مەملەكەت باسشىسى نۇرسۇلتان نازارباەۆتىڭ «نۇرلى جول – بولاشاققا باستار جول» اتتى قازاقستان حالقىنا جولداۋىنىڭ نەگىزگى ەرەجەلەرىن ءتۇسىندىرۋ جونىندەگى رەسپۋبليكالىق اقپارات توبىنىڭ مۇشەلەرى ەلورداداعى «كونگرەسس-حولل» سارايىندا سارىارقا اۋدانىنىڭ تۇرعىندارىمەن كەزدەسۋ وتكىزدى.
وعان قازاقستان رەسپۋبليكاسى پارلامەنتى ءماجىلىسىنىڭ دەپۋتاتتارى, قالالىق ءماسليحات دەپۋتاتتارى, بيۋدجەت سالاسىنىڭ قىزمەتكەرلەرى, مادەنيەت جانە سپورت ۇيىمدارىنىڭ باسشىلارى, شاعىن جانە ورتا بيزنەس, ۇكىمەتتىك ەمەس ۇيىمدار وكىلدەرى, كاسىپوداقتار كەڭەسى, سونداي-اق, ءدىن قىزمەتكەرلەرى قاتىستى.
كەزدەسۋدى سارىارقا اۋدانىنىڭ اكىمى ە.بولەكپاەۆ اشتى. الدىمەن ءسوز العان ەلىمىزدىڭ قارجى ءمينيسترى, رەسپۋبليكالىق اقپارات توبىنىڭ جەتەكشىسى باحىت سۇلتانوۆ بايىپتى باعدارلامانىڭ باسىم باعىتتارى تۋرالى ايتا كەلە, ەلباسى جولداۋىنداعى نەگىزگى جەتى باعىتتىڭ ارقايسىسىنا كولىك-لوگيستيكالىق ينفراقۇرىلىمدى نىعايتىپ, عىلىمدى ورىستەتۋ, ەنەرگەتيكا, تۇرعىن ءۇي ينفراقۇرىلىمدارىن دامىتۋ ماسەلەلەرىنە جەكە-جەكە توقتالدى. ولاردىڭ ىشىندە, اسىرەسە, الەۋمەتتىك ينفراقۇرىلىمدى دامىتۋ ماسەلەسىن ەرەكشە اتاپ وتكەن مينيستر بۇل سالا بويىنشا بولىنگەن قارجىلاردىڭ دۇرىس يگەرىلۋى جونىندە باياندادى. ونىڭ ايتۋىنشا, الداعى جىلدا ەلىمىزدە 67 جاڭا مەكتەپ پايدالانۋعا بەرىلىپ, ستۋدەنتتەردىڭ ستيپەندياسى 25 پايىزعا, دەنساۋلىق ساقتاۋ سالاسى قىزمەتكەرلەرىنىڭ جالاقىسى 28 پايىزعا جانە مۇعالىمدەردىڭ جالاقىسى 29 پايىزعا وسەدى. الەۋمەتتىك سالا قىزمەتكەرلەرىنىڭ دە ەڭبەكاقىسى جوعارىلاپ, جاردەماقىلاردىڭ كولەمى دە ارتادى.
– ەلىمىزدەگى شاعىن جانە ورتا بيزنەس زور الەۋمەتتىك ءرولدى اتقارىپ قانا قويماي, سونىمەن قاتار بيۋدجەتكە ەلەۋلى سالىق تۇسىمدەرىنىڭ ءتۇسۋىن قامتاماسىز ەتەدى. دامىعان ەلدەردە شاعىن جانە ورتا بيزنەس ۇلەسىندە جالپى ىشكى ءونىم كولەمىنىڭ قىرىق پايىزدان توقسان پايىزعا دەيىن كەلەدى. وكىنىشكە وراي, قازاقستاندا وسى كورسەتكىش وتىز پايىزدان دا تومەن. الايدا, سوڭعى جىلدارى ول ايتارلىقتاي ارتا ءتۇستى. ونىڭ ۇستىنە ەلىمىزدە ورتا جانە ءىرى كاسىپكەرلىكتى دامىتۋ ماقساتىندا مەملەكەت ءارتۇرلى قولداۋ كورسەتىپ جاتىر, – دەدى ب.سۇلتانوۆ.
ودان ءارى رەسپۋبليكالىق اقپارات توپتىڭ مۇشەسى, قازاقستان رەسپۋبليكاسى پارلامەنتى سەناتىنىڭ دەپۋتاتى ۆلاديمير رەدكوكاشين ەلدەگى تىنىشتىقتىڭ, ۇلتتار اراسىنداعى اۋىزبىرشىلىك پەن بىرلىكتىڭ ماڭىزدىلىعى تۋرالى اڭگىمەلەي وتىرىپ, تۇراقتىلىقتى باعالاي بىلگەنىمىزدىڭ ارقاسىندا بۇگىنگى تابىستارعا جەتكەنىمىزدى, ءبىزدىڭ كەيىنگى ۇرپاققا اماناتتار ەڭ باستى بايلىعىمىز دا وسى ەلدىڭ بىرلىگى بولۋى كەرەكتىگىن ەسكەرتتى.
قازاقستان رەسپۋبليكاسى دەنساۋلىق ساقتاۋ جانە الەۋمەتتتىك دامۋ مينيسترلىگى الەۋمەتتىك قىزمەتتەر دەپارتامەنتىنىڭ ديرەكتورى اجار تولەعاليەۆا جاڭا ساياسات ەكونوميكامىزعا سەرپىلىس بەرەتىنىن ەسكەرە وتىرىپ, وسى باعدارلامانى جۇزەگە اسىرۋدا استانالىقتاردىڭ ۇلەسى زور بولاتىنىنا سەنىم بىلدىرسە, قر پارلامەنتى ءماجىلىسىنىڭ دەپۋتاتى سۆەتلانا قادىراليەۆا پرەزيدەنتتىڭ جۇرگىزىپ وتىرعان ساياساتىن, ونىڭ ستراتەگيالىق مىندەتتەرىن شەشۋگە باعىتتالعان باستامالارىن قولداي
وتىرىپ, ءاربىر قازاقستاندىقتى جولداۋ جۇكتەگەن مىندەتتەردى جۇزەگە اسىرۋعا بىرلەسە اتسالىسۋعا شاقىردى.
گۇلبارشىن وكەشقىزى
