كەشە قازاق ۇلتتىق ونەر ۋنيۆەرسيتەتىنىڭ تورىندە «ەلدىك – بىرلىكتە!» ۇرانىمەن قالالىق ءحى دەلفي ويىندارىنىڭ قورىتىندى گالا-كونتسەرتى ءوتتى. وسىدان ءۇش كۇن بۇرىن باستاۋ العان ءدۇبىرلى دوداعا قاتىسقان 200-گە جۋىق ونەرپاز ەكى توپقا ءبولىنىپ, ل.ن.گۋميلەۆ اتىنداعى ەۋرازيا ۇلتتىق ۋنيۆەرسيتەتىندە جانە قازاق ۇلتتىق ونەر ۋنيۆەرسيتەتىنىڭ كونتسەرت زالىندا باسەكەگە ءتۇستى.
استانا قالاسىنىڭ جاستار ساياساتى ماسەلەلەرى باسقارماسى مەن ۇلتتىق دەلفيلىك كوميتەتى ۇيىمداستىرعان ونەر دوداسى 12 نوميناتسيادان تۇردى. باق سىناسقان باسەكەلەستەر وزدەرىنىڭ العىرلىعى مەن تاپقىرلىعىن ورتاعا سالىپ, ونەرلەرىن پاش ەتتى. ويىندار ەكى بولەك جاس ەرەكشەلىگىندە: كىشى توپ (10-15 جاس) جانە ەرەسەك توپ (16-21 جاس) ارالىعىندا ءوتتى. كونكۋرس باعدارلاماسىنىڭ ءاربىر نوميناتسياسى بويىنشا ويىننىڭ جۇلدەگەرلەرى مەن جەڭىمپازدارىن انىقتايتىن ادىلقازىلار مۇشەلەرى قۇرىلىپ, جۇزدەن جۇيرىك, مىڭنان تۇلپارلار ىرىكتەلىندى.
دەلفي ويىندارى ءبىزدىڭ زامانىمىزعا دەيىنگى 582 جىلى گرەكيادان باستاۋ الىپ, بۇگىندە الەمدىك مادەنيەتپەن ەلىمىزدە بىتە قايناسىپ, ءار جىل سايىن وتكىزىلىپ كەلە جاتىر. دارىندى بالالاردى شىڭدايتىن ونەر سايىسى قازىر جاس تالانتتاردىڭ اسىعا كۇتەتىن, وزدەرىنىڭ شىعارماشىلىق مۇمكىندىكتەرىن كورسەتەتىن بايقاۋعا اينالدى. وعان قاتىسقان ۇزدىك ونەر يەلەرىنە رەسپۋبليكالىق جانە حالىقارالىق دەلفي ويىندارىنا جولداما الۋ مۇمكىندىگى تۋادى. ويىننىڭ تانىمالدىعى مەن وعان قاتىسۋشىلاردىڭ سانى جىل سايىن ارتىپ كەلەدى. دەلفيلىك ويىندار – كلاسسيكادان باستاپ, قازىرگى جانرداعى بارلىق ونەر ءتۇرىن بىرىكتىرەتىن جارىس بولىپ وتىر.
ءتاۋىرجان راحات, «شاشۋ» بي ءانسامبلىنىڭ جەتەكشىسى, قر مادەنيەت قايراتكەرى:
– ءبىز «حالىق ءبيى» نوميناتسياسىنىڭ كىشى توبىنا قازىلىق ەتتىك. ۇيىمداستىرۋشى توپ جاقسى جۇمىس جاسادى, كوڭىلىمنەن شىقتى. ءبىر قىنجىلتقانى – ەلوردامىزدا 60-قا جۋىق بي ۇيىمدارى بار بولسا دا, ولاردىڭ 6-سى عانا ءوز ونەرىن كورسەتتى.
