الداعى دۇيسەنبى, 29 تامىزدان باستاپ استاناداعى قابانباي باتىر كوشەسى مەن قورعالجىن تاس جولىنىڭ قيىلىسىنا ەلمىزدە بۇرىن-سوڭدى بولماعان بولەكشە باعدارشام ورناتىلادى. جاڭا قوندىرعىنى ەلوردالىق ءىىد اكىمشىلىك پوليتسيا باسقارماسى ەكسپەريمەنت رەتىندە ۇسىندى.
اتالمىش اپپارات قىزىل ءتۇستى «+» بەلگىسى تۇرىندە باعدارشام جانىنا بەكىتىلەدى. بۇعان ۇقساس سيگنال بۇگىندە فرانتسيادا كەڭىنەن تانىمال. ونىڭ ەڭ باستى ارتىقشىلىعى – سولعا قاراي بۇرىلعان كولىكتىڭ قاۋىپسىزدىگىن قامتاماسىز ەتۋىندە. ياعني, بەلگى تەك سول جاققا قاراي بۇرىلاتىن جۇرگىزۋشىلەرگە عانا ارنالعان. مۇندا «+» سيگنالى قاراما-قارسى باعىتتاعى باعدارشامنىڭ قىزىل كوزى جانىپ نە ءسونىپ تۇرعانىنان حابار بەرەدى.
ماسەلەن, قابانباي باتىر مەن قورعالجىن تاس جولىنىڭ قيىلىسىندا جاناما باعىت بويىنشا تۇران داڭعىلىنان كەلە جاتقان ترانسپورتتىڭ وتۋىنە رۇقسات بەرەتىن باعدارشام سيگنالى ەرتەرەك جانادى. ءدال وسى كەزدە سولعا قاراي ەش كەدەرگىسىز ءارى قاۋىپسىز بۇرىلاتىن مۇمكىندىك تۋادى. جۇرگىزۋشىلەر «+» سيگنالىنىڭ كومەگىمەن قاراما-قارسى باعىتپەن كەلە جاتقان كولىكتەر ءۇشىن باعدارشامنىڭ قىزىل كوزى جانىپ نە ءسونىپ تۇرعانىن بىلەدى. ەگەر «+» سيگنالى ءوشىپ قالسا, قاراما-قارسى باعىت ءوز قوزعالىسىن باستايدى جانە ولارعا جول بەرۋ كەرەك. وسىلايشا جول قوزعالىسىنىڭ قاۋىپسىزدىگى جوعارىلايدى.
بوتاگوز ماراتقىزى
