بۇگىن مەملەكەت باسشىسىنىڭ باستاماسىمەن قۇرىلعان ەلوردانىڭ «جاسىل بەلدەۋى» اۋماعىن سانيتارلىق تازارتۋ بويىنشا ەكولوگيالىق اكتسيا وتەدى. شارا دۇنيەجۇزىلىك قورشاعان ورتانى قورعاۋ كۇنى اياسىندا ۇيىمداستىرىلادى. بۇل تۋرالى astana.kz سايتىنا استانا قالاسىنىڭ ىشكى ساياسات باسقارماسىنان حابارلادى.
ۇيىمداستىرۋشىلار شاراعا 600 استام ادام قاتىسادى دەپ جوسپارلاپ وتىر. سونىڭ ىشىندە قر قورشاعان ورتا جانە سۋ رەسۋرستارى مينيسترلىگىنىڭ, استانا قالاسى تابيعي رەسۋرستار جانە تابيعات پايدالانۋدى رەتتەۋ باسقارماسىنىڭ, استانا قالاسى بويىنشا ەكولوگيا دەپارتامەنتىنىڭ قىزمەتكەرلەرى, «استانا ورمانى» جانە «استانا ەكو-پوليگون نس» جشس كوممۋنالدىق كاسىپورىندارىنىڭ, «PosadiDerevoKZ» رەسپۋبليكالىق قوعامدىق بىرلەستىكتىڭ وكىلدەرى, سونىمەن قاتار قر ۇلتتىق گۆاردياسىنىڭ اسكەري قىزمەتكەرلەرى, «جاس وتان» جاستار قاناتىنىڭ مۇشەلەرى, بەلسەندى ستۋدەنتتەر مەن ەرىكتىلەر قاتىسادى.
الاش تاس جولىنىڭ بويىنداعى اۋماقتا زاڭسىز تاستالعان قوقىس ورىندارى تازارتىلىپ, جويىلادى. ۇيىمداستىرۋشىلار بارلىق استانالىقتاردى قالىس قالماي, قالامىزدى جيناۋعا باعىتتالعان اكتسياعا قاتىسۋعا شاقىرادى. شارا 5 ماۋسىمدا ساعات 9.30 باستالادى.
ايتا كەتەيىك, 1972 جىلى بۇۇ باس اسسامبلەياسى 5 ماۋسىمدى دۇنيەجۇزىلىك قورشاعان ورتانى قورعاۋ كۇنى دەپ بەلگىلەپ, بۇكىل الەم جۇرتشىلىعىن قورشاعان ورتانى ساقتاۋعا جانە جاقسارتۋعا باعىتتالعان شارالاردى وتكىزۋگە شاقىردى.
