قازاق باسپاسوزىندە سپورتتى ايشىقتى تاقىرىپقا اينالدىرعان سەيداحمەت بەردىقۇلوۆتان ءتالىم العانىن ماقتان ەتەتىن نەسىپ ءجۇنىسبايۇلى بۇگىنگى تاڭدا ءوزى دە قارىمدى, قارۋلى قالامگەرگە اينالدى.
قالىڭ وقىرمانى مەن شاكىرتتەرى نەس-اعا دەپ قۇرمەتپەن قارايتىن قالامگەردىڭ شىعارماشىلىق قابىلەتى جاستايىنان جارقىراپ كورىندى.
تالدىقورعان وبلىسىنىڭ قاراتال اۋدانىنداعى «كوپبىرلىك» اۋىلىندا تۋىپ-وسكەن ول مەكتەپتەن كەيىن كوپ ويلانباستان وتان الدىنداعى بورىشىن وتەۋگە اتتاندى. ال اسكەردەن ورالعان سوڭ ارمانى مەن ماقساتىنا اينالعان قازگۋ-گە جول تارتادى. جۋرناليست بولۋدى قالايدى. ءسويتىپ 1970 جىلى جۋرناليستيكا فاكۋلتەتىنە قابىلدانىپ, 1975 جىلى قىزىل ديپلوممەن بىتىرەدى. جۇرەگى قالاعان ماماندىقتى مەڭگەرگەن بەتتەن «لەنينشىل جاس» گازەتىنە جۇمىسقا قابىلدانادى. ويتكەنى جاستار گازەتىنىڭ وقىرماندارىنا نەسىپ جۇنىسباەۆ ەسىمى ونىڭ ستۋدەنت كەزىنەن-اق تانىس بولاتىن. سول كەزدەگى ءجۇز مىڭداعان وقىرمانى بولاتىن «لەنينشىل جاس» گازەتىندە سپورت جانە اسكەري-پاتريوتتىق تاربيە ءبولىمىن باسقاردى, رەداكتسيا القاسىنىڭ مۇشەسى, كاسىپوداق, كومسومول, پارتيا ۇيىمدارىنىڭ حاتشىسى بولدى. وسى گازەتتە ءجۇرىپ سپورت سالاسىن وقىرماننىڭ ەڭ سۇيىكتى تاقىرىبىنا اينالدىرا ءبىلدى.
1991 جىلى نەسىپ ءجۇنىسبايۇلى رەسپۋبليكالىق «سپورت» گازەتىنە باس رەداكتور بولىپ تاعايىندالادى. بۇل باسىلىمدا كەڭىنەن كوسىلۋىنە جول اشىلدى. تەك قانا سپورتتى جازىپ قويماي, سپورتتى مەملەكەتتىك, ۇلتتىق تۇرعىدا جانداندىرۋعا كىرىستى. سونىڭ ءبىر ايعاعى ەگەمەن ەلدىڭ فۋتبول چەمپيوناتىنا قازاق جىگىتتەرىنەن قۇرالعان كوماندا قوسۋدى ويلاستىرىپ, ول ماقساتىنا دا جەتتى. ول ءۇشىن ەلدىڭ تۇكپىر-تۇكپىرىنەن تالانتتى جاستاردى ىرىكتەۋ ۇيىمداستىرىپ, دەمەۋشىلەر تاۋىپ, «نامىس» اتتى كوماندانى قازاقستان چەمپيوناتىنا قوستى. سول كوماندادا ويناعان بىرنەشە فۋتبولشىلار كەيىننەن قازاقستان ۇلتتىق قۇراماسى ساپىندا ونەر كورسەتتى. وسىدان كەيىن نەس-اعانى قالاي قايراتكەر دەمەسسىڭ؟!
نەسىپ ءجۇنىسبايۇلىنىڭ شتاتتاعى جۇمىسىنان تىس شىعارماشىلىق ەڭبەگى دە ۇشان-تەڭىز دەۋگە نەگىز بار. وليمپيادا ويىندارىنا ون رەت بارىپ, فۋتبولدان بەس الەم چەمپيوناتىنا قاتىسىپ, جۇزدەگەن رەپورتاجدار, ماقالالار ۇسىنعان قالامگەرگە قازاق وقىرمانى ءدان ريزا ەكەنى ءسوزسىز. قالامگەردىڭ قالامىنان تۋىنداعان «ءۇشىنشى راۋند», «اۋىلدان شىققان الىپتار», «فۋتبولمەن تىنىستاعان يسپانيا», «اكەمنىڭ قامشىسى», «نامىس جىرتار ۇل قايدا؟!», «مەكسيكاداعى فۋتبول تويى», «مۇستافا وزتۇرىك», «ەرەجەسىز «بەلدەسۋ», «باس يەمىن!» اتتى ماعىنالى-مازمۇندى كىتاپتارى وقىرماننىڭ ولجاسىنا اينالعانى دا انىق. سونىمەن قاتار, ەل ەگەمەندىگىن العالى ۇلتتىق كوماندامەن قاتىسقان وليمپيادا ويىندارىنىڭ شەجىرەسى بوپ سانالاتىن, ورىس تىلىندە جازىلعان «وليمپيسكي مارشرۋت» كىتاپتارىنىڭ ءتورت تومى دا قازاقستان سپورتىنىڭ تاريحناماسى ىسپەتتى.
