استانالىق سۆەتلانا يارۋشەۆسكايا 27 جىلدان بەرى قوعامدىق كولىك جۇرگىزۋشىسى بولىپ ىستەپ كەلەدى. تروللەيبۋستى كورگەننەن كەيىن ول جۇرگىزۋشى بولۋدى ارماندايدى. تەحنيكۋمدا وقىپ ءجۇرىپ, 21 جاسىندا كۋرستاردى ءتامامداپ, جۇرگىزۋشى كۋالىگىن الادى. كوپ جىل وتسە دە, سۆەتلانا سۇيىكتى كاسىبىن تاستاعان ەمەس.
تروللەيبۋس پاركى جابىلعان سوڭ سۆەتلانا №2 اۆتوبۋس پاركىندە سەگىز جىل ىستەيدى. ال ءتورت جىل بۇرىن جۇرگىزۋشى بولىپ №1 اۆتوپارككە اۋىستى.
كۇندە تاڭەرتەڭ ديسپەتچەر جۇرگىزۋشىلەرگە جول قاعازىن بەرەدى, ال فەلدشەر اۋىسىم الدىندا مەديتسينالىق تەكسەرۋ جۇرگىزەدى.
سودان كەيىن جۇرگىزۋشىلەر تۇراققا بارىپ, ءوز اۆتوبۋستارىنا وتىرادى. ايتا كەتەرلىك جايت, ءبىر كولىك ەكى جۇرگىزۋشىنىڭ اتىنا تىركەلەدى, ولار ول ءۇشىن تولىق جاۋاپتى بولادى. جولعا شىقپاس بۇرىن ماشينالاردى كەزەكشى مەحانيك قاراپ شىعادى.
– جۇمىسقا 15 مينۋتتىڭ ىشىندە جينالامىن. سەنەسىز بە؟ كەيدە بويانىپ تا ۇلگەرمەيمىن. اۆتوبۋستا بويانامىن. ەرتە كەلىپ, جول قاعازىن الامىن. كوندۋكتورمەن سوڭعى ايالداماعا جەتكەن سوڭ بىرگە كوفە ىشەمىز. «ءبارى دە جاقسى بولادى» دەگەن ويمەن جولعا شىعامىز, – دەيدى ول.
سۆەتلانا ءۇشىن جۇمىستاعى ۇجىمنىڭ ماڭىزى زور. ونىڭ ايتۋىنشا, ارىپتەستەرى وعان باسقاشا قارايدى, كولىك جۋعاندا, جوندەگەندە كومەكتەسەدى. ءتىپتى, جولاۋشىلار دا, اسىرەسە, قاريالار ۇناتادى ەكەن.
– جولاۋشىلارمەن اڭگىمەلەسەتىن ادەتىم بار. جەڭىل كولىكپەن ءجۇرىپ تە كوردىم, تۇك شىقپادى. ماعان ۇلكەن كولىك كەرەك. شارشاسام دا, جۇمىسىمدى جاقسى كورەمىن. ءبىر اي بويى دەمالعاننان كەيىن ءبىرىنشى كۇنى جۇرەگىم دۇرسىلدەپ, جۇمىسىمدى ساعىنعانىمدى تۇسىنەمىن! – دەيدى سۆەتلانا يارۋشەۆسكايا.
سۆەتلانانىڭ تاعدىر قوسقان كۇيەۋى دە №2 اۆتوپاركتە باس ينجەنەر بولىپ ىستەيدى.
– كەيدە دەمالىس كۇندەرى بالىق اۋلاۋعا شىعامىز. تابيعات اياسىندا دەمالعاندى ۇناتامىن, – دەيدى ول.
ايتا كەتەيىك, ەلوردالىق قوعامدىق كولىكتەردە 1473 جۇرگىزۋشى جۇمىس ىستەيدى, سونىڭ ىشىندە جەتەۋى – ايەل.
astana.gov.kz
