استانا قالاسىنىڭ كوممۋنيكاتسيالار قىزمەتىندە بالالاردى ءبىرىنشى سىنىپقا قابىلداۋ تۋرالى استانا قالاسى ءبىلىم باسقارماسىنىڭ باسشىسى سەنعازىەۆ قاسىمحان سەنعازىۇلىنىڭ قاتىسۋىمەن بريفينگ ءوتتى, دەپ حابارلايدى astana-akshamy.kz.
ەلوردادا 261 000 وقۋشىنى قامتيتىن 175 ورتا ءبىلىم بەرۋ ۇيىمى بار. ونىڭ ىشىندە 102 مەملەكەتتىك, 66 جەكەمەنشىك, 7 رەسپۋبليكالىق مەكتەپ. 1 ساۋىردەن باستاپ جالپى ورتا ءبىلىم بەرەتىن مەكتەپتەرگە ءبىرىنشى سىنىپقا قۇجاتتاردى قابىلداۋ باستالادى. وتكەن وقۋ جىلىندا ءبىرىنشى سىنىپقا قالا بويىنشا 28 مىڭنان استام بالا قابىلدانعان. بيىلعى وقۋ جىلىنا ءبىرىنشى سىنىپقا بولجاممەن وتىز مىڭنان استام بالا كەلەدى دەپ كۇتىلۋدە.
قازاقستان رەسپۋبليكاسى ءبىلىم جانە عىلىم ءمينيسترىنىڭ 2018 جىلعى 12 قازانداعى № 564 بۇيرىعىنا ەنگىزىلگەن وزگەرىستەرگە سايكەس (2024 جىلى 30 قاڭتار) جالپى ورتا ءبىلىم بەرەتىن مەكتەپتەرگە ءبىرىنشى سىنىپقا قۇجاتتاردى قابىلداۋ 1 ساۋىردەن باستاپ 31 تامىزعا دەيىن جۇرگىزىلەدى.
ءبىلىم بەرۋ ۇيىمدارى دايىندىق دەڭگەيىنە قاراماستان, قىزمەت كورسەتەتىن اۋماقتا تۇراتىن التى جاستاعى جانە كۇنتىزبەلىك جىلدا التى جاسقا تولاتىن بالالاردى ءبىرىنشى سىنىپقا قابىلداۋدى قامتاماسىز ەتەدى. مامانداندىرىلعان مەكتەپتەردەن باسقا بارلىق مەكتەپتەر ءبىرىنشى سىنىپقا باراتىن بالالاردى ەشقانداي ەمتيحانسىز قابىلدايدى. ءار مەكتەپتە اتا-انالارعا كومەك كورسەتۋ ماقساتىندا ءبىرىنشى سىنىپقا قابىلداۋ بويىنشا كوميسسيا قۇرىلعان. اتا-انالار قۇجاتتاردى «ەلەكتروندىق ۇكىمەت» www.egov.kz, ۆەب-پورتالى ارقىلى تاپسىرادى جانە مەكتەپكە بارىپ قاعاز تۇرىندە دە تاپسىرا الادى.
ءبىرىنشى سىنىپقا بالالاردى ورنالاستىرعان كەزدە مەكتەپتەرگە تاپسىرىلاتىن قۇجاتتاردىڭ ءتىزىمى: اتا-انادان نەمەسە زاڭدى وكىلىنەن ءوتىنىش, «پروفيلاكتيكالىق ەكپەلەر كارتاسى» (№ 065/ۋ) جانە «بالا دەنساۋلىعىنىڭ پاسپورتى» تۋرالى (№ 052-2/ۋ) مەديتسينالىق انىقتامالار, بالانىڭ 3ح4 سم ولشەمىندەگى تسيفرلىق فوتوسۋرەتi. سونىمەن قاتار قاعاز تۇرىندە قۇجات تاپسىرعان كەزدە قوسىمشا اتا-اناسىن نەمەسە زاڭدى وكىلى ەكەندىگىن راستايتىن جەكە كۋالىگىنىڭ كوشىرمەسى ۇسىنىلادى. قۇجاتتار ءار اپتانىڭ دۇيسەنبى جانە جۇما كۇندەرى ارالىعىندا قابىلدانادى. ءبىلىم بەرۋ ۇيىمى اتا-انادان تىزبەدە كورسەتىلمەگەن قۇجاتتاردى تالاپ ەتۋگە قۇقىعى جوق. مامانداندىرىلعان ءبىلىم بەرۋ ۇيىمدارىنا كونكۋرس نەگىزىندە قابىلداندادى. ۇمىتكەرلەردەن قۇجاتتى قابىلداۋ ۇلگىلىك ەرەجەگە سايكەس كۇنتىزبەلىك جىلدىڭ 1 اقپانىنان باستاپ 15 ءساۋىر ارالىعىندا جۇرگىزىلۋدە. ءبىلىم بەرۋ ۇيىمدارىنا بەكىتىلگەن شاعىن ۋچاسكەلەر تۋرالى اقپارات قالانىڭ ءار اۋدانى بويىنشا ءبىلىم باسقارماسىنىڭ سايتىندا ورنالاستىرىلعان. ءبىلىم باسقارماسىنىڭ قاسىنان ءبىلىم بەرۋ ۇيىمدارىنا قابىلداۋ جۇمىستارىن ۇيلەستىرۋ بويىنشا شتاب قۇرىلعان. شتابتىڭ ءنومىرى 556870, 556881, 556887, 557462.
