سوڭعى كەزدەرى الەۋمەتتىك جەلىدە ءبىر قىتاي ايەلدىڭ قازاقستاندا قىتايلارعا جەر ساۋدالاپ جۇرگەن ۆيدەوسى تارادى. ارينە, قازاقستاندا جەر ساۋداسى قازىر قىزىپ تۇرعانىمەن, الگى ايەلدىڭ استامسي سويلەگەنى بىزگە ءبىراز وي سالدى.
-مىنا جەرگە 100 مىڭ دوللار جۇمسا دا, ءبىراز قازاقتى اكەپ قوي باقتىرىپ قوي. تاعى ءبىراز اقشا جۇمساپ جەردى قورشاپ, 1000 قوي باقتىرساڭ, مالىڭنىڭ باسى بىرەر جىلدا 10 مىڭعا جەتەدى, – دەپ اقىلگويسىپ تۇر. اسىرەسە, ونىڭ قازاقتى «قاسا» (قىتايدا قازاق ۇلتىن بۇلاي ايتۋ كەمسىتۋ سانالىپ, ولاي ايتۋعا تىيىم سالىنعان) دەپ كەمسىتە سويلەگەنى, ونىڭ ءسوزىن قوستاعان الدەكىمنىڭ «قازاقتان 8 قاتىن الىپ قوي باقتىرىپ قوي» دەپ داراقىلانا كۇلگەنى شىمبايىمىزعا باتتى.
قازاقستانعا كەلىپ, ءارتۇرلى جولمەن ازاماتتىق الىپ, جاعدايى جاقسارعاننان كەيىن ءوزىنىڭ كىم ەكەنىن, قايدان كەلگەنىن ۇمىتىپ كەتەتىن كەۋدەمسوقتار از ەمەس. «اتامنىڭ شوتى اسا-اسا تيەدى» دەگەندەي, ولار ءتىپتى كەيدە قازاق ۇلتىن قارالاۋعا, سايقىمازاققا اينالدىرۋعا دەيىن بارادى. وتكەن جىلدىڭ سوڭىندا وزبەك ازاماتىنىڭ كۇللى قازاقتى سىپىرا بوقتاپ, باسشىلارعا دەيىن ءتىل تيگىزگەنى – سونىڭ ايعاعى. وعان زاڭمەن تىيىم سالىپ, قاتاڭ شارا قولدانباعاننان كەيىن, كوبى اۋزىنا كەلگەنىن وتتاپ الادى دا, سوڭىنان كەشىرىم سۇراپ قۇتىلادى. قوعامدا مۇنداي جاعدايدىڭ ەتەك الۋىنا, باستىسى, مەملەكەت قۇرۋشى تۇلعالىق ۇلت – قازاق حالقىنىڭ مۇددەسى ەسكەرىلمەۋى سەبەپ بولىپ وتىر. ويتكەنى ۇلتتىڭ رۋحىن, مەملەكەتتىڭ بەدەلىن ساقتاۋ جاعى زاڭدا قاراستىرىلماعان.
بيلىكتىڭ ايتقانىنا سەنسەك, قازاقستاندا شەتەلدىكتەرگە جەر ساتىلمايدى. بىراق قازاقستان ازاماتىنا ۇيلەنىپ نەمەسە تۇرمىسقا شىعىپ, 5 جىلدان كەيىن ازاماتتىق العانداردىڭ جەر ساتىپ الۋىنا شەكتەۋ جوق. دەمەك, جوعارىداعى ايەل دە وسىنداي جولمەن ازاماتتىق الىپ, ودان سوڭ جەر العان بولۋى مۇمكىن. ونىڭ قانشالىق جەر العانىن, وعان قانشا جەرلەستەرىن شاقىرىپ ورنالاستىرىپ قويعانىن تەكسەرىپ, باقىلاپ انىقتاپ, «پالەستيناداعى جەر ساتۋعا قۇنىققان ارابتاردىڭ اياعىن قۇشپايىق» دەپ ساقتىق جاساپ وتىرعان مەكەمە بار ما؟ 10 شاقتى جىل بۇرىن الا دوربا سۇيرەتىپ كەلگەن ايەلدىڭ بۇگىنگى تاڭدا الماتىنىڭ ورتاسىنداعى ۇلكەن بازاردىڭ قوجايىنىنا اينالعانىمەن قويماي, بۇگىن شەتەلدىككە جەر ساۋدالاپ جۇرگەنىن قالاي تۇسىنۋگە بولادى؟ ول ازاماتتىقتى قالاي الدى؟ قانداستاردىڭ ءوزى ازەر الاتىن ازاماتتىق اقشالى شەتەلدىكتەرگە ساتىلىپ, ول الدەكىمدەردىڭ بيزنەسىنە اينالىپ كەتكەن جوق پا؟ ءبىزدى وسى سۇراۋلار الاڭداتادى.
ارينە, بۇۇ مويىنداعان, شەكاراسى شەگەندەلگەن ءبىزدىڭ ەلگە ەشكىم اسكەر شىعارىپ, اشىق باسىپ الماس, بىراق بۇگىن جالبىزداپ كىرىپ, ەرتەڭ جاعاڭا جارماساتىن جاۋ جوق دەپ ەشكىم ايتا المايدى. بۇگىن ءبىزدىڭ ەلدىڭ ازاماتتىعىن الىپ, ساۋداسىن دوڭگەلەتىپ وتىرعان ادام ەرتەڭ سايلاۋعا قاتىسىپ بيلىككە كەلۋى دە بەك مۇمكىن. ەلدىڭ ىشكى ساياساتىنا ىقپال ەتۋ ءۇشىن وعان سىرتتاي سۇيەۋ بولاتىندار دا تابىلادى. ءبىزدىڭ بيلىك وسى ۇزاق بولاشاقتىق ماسەلەنى ەسكەرىپ, ەتەگىن قىمتاي ۇستاعانى ءجون دەپ سانايمىز.
