بۇقارالىق سپورت – بارشاعا
مەملەكەت باسشىسى ن.نازارباەۆتىڭ «قازاقستان – 2050» ستراتەگياسى: قالىپتاسقان مەملەكەتتىڭ جاڭا ساياسي باعىتى» اتتى حالىققا ارناعان جولداۋىندا «دەنە شىنىقتىرۋ مەن سپورت مەملەكەتتىڭ ايرىقشا نازارىندا بولۋى ءتيىس. ناق سول سالاماتتى ءومىر سالتى ۇلت دەنساۋلىعىنىڭ كىلتى بولىپ سانالادى. الايدا, ەلدە بارلىعى ءۇشىن قولجەتىمدى سپورت نىساندارى, سپورت قۇرال-جابدىقتارى جەتىسپەيدى. وسىعان بايلانىستى ۇكىمەت جانە جەرگىلىكتى ورگاندار دەنە شىنىقتىرۋ, بۇقارالىق سپورتتى دامىتۋ جانە تيپتىك جوباداعى دەنەشىنىقتىرۋ-ساۋىقتىرۋ نىساندارى, سونىڭ ىشىندە, اۋلا نىساندارى قۇرىلىسى بويىنشا شارالار قابىلداۋ قاجەت. بۇل جۇمىستى كەلەسى جىلى-اق باستاۋ كەرەك» دەپ ناقتى مىندەتتەر مەن تاپسىرمالاردى ايقىنداپ كورسەتكەن بولاتىن.
وسى ورايدا استانا قالاسىنىڭ تۋريزم, دەنە تاربيەسى جانە سپورت باسقارماسى قالا تۇرعىندارىن دەنە شىنىقتىرۋمەن جانە بۇقارالىق سپورتپەن اينالىسۋعا تارتۋ, سپورت رەزەرۆىن جانە حالىقارالىق دارەجەدەگى سپورتشىلاردى دايىنداۋ ىسىندە جوسپارلى ءارى جۇيەلى جۇمىستاردى اتقارىپ كەلەدى. بۇگىنگى تاڭدا قالادا ءتۇرلى دەنساۋلىق توپتارى, اقىلى سەكتسيالار, سپورت فەدەراتسيالارى مەن كلۋبتاردى بىرىكتىرەتىن جەكە جانە كوممەرتسيالىق ەمەس 383 سپورت ۇيىمى جۇمىس ىستەيدى. وندا 159 318 استانالىق جۇيەلى تۇردە دەنە شىنىقتىرۋمەن اينالىسادى. بۇل قالا حالقىنىڭ 20,6 پايىزىن قۇرايدى.
جىل ىشىندە سپورت عيماراتتارىنىڭ سانى 508-دەن 525-كە دەيىن ءوستى. قالا تۇرعىندارىنىڭ جىل سايىن ارتا تۇسۋىنە بايلانىستى ءالى دە سپورت نىساندارىنىڭ تاپشىلىعى بار.
سپورت كەشەندەرىنىڭ بۇقاراعا قولجەتىمدىگىن قامتاماسىز ەتۋ ماقساتىندا مەكتەپ وقۋشىلارى مەن ستۋدەنت جاستارعا 35-50 پايىز ارالىعىندا جەڭىلدىكتەرگە قول جەتكىزىلدى. ونىڭ ءبىر مىسالى, فيتنەس ورتالىقتارىنىڭ كەيبىر باعدارلامالارىنىڭ قۇنى 30 مىڭنان 15 مىڭعا دەيىن تومەندەتىلدى.
سپورت نىساندارىنىڭ سانىن ۇلعايتۋ ماقساتىندا, ونىڭ ىشىندە دەنە شىنىقتىرۋ جانە ساۋىقتىرۋ كەشەندەرىن سالۋ ءۇشىن استانا قالاسىنىڭ باس جوسپارى عىلىمي زەرتتەۋ-جوبالاۋ ينستيتۋتىنان ون جەر تەلىمى بەلگىلەندى.
