– وسىدان ناق وتىز جىل بۇرىن بوداندىقتىڭ بايلاۋىنان بوساپ, تاۋەلسىز ەل رەتىندە دەربەس ءۇي تۇرعىزدىق. شەكارا شەگەلەندى, قۇلاشىمىزدى جايعاندا بايىرعى تۇران تۇگەل قۇشاققا ەندى. باۋىرىمىزدى بۇتىندەپ, جوعىمىزدى تۇگەندەدىك. بارىمىزدى ۇقساتىپ باقتىق. الاساپىراننان كەيىن ەتەك-جەڭىن تۇزەپ, ەل ەس جيدى. ءدۇيىم دۇنيە داعدارىپ, پوستكەڭەستىك بالاڭ مەملەكەتتەر دە داعدارىس قۇرساۋىنا قامالعان الاڭ-ەلەڭ شاقتا ول كوتەرىلدى مىنبەگە. ءيا, الەم ساحناسىنا جاڭا, جاس قالا كەلدى. سەنبەدى كوبى, كوكەيدە كۇمان ەستى. «ءتۇر-ءتۇسى تىم سۋىق» دەستى ولار. «ومىرشەڭ بولۋى نەعايبىل…» دەدى كوپ. ارقانىڭ اققۇيرىق بورانىنان ىقتى جۇرت. دەگەنمەن ساڭلاق ساياساتتىڭ كوزىمەن قاراساق, ءتىپتى سول كەزەڭدە وزگە وڭىرمەن سالىستىرعاندا اقمولا استانا تۇرعىزۋعا ابدەن قولايلى مەكەن بولدى. ساۋدا-ساتتىقتىڭ اۋانى تەرىسكەيگە ىققان شاقتا ارقا ناعىز توعىز جولدىڭ تورابى, ەكى قۇرلىقتىڭ بەلۋارى ەدى. ءارى قۇرساعى قۇرعاعان الىپ مەملەكەتتەردىڭ سۇقتانعان كوزى جەتپەيتىن ورتالىق تا وسى ايماق. قازاق حاندارىنىڭ استاناسى بولعان تۇركىستان ولكەسىندەگى قالالار دا وسى باسىمدىققا يە-تۇعىن. سوندىقتان ستراتەگيالىق نىسان رەتىندە اقمولا لايىقتى ورتالىق دەپ شەشىلدى. كۇدىك پەن كۇمان, ءۇمىت پەن ارمان توعىسىندا جاس استانانىڭ قازىعى قاعىلدى وسىلاي.
ەلوردا – مەنىڭ قۇرداسىم. ەكەۋمىز دە جاستىقتىڭ ناعىز وتتى جىلدارىن, قايراتتى كەزەڭدى كەشۋدەمىز. جاس استانامىزدى مەن ءوزىم قۇرالپى ارمان قۋعان الاۋلى جىگىتتەي ەلەستەتەم. وعان «سۇلۋ, اسەم» دەيتىن تەڭەۋ جاراسپايتىن سياقتى. ارقانىڭ ۇسكىرىك ايازىنا توتەپ بەرۋگە قايتپاس كۇش, توڭ تەگەۋرىن قاجەت. ناعىز جىگىتتىڭ بويىنداعى قاسيەتتى تالاپ ەتەدى بۇل دالا. جيىرما جىلدىق تاريحتا ءتيىستى دەڭگەيدە كوركەيىپ كەلەدى قالامىز. سىرتتان ايتىلعان سىنعا سىر بەرىپ كەرەك ەمەس دەپ بىلەم. سەبەبى ەلوردا ەكەۋمىزدىڭ الدىمىزدا زور اسۋ, مول مۇمكىندىكتەر تۇر. قازىر ارمانىمىزعا قاراي قارىشتاپ قادام تاستاپ كەلەمىز. ماقساتىمىز دا ۇقساس – دامۋ, جەتىلۋ, قاناتتى كەڭ جايۋ, دوڭگەلەك الەمگە دارمەنىمىزدى تانىتۋ. ءبىزدىڭ ءبىر-بىرىمىزگە كىندىگىمىز بايلاۋلى. استانا ماعان ءوز ارمانىمدى جارىققا شىعاراتىن مۇمكىندىك سىيلاسا, مەن ونىڭ اتىن الەمگە پاش ەتەتىن تۇلعاعا اينالامىن. مەنىڭ دامۋىم – ەلىمنىڭ دامۋى. جيىرما جىلدان سوڭ مەن ءوز الەمىمدە قولتاڭبامدى قالدىرسام, ەلوردا دا ءبىر ساتى بيىكتەي بەرمەك. ەڭسە تۇزەگەلى بەرى ەلوردانىڭ تالاي سارابدال باستامالارعا سەبەپكەر بولعانىنا تاريحتىڭ ءوزى ءتىرى كۋاگەر. ايبىندى قالانىڭ الار بيىگى ءالى كوپ. ونى ۋاقىتتىڭ ەنشىسىنە قالدىرامىز. الەم كارتاسىنداعى الپاۋىت رەسپۋبليكامىزدىڭ جاڭا داڭعىلىنىڭ باستاۋى عانا بۇل.
مەيىرجان جيەنباي,
ل.گۋميلەۆ اتىنداعى ەۋرازيا
ۇلتتىق ۋنيۆەرسيتەتىنىڭ ستۋدەنتى:
