى قۇرىلعىعا تاپسىرىس بەردى. وتاندىق GPS-قاۋىپسىزدىك جۇيەسى – حالىقارالىق نارىقتاعى بىرەگەي ءونىم», – دەيدى ۆەدومستۆو وكىلدەرى.
ايرىقشا جوبانىڭ قۇنى 18,8 ميلليون تەڭگە ەكەن. ونىڭ 90 پايىزىن, ياعني, 17,7 ميلليون تەڭگەسىن تەحنولوگيالىق دامۋ جونىندەگى ۇلتتىق اگەنتتىك قارجىلاندىرعان.
ءبىر ءىستىڭ تۋىنداۋىنا ءبىر ءىس تۇرتكى بولماي ما؟! جوعارىداعى اپپاراتتى جاساۋ يدەياسى دا جوبا اۆتورى ەۆگەني ششەرباتوۆقا بالاسىنان كوز جازىپ قالعان سوڭ كەلىپتى. پايدالى ءارى ءتيىمدى قۇرىلعى بولعاندىقتان, بۇقارالىق ساتىلىمعا شىعىپ ۇلگەرمەسە دە, وعان 670-تەي ادام قىزىعىپ, تاپسىرىس بەرىپتى.
«مانگۋست» ترەكەرى ادامنىڭ قايدا جۇرگەنىنەن 24 ساعات بويى حاباردار بولىپ وتىرۋعا مۇمكىندىك بەرەدى. ول ءۇشىن قۇرىلعىنى الگى ادامعا بەرىپ, ءوزىڭىز ارنايى موبيلدى قوسىمشا ارقىلى قاداعالاساڭىز جەتكىلىكتى. بۇل ءونىم, اسىرەسە, كىشكەنتاي بالالار ءۇشىن تاپتىرماس قۇرال ەكەنى داۋسىز. ترەكەر مىقتى, سۋ استىندا دا جۇمىس ىستەيدى, قولعا ۇستاۋعا قولايلى جانە قاۋىپسىز.
سونىمەن قاتار, قۋات ۇنەمدەگىش قاسيەتىنىڭ ارقاسىندا قۇرىلعىنى 20 كۇندە ءبىر رەت قۋاتتاۋعا بولادى. اپپارات الەمنىڭ ۇيالى بايلانىس بار كەز كەلگەن نۇكتەسىنەن سيگنال جەتكىزەدى. بۇدان بولەك, كوورديناتتاردى انىقتاۋ دالدىگىمەن دە ەرەكشەلەنەدى. سونىمەن قوسا, قولدانۋى قاراپايىم بولعاندىقتان, مۇمكىندىگى شەكتەۋلى ادامدارعا دا ىڭعايلى.
بالاما جۇيەلەردىڭ كەمشىلىكتەرى – نە ولاردا «مانگۋستتاعىداي» قۋات ۇنەمدەگىش قاسيەت جوق, نە ءسال سوققىدان بۇزىلىپ قالۋى مۇمكىن. ال مىقتىلىق بۇل اپپارات ءۇشىن وتە قاجەت. بالالار جۇگىرەدى, سەكىرەدى, قۇلاپ قالادى. سول كەزدە قۇرىلعى دا ەش زاقىمدانباۋى ءتيىس.
بوتاگوز ماراتقىزى
