بارد انشىلەر بازارى
ەلوردادا 15-ءىنشى حالىقارالىق «استانا» بارد-ورىنداۋشىلار فەستيۆالى بولىپ ءوتتى. اۋا رايىنىڭ مىڭ قۇبىلعانىنا قاراماستان قاتىسۋشىلار مەن كورەرمەندەردىڭ مەرەكەلىك كوڭىل-كۇيى كوتەرىڭكى بولدى.
ءۇش كۇنگە سوزىلعان فەستيۆال بارىسىندا نەشە ءتۇرلى كونكۋرستار مەن ويىن-ساۋىق باعدارلامالارى ۇيىمداستىرىلىپ, كوپتەگەن اسەم اۋەندەر استانالىق تۇرعىنداردى قايتا-قايتا تاڭداي قاقتىردى.
كورەرمەندەردىڭ ورىنداۋشىلارعا دەگەن ىستىق ىقىلاسى دا ءسات سايىن ارتا تۇسپەسە, ەش كەمىمەگەنى بايقالدى. كوڭىلدىڭ جايلى بولعانى سونشا, ءان وڭاي شىرقالدى. ومبىدان كەلگەن «كامەرتون», قاراعاندىلىق «مارياننا» مەن «پياتنيتسا» جانە ەلوردالىق «بەلىي كيت» انسامبلدەرى ورىنداۋشىلىعىمەن فەستيۆالدىڭ كوركىن ودان ءارى قىزدىرا ءتۇستى. بۇل جەردە السىزدىك تانىتقان ەشكىم كورىنبەدى, ءبارىنىڭ داۋىسى قۇلاققا جاعىمدى, كوڭىلگە قونىمدى. بىلتىرعىعا قاراعاندا ورىنداۋشىلار دەڭگەيىنىڭ ەداۋىر وسكەنىن بايقادىق.
ال ميحايل ششەرباكوۆ پەن يۋلي كيمنىڭ ءبىر جارىم ساعاتتىق باعدارلاماسى تىڭدارماندار ءۇشىن ەڭ ۇلكەن سىيلىق بولدى. ادەمى بەزەندىرىلگەن تۋريستىك بازادا وتكەن فەستيۆالدىڭ دىبىس پەن جارىق ساپاسى جاعىن دا اۋىز تولتىرىپ ايتۋعا بولادى. جوعارىدا اتالعانداردان بولەك, جەڭىس ىسقاقوۆا, رايسا نۋر, ميحايل كوچەتكوۆ, ۆاديم ەگوروۆ, الەكسەي يۆاششەنكو, ۆلاديمير ترۋيانسكي جانە الەكساندر بوروموتوۆ سياقتى تاعى دا باسقا كىل مىقتىلاردىڭ كەيبىرى ءوز ونەرلەرىن كورسەتسە, ەكىنشىلەرى ادىلقازىلىق ەتتى.
العاشقى كۇنى رەسەي مەن قازاقستاننىڭ ءارتۇرلى قالالارىنان كەلگەن مارتەبەلى مەيمانداردىڭ قاتىسۋمەن قالالار شەرۋى بولىپ ءوتتى. ۇيىمداستىرۋشىلاردىڭ ايتۋىنشا, اۆتورلىق فەستيۆالدى جەر-جەردەن كەلگەن شامامەن 1500-گە جۋىق كورەرمەن تاماشالاعان ەكەن.
ءۇش كۇندىك فەستيۆالدى قورىتىندىلاي كەلە, «اۆتور», «سازگەر», «ورىنداۋشى» جانە «انسامبل» اتالىمدارى بويىنشا ۇزدىكتەر انىقتالدى. «اۆتور» اتالىمىندا استانالىق دميتري داۆينسكيح لاۋرەات اتانسا, قاراعاندىلىق ۆاديم كيم ديپلومانت بولدى. ال ورىنداۋشىلار اراسىنان لاۋرەات شىقپاعانمەن, قاراعاندىلىق قوس ونەرپاز كاتيا ۆيتەك پەن الەكساندرا شارافۋتدينوۆا ديپلومانت اتاندى. «انسامبل» اتالىمىندا ومبىدان كەلگەن «كامەرتون» لاۋرەات اتانىپ, ديپلومانت بولۋ قاراعاندىلىق «مارياننانىڭ» ماڭدايىنا جازىلدى. ال ارنايى سىيلىققا استانا قالاسىنىڭ تۇرعىنى قۋانىش ماقسوتوۆ پەن قاراعاندى قالاسىنان كەلگەن قوناق كاتيا ۆيشنياكوۆا يە بولدى. تەك قانا «سازگەر» اتالىمىنان العا سۋىرىلىپ شىعار ەشكىم تابىلمادى.
وسىلايشا حالىقارالىق فەستيۆال جوعارى دەڭگەيدە ءوتتى. «وگىز دە ولمەدى, اربا دا سىنبادى», ياعني ورىنداۋشىلار دا ءماز, تىڭدارمان دا تاڭداي قاعىپ تارقاستى.
نۇريسلام قۇسپانعالي