كحل چەمپيوناتىندا ەل نامىسىن قورعاپ جۇرگەن «بارىس» حوككەي كلۋبى كەزەكتى ويىندا ەكاتەرينبۋرگ قالاسىنىڭ «اۆتوموبيليست» كومانداسىن قابىلداپ, تاعى دا ءىرى ەسەپپەن, ياعني 7:2 ەسەبىمەن جەڭىسكە جەتتى.«بارىس» بيىلعى چەمپيوناتتا جەتى ويىن وتكىزىپ ۇلگەرسە, التى ويىندا قارسىلاستارىنان باسىم ءتۇستى. تەك ءبىر ويىندا عانا جەڭىلىستىڭ اششى ءدامىن تاتقان ەدى. وسىلايشا, «بارىس» جاڭا ماۋسىمدى جاڭا رەكوردپەن باستاپ وتىر.
استانالىق كوماندا بۇگىندە كحل چەمپيوناتىنىڭ جالپى بىرىنشىلىگىندە سانكت-پەتەربۋرگتىڭ سكا كومانداسىنان كەيىن ەكىنشى ورىندا كەلەدى. ال «شىعىس» كونفەرەنتسياسى بويىنشا كوش باسىندا تۇر. ازىرگە ەڭ كوپ گول سوققان ءبىزدىڭ «بارىس» بولىپ وتىر. ءبىزدىڭ حوككەيشىلەر جەتى ويىندا قارسىلاستار قاقپاسىنا 40 شايبا سالىپ ۇلگەردى. بۇل كحل چەمپيوناتىنداعى جاڭا رەكورد.
بىرنەشە استانالىق اپتا سايىن جاڭارتىلىپ وتىراتىن «ۇزدىك ويىنشىلار» قاتارىنان تۇسپەي كەلەدى. اتاپ ايتقاندا, بەس گول سوعىپ, جەتى رەت ءدال پاس بەرگەن نايدجەل دوۋس ۇزدىك بومبارديرلەر ءتىزىمىن باستاسا, تالعات جايلاۋوۆ ۇزدىك پاس بەرۋشىلەردىڭ قاتارىنان كورىنىپ ءجۇر. تالعات سەگىز ءدال پاس شىعارىپ, ءۇش گولدىڭ اۆتورى اتانعان. سونداي-اق, بيىل كوماندا ساپىنا قوسىلعان امەريكاندىق ميكە لۋندين ۇزدىك قورعاۋشىلار تىزىمىنەن ورىن العان.
«بارىس» كەلەسى ويىندارىن سىرت الاڭدا وتكىزەدى. 26 قىركۇيەكتە «دونباسس» (دونەتسك), 28 قىركۇيەكتە «مەدۆەشچاك» (زاگرەب), 30 قىركۇيەكتە «دينامو» (مينسك), 2 قازاندا «سپارتاك» (ماسكەۋ) كوماندالارىمەن وينايتىن بولادى.
عالىم قوجابەكوۆ