ۇنەمى بويى سەرگەك, ويى ەلگەزەك جۇرەتىن نەسىپ ءجۇنىسبايۇلى تەك جازىپ قانا قوياتىن قالامگەردىڭ قاتارىنا جاتپايدى. ول سپورتتى ىشىنەن بىلەتىن مايتالماننىڭ ءوزى دەسەك جاراسادى. 1996 جىلى قازاق دەنەشىنىقتىرۋ جانە سپورت ينستيتۋتىن ءبىتىرىپ, باپكەر-وقىتۋشى ماماندىعىن العان. توعىزقۇمالاق سپورتىنان سپورت شەبەرى, رەسپۋبليكا چەمپيونى. قازاقستاننىڭ ەڭبەك سىڭىرگەن جاتتىقتىرۋشىسى.
نەسىپ ءجۇنىسبايۇلى قوعامدىق جۇمىسقا دا كوپ جەگىلەتىن ازاماتتىڭ قاتارىنان سانالادى. ءار جىلداردا قر سپورت كوميتەتىنىڭ القا مۇشەسى بولىپ سايلاندى. حالىقارالىق سپورت جۋرناليستەرى قاۋىمداستىعىنىڭ (AIPS) مۇشەسى, ازيا سپورت جۋرناليستەرى وداعىنىڭ (ASPU) اتقارۋ كوميتەتىنىڭ مۇشەسى, ازيا سپورت ءباسپاسوزى وداعى پرەزيدەنتىنىڭ كەڭەسشىسى قوعامدىق قىزمەتتەرىن ابىرويمەن اتقاردى. ازيا وليمپيادالىق كەڭەسىنىڭ (وسا) ءباسپاسوز كوميتەتىنىڭ مۇشەسى بولعان تۇڭعىش ءارى جالعىز جۋرناليست. قازاقستان سپورت ءباسپاسوزى قاۋىمداستىعىن قۇرۋشى جانە تۇڭعىش پرەزيدەنتى بولدى.
ءبىر قاراعاندا قاراپايىم بولىپ كورىنەتىن نەسىپ ءجۇنىسبايۇلىنىڭ قازاق باسپاسوزىنە, ونىڭ ىشىندە سپورت سالاسىنا, ۇلت مۇددەسىنە سىڭىرگەن ەڭبەگىنە قاراپ قايراتكەر ەكەنىنە كوز جەتكىزەمىز. وسى ورايدا ەلىنە ەلەۋلى, حالقىنا قالاۋلى ازاماتتىڭ قۇرمەت پەن ماراپاتتان كەندە قالماسى زاڭدىلىق قوي. بۇل رەتتە نەسىپ ءجۇنىسبايۇلىنىڭ ابىرويى دا اسقاق كورىنەدى. قازاقستان جۋرناليستەر جانە جازۋشىلار وداعىنىڭ مۇشەسى, باۋبەك بۇلقىشەۆ اتىنداعى جۋرناليستەر وداعى سىيلىعىنىڭ, سەيداحمەت بەردىقۇلوۆ اتىنداعى سىيلىعىنىڭ يەگەرى. قازاقستان ۇلتتىق وليمپيادالىق كوميتەتىنىڭ «جىلدىڭ ۇزدىك ءجۋرناليسى» سىيلىعىنىڭ لاۋرەاتى. قر پرەزيدەنتىنىڭ العىس حاتىمەن, استانا قالاسىنىڭ 10 جىلدىعى, قازاقستان حالىق اسسامبلەياسىنىڭ 20 جىلدىق قۇرمەت مەدالىمەن ماراپاتتالعان. الماتى وبلىسى جانە قاراتال اۋدانىنىڭ قۇرمەتتى ازاماتى اتاعىنىڭ يەگەرى.
نەسىپ ءجۇنىسبايۇلى 2010 جىلى مەملەكەت باسشىسىنىڭ جارلىعىمەن قازاقستاننىڭ ەڭبەك سىڭىرگەن قايراتكەرى اتاعىنا يە بولدى.
وسىدان تۋرا 70 جىل بۇرىن قازاقتىڭ «كوپبىرلىك» دەگەن الاقانداي اۋىلىندا دۇنيەگە كەلگەن قاعىلەز بالا بۇگىنگى كۇندە جۇلدىزى جانعان, حالقىنا جاققان قالامگەر, قايراتكەر بولىپ وتىر.
