استانا ەكونوميكالىق فورۋمى اياسىندا قالا باسشىلارىنىڭ ءوزارا كەزدەسىپ, ورتاق ماقساتتى ماسەلەلەرىن تالقىلاۋعا مۇمكىندىك تۋىندادى.
باقىت سۇلتانوۆ ماسكەۋ ۇكىمەتىنىڭ ءمينيسترى – ماسكەۋ سىرتقى ەكونوميكالىق جانە حالىقارالىق قاتىناستار دەپارتامەنتىنىڭ باسشىسى سەرگەي چەرەمينمەن كەزدەستى. ەلوردا باسشىسى جۋىردا نۇر-سۇلتان قالاسىنىڭ 2050 جىلعا دەيىنگى ستراتەگيالىق دامۋى باعدارلاماسىنىڭ تۇساۋكەسەرى وتەتىنىن مالىمدەدى. وسىعان بايلانىستى س.چەرەمين ماسكەۋدىڭ قالالىق ماسەلەلەردى شەشۋدەگى ەڭ تابىستى جوبالارىن قولدانۋدى ۇسىندى. «جۇيەلى ينتەگراتسيالانعان جۇمىستى جالعاستىرۋ ءۇشىن كۇن ءتارتىبىن جاڭارتۋدى جانە 2019-2021 جىلدارعا ارنالعان نۇر-سۇلتان مەن ماسكەۋ اراسىنداعى ىنتىماقتاستىقتىڭ جاڭا باعدارلاماسىن ازىرلەۋ ماڭىزدى» دەدى باقىت سۇلتانوۆ. بۇدان باسقا, قالا اكىمى ماسكەۋ ۇكىمەتىنەن قازان ايىندا قازاقستاننىڭ استاناسىندا وتەتىن دۇنيەجۇزىلىك تۋريستىك ۇيىمىنىڭ VIII عالامدىق ءسامميتىن وتكىزۋدى قولداۋىن سۇرادى.
نۇر-سۇلتان قالاسىنىڭ اكىمى تاللين مەرى ميحايل كىلۆارتپەن دە كەزدەستى.
ەلوردا باسشىسى ەكى ەل اراسىنداعى قارىم-قاتىناس ءوزارا تۇسىنىستىك جاعدايىندا دامىپ كەلە جاتقانىن اتاپ ءوتتى. «ەلباسى نۇرسۇلتان نازارباەۆتىڭ ساليقالى ساياساتىنىڭ ارقاسىندا ءبىز باسقا قالالاردىڭ ءجۇز جىلدا جەتكەن بەلەستەرىن 20 جىل ىشىندە باعىندىردىق. دامۋ تاجىريبەسى بار, ەندى بىزگە ساپالى ءوسۋ قاجەت. وسى ماقساتتا ءبىز ەكونوميكا, ءتۋريزمدى دامىتۋ, ءومىر ءسۇرۋ ءۇشىن قولايلى جاعداي جاساۋ تۇرعىسىنان كەشەندى جوسپار ازىرلەپ جاتىرمىز» دەدى قالا اكىمى. كەزدەسۋ اياسىندا باقىت سۇلتانوۆ ءوزارا ءىس-قيمىلدىڭ باعدارلامالىق قۇجاتىن جاساۋدى, ەكى ەلوردانىڭ ىنتىماقتاستىعىن تەرەڭدەتۋدى ۇسىندى. ءوز كەزەگىندە تاللين مەرى نۇر-سۇلتان قالاسى قازاقستاننىڭ استاناسى عانا ەمەس, سونداي-اق تۇتاس ايماقتىڭ ەكونوميكالىق, ساياسي جانە مادەني ورتالىعىنا اينالۋى مۇمكىن ەكەندىگىن اتاپ ءوتىپ, ەكى استانانىڭ اراسىنداعى سەرىكتەستىككە باسا نازار اۋدارعىسى كەلەتىنىن ايتتى. قوس تاراپ الداعى ۋاقىتتا كولىك جانە قالالىق ينفراقۇرىلىمدى دامىتۋ, مەديتسينالىق تۋريزم جانە ءبىلىم بەرۋ سالاسىنداعى ىنتىماقتاستىقتى ارتتىرۋعا كەلىستى.
سونداي-اق نۇر-سۇلتان قالاسى اكىمىنىڭ ورىنباسارى ەرلان قاناليموۆ قازاقستانداعى تايلاند كورولدىگىنىڭ ەلشىسى راسس دجاليچاندرا مەن بانگكوك قالالىق كەڭەسىنىڭ توراعاسى ۆاللوپ سۋۆانديمەن كەزدەسۋ وتكىزدى. كەزدەسۋ بارىسىندا ەكى ەل استاناسىنىڭ ىنتىماقتاستىعى مەن تۋريزم ارىپتەستىگى جايىندا ءسوز بولدى.
بيىل نۇر-سۇلتان مەن بانگكوك قالالارى اراسىنداعى قارىم-قاتىناسقا 15 جىل تولىپ وتىر. سوعان وراي ەكى تاراپ وكىلدەرى مەرەيلى داتاعا بايلانىستى بىرلەسىپ وتكىزەتىن ءىس-شارالاردى تالقىلادى. بۇل مادەني شارالار بانگكوك قالاسىندا الداعى كۇز ايىندا وتەدى دەپ جوبالانىپ وتىر.
ءوز كەزەگىندە بانگكوك قالالىق كەڭەسىنىڭ توراعاسى ۆاللوپ سۋۆاندي استانا كۇنىنە وراي 6-8 شىلدە ارالىعىندا ەلوردادا تاي مادەني باعدارلاماسىن وتكىزۋدى جوسپارلاپ وتىرعانىن ايتتى.
كەزدەسۋ سوڭىندا قالا اكىمىنىڭ ورىنباسارى بانگكوك گۋبەرناتورىن بيىلعى 9-11 قازاندا ەلوردادا بولاتىن دۇنيەجۇزىلىك تۋريستىك فورۋمعا قوناق رەتىندە قاتىسۋعا شاقىردى.
سونداي-اق, نۇر-سۇلتان قالالىق قوعامدىق دەنساۋلىق ساقتاۋ باسقارماسىنىڭ باسشىسى مارات شورانوۆ ءۇرىمشى قالاسىنىڭ ۆيتسە-مەرى سە شاوديمەن كەزدەسىپ, مەديتسينالىق سالاسىنداعى ارىپتەستىك تۋرالى اڭگىمەلەستى.
