استانا قالاسىنداعى №24 مەكتەپتە ۇلتتىق ويىن – اسىق اتۋدان ەۋرازيا كۋبوگىنا ىرىكتەۋ چەمپيوناتى ءوتتى. وعان سارىارقا, الماتى, بايقوڭىر جانە ەسىل اۋدانىنىڭ قۇراما كوماندالارى قاتىستى.
ۇلتتىق ويىندى مەڭگەرگەن 70-كە جۋىق قاتىسۋشى اسىقتى 1 مەتر قاشىقتىقتان كوزدەپ اتۋ بويىنشا باق سىنادى. ساقالارىن سايلاپ كەلگەندەردىڭ اراسىندا الپىستى القىمداعان ارداگەرلەر دە بوي كورسەتتى. ال ەڭ جاس قاتىسۋشى – 14 جاستا.
– اسىق اتۋ سپورت ءتۇرى رەتىندە ەل كولەمىندە عانا ەمەس, الەم دەڭگەيىندە دامي باستادى. 2022 جىلى جەلتوقسان ايىندا استانا قالاسىندا ازيا چەمپيوناتىنىڭ ءوتۋى دالەل بولادى. بۇل باسەكەلى تۋرنيرگە 10 ەلدەن 100-گە جۋىق سپورتشى كەلدى. ەۋرازيا كۋبوگى – ابىرويى بيىك تۋرنير. وعان جۇزدەن جۇيرىك, مىڭنان تۇلپار سپورتشىلاردى ىرىكتەيمىز, – دەدى سپورتتى وليمپيادالىق ەمەس تۇرلەرى بويىنشا دامىتۋ ديرەكتسياسىنىڭ» ءباسپاسوز حاتشىسى ايدانا جەڭىسباەۆا.
تالاپ بويىنشا جارىس ەكى كەزەڭنەن تۇردى. ياعني, ءۇش جانە ءتورت قاتىسۋشىدان قۇرالعان كوماندا جاساقتاپ, تىزىلگەن اسىققا تيگىزىپ, شەڭبەر ىشىنەن شىعارۋى ءتيىس.
دالدىك پەن قىراعىلىقتى تالاپ ەتەتىن ويىندا ءوزىنىڭ قابىلەتىمەن كورىنگەن ورالبەك اقتىلەۋوۆ, سۇلتان جايلاۋبەك, نۇراسىل مىرزالى ءبىرىنشى ورىننان كورىندى. جۇلدەگى ەكىنشى ورىن مىرزامۇرات قايىپبەكوۆ, ايدىن جاسۇزاققا, ءۇشىنشى ورىن جانبولات جامبىل, داستان امانگەلدى, توقتار ستۋدەنتۇلىنا بۇيىردى.
قىزدار اراسىندا قۇرالاي بەيسەنباي, اقنيەت تورەحان, الما تۋلەنوۆا دارالاندى. ەكىنشى ورىننان كاميلا دانياروۆا, ءمولدىر فازىلوۆا, ال ءۇشىنشى ورىننان بالميرا بەكبولسىنوۆا, سايدا ساركينا, ايعانىم تۋكەنوۆاعا كورىنىپ, استانا قالاسى سپورت جانە دەنە شىنىقتىرۋ باسقارماسى دايىنداعان گراموتالار مەن سىيلىقتارعا يە بولدى.
