قازاقستان رەسپۋبليكاسىنىڭ ۇلتتىق مۋزەيىندە «ورىس كەسكىندەمە ونەرىنىڭ ءتورت عاسىرى» اتتى كورمە اشىلدى.
كورمەنى رەسەي فەدەراتسياسى مەن قازاقستان رەسپۋبليكاسى مادەنيەت مينيسترلىكتەرىنىڭ قولداۋىمەن «حالىقارالىق مادەني ورتالىق» اكەۇ (رەسەي) جانە قازاقستان حالقىنىڭ رۋحاني دامۋ قورى ۇيىمداستىردى.
قازاقستاندا ءبىرىنشى رەت جاڭاشىل ويلارى ارقىلى ەۋروپاداعى دا, رەسەيدەگى دە سۋرەت ونەرى تۋرالى ءوز داۋىرىندەگى ءداستۇرلى پىكىرلەردى وزگەرتىپ توڭكەرىس جاساعان رەسەيلىك سۋرەتشىلەردىڭ كەڭ كولەمدى كورمەسى ۇسىنىلىپ وتىر.
رەسەيلىك ءتورت مۋزەي («روسيزو» مەملەكەتتىك مۋزەي-كورمە ورتالىعى, تۆەر وبلىستىق سۋرەت گالەرەياسى, يۆانوۆ وبلىستىق كوركەمسۋرەت مۋزەيى, سەرپۋحوۆ تاريحي-كوركەمسۋرەت مۋزەيى) سۋرەتشىلەر وداعىمەن بىرلەسىپ قازاقستاندا كورسەتۋ ءۇشىن ارنايى جاساقتالعان بىرەگەي جادىگەرلەردىڭ جيناعىن ۇسىنىپ وتىر. كورمەگە ۇلتتىق كوركەم سۋرەت ءداستۇرىنىڭ ءتورت ءجۇز جىلدىق تاريحى اشىلاتىن ەلۋ اۆتوردىڭ توقساننان استام جۇمىسى قويىلعان. بۇل جەردەن ورىس رەاليستىك مەكتەبى كلاسسيكتەرىنىڭ جانە ورىس اۆانگاردىنىڭ الەمگە تانىمال حاس شەبەرلەرىنىڭ, سوتسرەاليزمنىڭ جەتەكشى شەبەرلەرىنىڭ جانە ءوز شىعارماشىلىق جولدارىن ىزدەگەن ولاردىڭ زامانداستارىنىڭ جۇمىستارىن كورۋگە بولادى. كەنەپ بەتىنە تۇسىرىلگەن كەسكىندەمە ونەرىنىڭ بارلىق نەگىزگى جانرلارى ارقىلى يمپەريالىق رەسەي, كەڭەستىك رەسەي, رەسەي فەدەراتسياسى سىندى رەسەي تاريحى وقىلادى.
كورمە 14 قىركۇيەككە دەيىن جالعاسادى.
جۇما قازيەۆ