اليا اپپاسوۆا, دەلفي ويىندارى شتابىنىڭ ۇيلەستىرۋشىسى:
– قاتىسۋشىلار دا سىنعا تۇسەر ساتتە ءوز-وزدەرىنە سەنىمدى بولىپ, ونەرلەرىن ويداعىداي كورسەتە ءبىلدى. ال ويىن ەرەكشەلىكتەرىنە توقتالا كەتسەك, نوميناتسيالار قاتارىنا جاڭادان تەاتر, كيىم ديزاينى جانە قىسقامەتراجدى بەينەروليك قوسىلدى. مەنىڭ كوڭىلىمنەن شىعىپ, ەرەكشە اسەر قالدىرعان دا جارىستىڭ وسى بولىمدەرى بولدى. اسىرەسە, «تاعىلىم تامشىلارى» تەاتر ستۋدياسىنىڭ جاس ارتىستەرى ونەرلەرىنە ءتانتى بولدىق. «قىسقامەتراجدى فيلم» نوميناتسياسىنان ەكىنشى ورىنعا يە بولعان ەرلىك اعجانوۆ تا ءوزىنىڭ كاسىبي بەينەروليگىمەن بارشامىزدى تاڭعالدىردى. ال «كيىم ديزاينى» نوميناتسياسى تالاپتى جاستاردىڭ سوڭعى ءسان ۇلگىسىنەن بەيحابار بولمايتىندىعىن اڭعارتتى. رەسپۋبليكالىق سايىس تا استانا قالاسىندا وتپەك. ىرىكتەۋدەن وتكەن ەڭ مىقتى جاستار لەگى تامىزدىڭ 13 كۇنى ءبىر ارنادا توعىساتىن بولادى.
اسەمگۇل عنياتقىزى, «فوتوسۋرەت» نوميناتسياسىنا قاتىسۋشى:
– بۇل سايىستان ەرەكشە اسەر الدىم. ادىلقازىلار القاسى سۋرەتتەرىمىزدى جوعارى باعالاعانى قاتتى قۋانتتى. جالپى, مەكتەپ قابىرعاسىنان بەرى وسىنداي جارىستارعا قاتىسىپ كەلەمىن. دەلفي ويىندارى – وتە تانىمال كونكۋرس. وسىنداي ويىنداردىڭ ارقاسىندا ونەرپازداردىڭ شىعارماشىلىق دەڭگەيى وسەدى دەپ ويلايمىن. قاتىسۋشىلاردىڭ بارلىعى وتە تالانتتى, اقجارقىن, قاراپايىم بولدى. ءتىپتى, كەيبىرەۋلەرىمەن دوستاسىپ ۇلگەردىم. مەن ءۇشىن بۇل جوباعا قاتىسۋدىڭ ءوزى – ءبىر باقىت. سەبەبى, ءبىز كوپ تاجىريبە جيناقتادىق, ءوزىمىزدى كوپشىلىككە باسقا قىرىمىزدان كورسەتە بىلدىك.
سونىمەن, بيىلعى قالالىق دەلفي ويىنىنىڭ «دومبىرا» نوميناتسياسى بويىنشا 1-ورىن نۇربولات تاپالوۆقا بۇيىرسا, «ەسترادالىق ۆوكالدان» نازىم مۇقاتاەۆا, گۇلنۇر بايانوۆا مەن سۇلەيمەن ولجاس تا جەڭىمپاز اتاندى. «زاماناۋي بيدەن» «ەدەلۆەيس» بي ءانسامبلى, «بەينەلەۋ ونەرى» جانە «دەكوراتيۆتى-قولدانبالى ونەردەن» شولپان جاروۆا مەن بوزتاي اكىمحان, «كيىم ديزاينىنان» نۇرلىايىم تىنىشبەك, «پريما-قوبىزدان» اجار حۋان توپ جاردى. ال «شابىت» بالالار تەاترى ەڭ ۇزدىك تەاتر دەپ تاڭدالدى.
دەلفي ويىندارى جۇلدەگەرلەرىن ماراپاتتاۋ ءراسىمىنىڭ سوڭى كونتسەرتتىك باعدارلاماعا ۇلاسىپ, «Z» توبى, ايبەك بەكبوسىن, كۇلايىم قايىربەكوۆا سىندى ەسترادا جۇلدىزدارى ءان شىرقادى.
كۇنايىم ساكەن