بۇگىنگى تاڭدا ەكى ءىرى سپورت نىساندارىن سالۋ جوسپارلانۋدا. ءبىرى – وليمپيادا رەزەرۆتەرىن دايىنداۋ ورتالىعى جانە مۇمكىندىگى شەكتەۋلى ادامدارعا ارنالعان «قايسار» سپورت كەشەنى. سونىمەن قاتار جاڭا ەسكەك ەسۋ كانالىن, اتۋ كەشەنىن سالۋ دا جوسپارعا ەنگىزىلدى.
بۇقارالىق-سپورت شارالارىن ۇيىمداستىرۋ, سالاۋاتتى ءومىر سالتىن ناسيحاتتاۋ ماقساتىندا كوپتەگەن سپورتتىق شارالار وتكىزىلۋدە. جىل باسىندا الماتى, ەسىل جانە سارىارقا اۋداندارىنىڭ ارداگەرلەر ۇيىمدارى اراسىندا «شاڭعى جولى – 2013» قالالىق چەمپيوناتى جانە تۋريستىك كوپسايىس بويىنشا (شاڭعى ءتۋريزمى) استانا قالاسى كۋبوگىنىڭ كەزەڭدىك جارىستارى ءوتتى.
توعىزقۇمالاقتان استانا قالاسىنىڭ 10, 12 جانە 14 جاس ارالىعىنداعى جاسوسپىرىمدەر چەمپيوناتى, ۆەلوسپورتتان بارلىق جاس ەرەكشەلىكتەرى بويىنشا استانا قالاسىنىڭ چەمپيوناتى, ەلوردانىڭ 15 جىلدىق مەرەيتويىنا وراي وتكەن قازاق كۇرەسىنەن «قازاقستان بارىسى» رەسپۋبليكالىق ءتۋرنيرى ەلوردا سپورتىنىڭ جاڭالىعى رەتىندە قابىلداندى. تۇراقتى تۇردە وتكىزىلىپ تۇراتىن «ءومىر نارىنەن ءلاززات ال!» اكتسياسى بۇقارا اراسىندا كەڭ تاراپ, دەنە شىنىقتىرۋ مادەنيەتىن قالىپتاستىرۋدا. فۋنكتسيونالدى گيمناستيكا رەتىندە جىل باسىنان بەرى 41 537 ادام تارتىلعان 369 سپورتتىق شارانى 87 583 ادام تاماشالاپ, سپورت دۋمانىنىڭ ورتاسىندا بولىپتى. ايتا كەتسەك, بىلتىر 495 سپورت شاراسى وتكىزىلگەن بولاتىن. سپورت مەرەكەلەرىن جاس شامالارىنا قاراي, مەكتەپ, كوللەدج وقۋشىلارى, ستۋدەنت جاستار مەن مەملەكەتتىك قىزمەتكەرلەر اراسىندا الەۋمەتتىك توپتارعا بىرىكتىرىپ وتكىزۋ قالىپتاسىپ كەلەدى.
سالاۋاتتى ءومىر سالتىن ناسيحاتتاۋ ماقساتىندا وسكەلەڭ ۇرپاق اراسىندا ءتۇرلى سپورت تۇرلەرىنەن چەمپيوناتتار ۇيىمداستىرىلدى. جەڭىمپازدار ۇيىمداستىرۋشىلاردىڭ باعالى سىيلىقتارىمەن ماراپاتتالدى.
استانالىقتار اراسىندا سپورت اۋەسقويلارى قوزعالىسى كەڭ ەتەك جايدى. ونداعان كوماندالار اراسىندا سۋ دوبى, فۋتبول, باسكەتبول, شايبالى حوككەي بويىنشا ءداستۇرلى جارىستار وتكىزۋ قالىپتاسىپ كەلەدى.
ايگۇل ۋايسوۆا